ឧបនាយករដ្ឋមន្រ្តី ស៊ុន ចាន់ថុល ដឹកនាំកិច្ចសន្ទនាលើកទី៤ រវាងរដ្ឋ និងវិស័យឯកជន កម្ពុជា-អាមេរិក!

(ភ្នំពេញ)៖ នារសៀលថ្ងៃពុធ ទី១១ ខែមីនា ឆ្នាំ២០២៦, ឯកឧត្តម ស៊ុន ចាន់ថុល ឧបនាយករដ្ឋមន្រ្តី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញដឹកនាំ កិច្ចសន្ទនាលើកទី៤ រវាងរដ្ឋ និងវិស័យឯកជន កម្ពុជា-សហរដ្ឋអាម៉េរិក ជាមួយលោកស្រី Bridgette L. Walker, ភារធារីស្ថានទូតសហរដ្ឋអាម៉េរិកប្រចាំកម្ពុជា។ កិច្ចសន្ទនានេះមានការចូលរួមពីឯកឧត្តម កែវ រតនៈ, រដ្ឋមន្ត្រីក្រសួងរ៉ែ និងថាមពល និងអនុប្រធានទី៣ ក្រុមប្រឹក្សាអភិវឌ្ឍន៍កម្ពុជា, ឯកឧត្តម អគ្គលេខាធិការ និង អគ្គលេខាធិការរង ក.អ.ក., លោក Casey Barnett, ប្រធានសភាពាណិជ្ជកម្មអាម៉េរិកនៅកម្ពុជា (AmCham Cambodia), ឯកឧត្តមលោកជំទាវ តំណាងក្រសួងស្ថាប័នពាក់ព័ន្ធ, តំណាង US-ABC, និងវិស័យឯកជន និងមន្ត្រីជំនាញជាច្រើន។

កិច្ចសន្ទនាលើកនេះមានគោលបំណងបង្ហាញពី ការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ចំពោះវិនិយោគិនអាមេរិក ដែលកំពុងវិនិយោគនៅប្រទេស និងការស្វែងរកដំណោះស្រាយសមស្របសម្រាប់បញ្ហាប្រឈមដែលកើតឡើង។ វេទិកានេះក៏មានសារៈសំខាន់ក្នុងការពង្រឹង និងជំរុញ កិច្ចសហប្រតិបត្តិការសេដ្ឋកិច្ច, ពាណិជ្ជកម្ម និងការវិនិយោគ រវាងកម្ពុជា និងសហរដ្ឋអាម៉េរិក។

នៅដំណើរកិច្ចនេះ, ឯកឧត្តមឧបនាយករដ្ឋមន្រ្តីបានស្វាគមន៍យ៉ាងកក់ក្តៅដល់លោកស្រីភារធារីស្ថានទូតអាមេរិក, តំណាងក្រសួង, ស្ថាប័ន និងវិស័យឯកជនអាមេរិកទាំងអស់។ លោកបានក៏បញ្ជាក់ថា កិច្ចសន្ទនានេះបង្ហាញពី ការប្តេជ្ញាចិត្តរួមគ្នាកសាងទំនាក់ទំនងរឹងមាំ រវាងរដ្ឋាភិបាល និងធុរកិច្ច និងជាសញ្ញាដៃគូយុទ្ធសាស្ត្ររវាងកម្ពុជា និងសហរដ្ឋអាមេរិក។

ការរៀបចំកិច្ចសន្ទនារវាងរដ្ឋ និងវិស័យឯកជនគឺជា យន្តការសំខាន់ក្នុងការទាក់ទង និងទទួលខុសត្រូវរួម ដែលធានាថាការវិនិយោគដែលមានស្រាប់នឹងបន្តរីកចម្រើន និងពង្រីកខ្លួនជាបន្តបន្ទាប់។ លោកឧបនាយករដ្ឋមន្រ្តីក៏បានផ្តល់បច្ចុប្បន្នភាពថ្មីៗ អំពី៖*ការអនុម័តគម្រោងវិនិយោគឆ្នាំ២០២៥*ស្ថានភាពពាណិជ្ជកម្មកម្ពុជា-អាមេរិកដែលកំពុងកើនឡើង*វឌ្ឍនភាពនៃការអនុវត្តកិច្ចព្រមព្រៀងពាណិជ្ជកម្មកម្ពុជា-អាមេរិក។

បន្ថែមពីនេះ, ឯកឧត្ដមឧបនាយករដ្ឋមន្រ្តីបានលើកឡើងពីគំនិតរៀបចំ ជំនួបអាហារពេលព្រឹកជាមួយសភាពាណិជ្ជកម្មអន្តរជាតិនានា ដើម្បីផ្តល់ឱកាសឲ្យវិនិយោគិនផ្លាស់ប្តូរព័ត៌មានជាមួយរាជរដ្ឋាភិបាលបានយ៉ាងញឹកញាប់ និងជិតស្និទ្ធ។ វេទិកានេះនឹងបម្រើជាវេទិកាបន្ថែមសម្រាប់ស្តាប់បញ្ហាប្រឈមថ្មីៗ និងរៀបចំសេចក្តីព្រាងសម្រាប់កិច្ចសន្ទនារវាងរដ្ឋ និងវិស័យឯកជនលើកក្រោយ។

លោកស្រីភារធារីបានបង្ហាញ សេចក្ដីសោមនស្សរីករាយ ក្នុងការសហការដឹកនាំកិច្ចសន្ទនានេះ និងសុឆន្ទៈក្នុងការស្វែងរកដំណោះស្រាយសមស្របសម្រាប់បញ្ហាប្រឈមរបស់វិនិយោគិនអាមេរិក ដើម្បី លើកកម្ពស់បរិយាសវិនិយោគ និងពង្រឹងវត្តមានសហគ្រាសអាមេរិកនៅកម្ពុជា។

តាមរយៈវេទិកានេះ, តំណាងវិនិយោគិនអាមេរិកបានបង្ហាញ សុទិដ្ឋិនិយមខ្ពស់ចំពោះការទទួលស្តាប់ និងពិភាក្សា, ជាពិសេសពីបទពិសោធន៍នៃការឆ្លើយតប និងដំណោះស្រាយក្នុងកិច្ចសន្ទនាពីលើកមុនៗ ដែលធានាថា កិច្ចសហប្រតិបត្តិការសេដ្ឋកិច្ច និងពាណិជ្ជកម្មនឹងបន្តកើនឡើងដោយមានការយកចិត្តទុកដាក់ពីរាជរដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា និងក្រសួងស្ថាប័នពាក់ព័ន្ធ៕