អគ្គនាយកកិច្ចការបច្ចេកទេសចុះពិនិត្យវឌ្ឍនភាពការងារថែទាំប្រព័ន្ធធារាសាស្ត្រ ក្នុងភូមិសាស្ត្រខេត្តកំពង់ស្ពឺ និងខេត្តតាកែវ

(កំពង់ស្ពឺ-តាកែវ)៖ នាថ្ងៃអង្គារ ទី១០ ខែមីនា ឆ្នាំ២០២៦ លោក ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេស ក្នុងនាមតំណាងដ៏ខ្ពង់ខ្ពស់របស់លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស ចុះពិនិត្យ និងវាយតម្លៃវឌ្ឍនភាពគម្រោងការងារថែទាំជាប្រចាំ (ដំណាក់កាលទី១) និងការងារថែទាំខួបលើប្រព័ន្ធធារាសាស្ត្រសំខាន់ៗ ក្នុងភូមិសាស្ត្រខេត្តកំពង់ស្ពឺ និងខេត្តតាកែវ។

ក្នុងដំណើរបេសកកម្មនេះ លោកអគ្គនាយក និងក្រុមការងារបច្ចេកទេស បានចុះពិនិត្យផ្ទាល់លើវឌ្ឍនភាពគម្រោងប្រព័ន្ធធារាសាស្ត្រថែទាំខួប និងថែទាំជាប្រចាំ ចំនួន៤ទីតាំង រួមមាន៖

១. ប្រព័ន្ធធារាសាស្ត្រព្រៃអិដ្ឋ (ថែទាំខួប)៖ ការងារថែទាំប្រឡាយមេប្រវែង ៤ ៣២០ ម៉ែត្រ និងជួសជុលសំណង់សិល្បការ្យចំនួន ៩ កន្លែង (សំណង់បង្ហៀរ ទ្វារទឹក ស្ទាក់ទឹក និងលូ) ព្រមទាំងសាងសង់សំណង់លូមូលបន្ថែមចំនួន ៤ កន្លែង។

២. ប្រព័ន្ធធារាសាស្ត្រអាងទឹកខ្ពបត្របែក (ថែទាំជាប្រចាំ)៖ ការងារថែទាំប្រឡាយមេ (MC1) ប្រវែង ១៨ ០០០ ម៉ែត្រ និងសំណង់សិល្បការ្យសរុប ១០២ កន្លែង (រួមមានសំណង់ទ្វារទឹកស្វ័យប្រវត្តិ សំណង់យកទឹក សំណង់ចែកចាយទឹក ស្ទាក់ទឹក និងស្ពាន)។

៣. ប្រព័ន្ធធារាសាស្ត្រហនុមាន (ថែទាំជាប្រចាំ)៖ ការងារថែទាំប្រឡាយមេចំនួន ៤ ខ្សែ ប្រវែងសរុប ២៨ ៥៤០ ម៉ែត្រ និងសំណង់សិល្បការ្យសរុប ៩២ កន្លែង (រួមមានសំណង់ស្ទាក់ទឹក សំណង់ចែកចាយទឹក ស្ពានឆ្លងកាត់ និងលូដោះទឹក)។

៤. ប្រព័ន្ធធារាសាស្ត្រប្រឡាយមេត្នោត (ថែទាំខួប)៖ ការងារថែទាំប្រឡាយមេ និងប្រឡាយរងចំនួន ៣ ខ្សែ ប្រវែងសរុប ៥ ០៧០ ម៉ែត្រ ព្រមទាំងជួសជុលសំណង់សិល្បការ្យចំនួន ៥ កន្លែង និងសាងសង់សំណង់ថ្មីបន្ថែមចំនួន ២ កន្លែង។

លោកអគ្គនាយក បានវាយតម្លៃខ្ពស់ចំពោះវឌ្ឍនភាពការងារដែលសម្រេចបាន និងបានណែនាំដល់ក្រុមការងារអនុវត្តគម្រោង ត្រូវបន្តយកចិត្តទុកដាក់ខ្ពស់លើបទដ្ឋានបច្ចេកទេស ដើម្បីធានាឱ្យបាននូវគុណភាព សុវត្ថិភាព និងសោភ័ណភាពសំណង់។ ទន្ទឹមនឹងនេះ ឯកឧត្តមបានសង្កត់ធ្ងន់លើការជំរុញល្បឿនអនុវត្តការងារឱ្យទាន់តាមផែនការគ្រោងទុក សំដៅធានាប្រសិទ្ធភាពនៃការផ្គត់ផ្គង់ទឹកស្រោចស្រពជូនប្រជាពលរដ្ឋឱ្យបានទាន់ពេលវេលា និងមាននិរន្តរភាព ឆ្លើយតបទៅនឹងតម្រូវការជាក់ស្តែងក្នុងមូលដ្ឋាន៕