រដ្ឋាភិបាលបង្កើត “តំបន់សេដ្ឋកិច្ចពិសេសកាណាឌីយ៉ាផ្លូវជាតិលេខ៥១” លើផ្ទៃដីជាង៥០០ហិកតា នៅកំពង់ស្ពឺ

(ភ្នំពេញ)៖ រាជរដ្ឋាភិបាលកម្ពុជាបានសម្រេចបង្កើតតំបន់សេដ្ឋកិច្ចពិសេសថ្មីមួយទៀត ដែលមានឈ្មោះថា «តំបន់សេដ្ឋកិច្ចពិសេសកាណាឌីយ៉ាផ្លូវជាតិលេខ៥១» ស្ថិតលើផ្ទៃដីជាង៥០០ហិកតា ក្នុងភូមិសាស្ត្រ ស្រុកសំរោងទង និងស្រុកសាមគ្គីមុនីជ័យ ខេត្តកំពង់ស្ពឺ ដើម្បីពង្រឹងការវិនិយោគ និងជំរុញកំណើនសេដ្ឋកិច្ចក្នុងតំបន់។

តំបន់សេដ្ឋកិច្ចពិសេស គឺជាមជ្ឈមណ្ឌលសម្រាប់អភិវឌ្ឍវិស័យឧស្សាហកម្ម និងសកម្មភាពសេដ្ឋកិច្ចផ្សេងៗ ដែលអាចរួមមានតំបន់ឧស្សាហកម្មទូទៅ និងតំបន់ផលិតកែច្នៃសម្រាប់នាំចេញ។ តំបន់ទាំងនេះត្រូវបានរៀបចំឡើង ដើម្បីបង្កើតបរិយាកាសវិនិយោគដែលមានភាពងាយស្រួល និងមានហេដ្ឋារចនាសម្ព័ន្ធគាំទ្រដល់ការផលិត និងពាណិជ្ជកម្ម។

យោងតាម អនុក្រឹត្យលេខ ១៤៨ អនក្រ.បក ចុះខែធ្នូ ឆ្នាំ២០០៥ ស្ដីពីការបង្កើត និងគ្រប់គ្រងតំបន់សេដ្ឋកិច្ចពិសេស តំបន់នីមួយៗត្រូវមានមណ្ឌលផលិតកម្ម ហើយអាចបន្ថែមមណ្ឌលពាណិជ្ជកម្មសេរី មណ្ឌលសេវាកម្ម មណ្ឌលលំនៅដ្ឋាន និងមណ្ឌលទេសចរណ៍ផងដែរ។

អ្នកវិនិយោគត្រូវបានលើកទឹកចិត្តឱ្យវិនិយោគនៅក្នុងតំបន់សេដ្ឋកិច្ចពិសេស ដោយសារកត្តាចម្បងជាច្រើន ដូចជា ការលើកទឹកចិត្តផ្នែកច្បាប់ពីរាជរដ្ឋាភិបាល ភាពងាយស្រួលនៃនីតិវិធីការងារ និងទីតាំងយុទ្ធសាស្ត្រនៃហេដ្ឋារចនាសម្ព័ន្ធដឹកជញ្ជូន ដែលភ្ជាប់ទៅនឹងកំពង់ផែ ផ្លូវជាតិសំខាន់ៗ ផ្លូវល្បឿនលឿន ព្រលានយន្តហោះ និងច្រកទ្វារអន្តរជាតិ។ក្រៅពីនេះ តំបន់សេដ្ឋកិច្ចពិសេសក៏ផ្តល់នូវសេវាគាំទ្រចាំបាច់ជាច្រើន ដូចជា ការគ្រប់គ្រងអគារការិយាល័យ សេវារដ្ឋបាលនៅក្នុងតំបន់ មណ្ឌលលំនៅដ្ឋាន កន្លែងកីឡា កន្លែងព្យាបាល ប្រព័ន្ធផ្លូវថ្នល់ ទឹកស្អាត អគ្គិសនី ប្រព័ន្ធលូ ការគ្រប់គ្រងកាកសំណល់ បណ្តាញអ៊ីនធឺណិត និងទូរគមនាគមន៍ ព្រមទាំងប្រព័ន្ធការពារអគ្គីភ័យ និងសន្តិសុខ។

ក្នុងតំបន់នីមួយៗ ក៏មានការិយាល័យរដ្ឋបាលតំបន់សេដ្ឋកិច្ចពិសេស ដែលផ្តល់សេវា “one-stop service” ដល់វិនិយោគិន ដូចជា សេវារដ្ឋបាល បែបបទនាំចេញ-នាំចូល ពន្ធគយ និងសេវារបស់អាជ្ញាធរពាក់ព័ន្ធផ្សេងៗ ដើម្បីជួយសម្រួលនីតិវិធីពាណិជ្ជកម្មឱ្យកាន់តែឆាប់រហ័ស។

ជាពិសេស គម្រោងវិនិយោគដែលបានចុះបញ្ជីជាគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ជាមួយ ក្រុមប្រឹក្សាអភិវឌ្ឍន៍កម្ពុជា (CDC) នឹងទទួលបានអត្ថប្រយោជន៍ជាច្រើនពីគោលនយោបាយលើកទឹកចិត្តការវិនិយោគរបស់រាជរដ្ឋាភិបាល។

របាយការណ៍បានបង្ហាញថា គិតត្រឹមឆ្នាំ២០២៤ កម្ពុជាមានតំបន់សេដ្ឋកិច្ចពិសេសសរុបចំនួន៣០ ដែលមានទីតាំងនៅ ១២ រាជធានី-ខេត្ត។ ក្នុងនោះ ៩ តំបន់ស្ថិតនៅខេត្តស្វាយរៀង, ៥ នៅខេត្តព្រះសីហនុ, ៣នៅខេត្តបន្ទាយមានជ័យ កោះកុង និងកណ្តាល ខណៈ ១ តំបន់ស្ថិតនៅរាជធានីភ្នំពេញ ខេត្តពោធិ៍សាត់ ក្រចេះ កំពត កំពង់ស្ពឺ កំពង់ឆ្នាំង និងកំពង់ចាម៕