សម្ដេចតេជោ ហ៊ុន សែន ព្រមានពីហានិភ័យនៃការបង្កការបែងចែកសាសនា ក្រោយមានការជជែកវែកញែកលើមតិរបស់កន្និដ្ឋា

(ភ្នំពេញ)៖ ក្នុងប៉ុន្មានថ្ងៃចុងក្រោយនេះ សាធារណជនបានឮនិងឃើញការជជែកវែកញែកយ៉ាងច្រើនលើបណ្តាញសង្គម ទាក់ទងនឹងការបញ្ចេញមតិរបស់ក្មួយស្រីម្នាក់ឈ្មោះ កន្និដ្ឋា ដែលបានលើកឡើងអំពីស្ថានភាពពាក់ព័ន្ធនឹងបងប្អូនខ្មែរឥស្លាមនៅកម្ពុជា។ នេះជាសាររបស់សម្ដេចអគ្គមហាសេនាបតីតេជោ ហ៊ុន សែន នៅលើបណ្ដាញសង្គមហ្វេសប៊ុកដែលអង្គភាព The Mirror News  ទទួលបាននៅថ្ងៃនេះ។

សម្ដេចតេជោ ហ៊ុន សែន បានមានប្រសាសន៍ថា តាមពិតទៅ សម្ដេចមិនចង់ចូលរួមពាក់ព័ន្ធនឹងការជជែកលើបញ្ហានេះឡើយ។ ប៉ុន្តែប្រសិនបើមិនចេញមុខបញ្ជាក់ ឬទប់ស្កាត់ការយល់ច្រឡំទេ នោះអាចធ្វើឱ្យបញ្ហានេះ រីករាលដាលកាន់តែធំ និងបង្កផលប៉ះពាល់អវិជ្ជមានដល់សង្គមជាតិ។

សម្ដេចបានបញ្ជាក់ថា មតិដែលបានលើកឡើងថា សហរដ្ឋអាមេរិកអាចមកចាប់បងប្អូនខ្មែរឥស្លាមនៅកម្ពុជា ព្រោះការអនុវត្តសាសនាតាមនិកាយណាមួយ គឺមានលក្ខណៈដូចជាការគំរាមកំហែងលើពលរដ្ឋ នៃរដ្ឋអធិបតេយ្យមួយ។ សម្ដេចបានបន្ថែមថា សូម្បីតែរដ្ឋាភិបាលអាមេរិកផ្ទាល់ ក៏ប្រហែលជាមិនហ៊ាននិយាយពាក្យបែបនេះផង។

លើសពីនេះ សម្ដេចបានបង្ហាញការព្រួយបារម្ភថា ការលើកឡើងបែបនេះអាចបង្កគ្រោះថ្នាក់ធ្ងន់ធ្ងរ ដោយអាចនាំឲ្យមាន ការបែងចែកនិកាយក្នុងសាសនាឥស្លាម និងអាចបង្កការបែកបាក់រវាងសាសនាផ្សេងៗក្នុងសង្គមកម្ពុជាផងដែរ។

សម្ដេចតេជោបានគូសបញ្ជាក់ថា អ្វីដែលគួរឲ្យខ្លាចមិនមែនមានតែសង្គ្រាមអាវុធប៉ុណ្ណោះទេ ប៉ុន្តែ សង្គ្រាមសាសនា គឺជារឿងគ្រោះថ្នាក់ជាងគេ ព្រោះវាអាចបំបែកសង្គម និងបង្កជម្លោះយ៉ាងធ្ងន់ធ្ងរ។

សម្ដេចបានរំលឹកថា ក្នុងរយៈពេលជាង ៤៧ឆ្នាំនៃការចូលរួមកាន់អំណាចនៅកម្ពុជា សម្ដេចតែងខិតខំប្រឹងប្រែងធ្វើឱ្យមាន សុខដុមនីយកម្មជាតិសាសន៍ និងសាសនា ដើម្បីធានាថា ប្រទេសកម្ពុជា មានសន្តិភាព និងមិនមានជម្លោះជាតិសាសន៍ ឬសាសនានោះឡើយ។

សម្ដេចក៏បានអំពាវនាវឲ្យសាធារណជនប្រើប្រាស់ការបញ្ចេញមតិយ៉ាងប្រុងប្រយ័ត្ន ដើម្បីជៀសវាងការបង្កភាពយល់ច្រឡំ និងរក្សាភាពសុខដុមរមនាក្នុងសង្គមកម្ពុជា៕