នៅច្រកទ្វារព្រំដែនអន្តរជាតិភ្នំដិនខេត្តតាកែវកំពុងធំក្លិនមិនស្រួល ពាក់ព័ន្ធករណីដឹកជញ្ជូនទំនិញគេចពន្ធ
(តាកែវ)៖ មានប្រភពបានខ្សឹបឱ្យអ្នកសារព័ត៌មានដឹងថា មានមន្ត្រីថ្នាក់ក្រោមមួយចំនួនពុំសូវសប្បាយចិត្តជាមួយការដឹកនាំរបស់នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិភ្នំដិនឈ្មោះ ឈួន សុវណ្ណនរា ដែលទើបត្រូវបានប្រកាសចូលកាន់តំណែងកាលពីថ្ងៃទី៣១ ខែតុលា ឆ្នាំ២០២៥នោះទេ ព្រោះតែលោកបានក្តោប ក៏ដូចជាប្រមូលសេដ្ឋកិច្ច និងបើកដៃឱ្យឈ្មួញទាំងធំទាំងតូចសម្រុកដឹកជញ្ជូនទំនិញគេចពន្ធ ទំនិញខ្លះបង់ពន្ធមិនគ្រប់ និងមានទំនិញខុសច្បាប់មួយចំនួនដឹកយ៉ាងគំហុកទាំងយប់ទាំងថ្ងៃ។
ប្រភពបន្តថា ឈ្មួញមកពីខេត្តនានា និងអាជីវករបានត្អូញត្អែរថា លោកវរសេនីយ៍ឯក ឈួន សុវណ្ណនរា ប្រមូលលុយតាមរបៀបពុករលួយបានយ៉ាងច្រើនសន្ធឹកសន្ធាប់ ចាប់តាំងពីមកកាន់តំណែង រហូតដល់បច្ចុប្បន្ន ហើយគ្មានឈ្មួញណាហ៊ានរំលងលោកនោះឡើយ។
ប្រភពផ្សេងទៀតក៏បានត្អូញត្អែរថា ពួកគាត់បង់លុយតាមការកំណត់របស់លោកនាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិភ្នំដិន ទើបដឹកជញ្ជូនទំនិញឆ្លងដែនចេញពីប្រទេសវៀតណាមចូលមកប្រទេសខ្មែរ បានដោយរលូនហើយគ្មានឈ្មួញណាហ៊ានតវ៉ាជាមួយលោកបានឡើយ។ ប្រភពបន្តថា សកម្មភាពក្រុមឈ្មួញនាំចូលទំនិញគេចពន្ធទំនិញបង់ពន្ធមិនគ្រប់ និងទំនិញខុសច្បាប់ចេញពីប្រទេសវៀតណាមចូលមកប្រទេសខ្មែរយ៉ាងគំហុកទាំងយប់ទាំងថ្ងៃ គឺជាប្រភពចំណូលដ៏សំខាន់របស់នាយប៉ុស្តិ៍នគរបាលច្រកទ្វារអន្តរជាតិភ្នំដិន និងបក្ខពួកធ្វើមានធ្វើបានយ៉ាងសុខស្រួល។ ដោយហេតុថា ប្រសិនបើឈ្មួញមិនបង់លុយលើតុ ក្រោមតុ តាមការកំណត់របស់លោក គឺឈ្មួញនិងអាជីវករមិនអាចដឹកជញ្ជូនទំនិញចេញពីប្រទេសវៀតណាមចូលមកប្រទេសខ្មែរបានឡើយ។
ប្រភពផ្សេងទៀតបានបង្ហើបថា ដោយសារអាងមានខ្នងបង្អែករឹងមាំ នៅក្នុងអគ្គនាយកដ្ឋានអន្តោប្រវេសន៍ ទើបលោកហ៊ានប្រើតួនាទី និងអំណាចបើកដៃឱ្យឈ្មួញនាំទំនិញចេញពីប្រទេសវៀតណាមចូលមកប្រទេសខ្មែរដើម្បីប្រមូលលុយតាមរបៀបពុករលួយ។
ហេតុនេះហើយ សូមថ្នាក់ដឹកនាំក្រសួងមហាផ្ទៃ ជាពិសេសលោកឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋាននគរបាលអន្តោប្រវេសន៍ គួរដាក់មន្រ្តីជំនាញចុះសិក្សាស្រាវជ្រាវនូវភាពមិនប្រក្រតីរបស់លោកវរសេនីយ៍ឯក ឈួន សុវណ្ណនរា នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិភ្នំដិននេះផង។
ជុំវិញករណីខាងលើនេះ លោក ងួន ឌីណា ប្រធានគណៈបញ្ជាការឯកភាពស្រុកគិរីវង់ និងជាអភិបាលនៃគណៈអភិបាលស្រុកបានឱ្យអង្គភាព The Mirror News ដឹងថា ពាក់់ព័ន្ធការងារច្រកអន្តរជាតិភ្នំឌិនគឺមានអង្គភាពការិយាល័យជំនាញនៅហ្នឹង ពាក់ព័ន្ធការងារបង់ពន្ធ ការងារសណ្ដាប់ធ្នាប់ និងពាក់ព័ន្ធការគ្រប់គ្រងជនអន្តោប្រវេសន៍ ជារួមការងាររបស់សមត្ថកិច្ចនៅហ្នឹង ចំពោះអាជ្ញាធរវិញគឺមិនបានជ្រៀតជ្រែកទៅការងារផ្ទៃក្នុងនោះទេ។
ទាក់ទិនករណីខាងលើនេះដែរ អង្គភាព The Mirror News ពុំអាចសុំការបំភ្លឺពីលោក ឈួន សុវណ្ណនរា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិភ្នំដិនបាននោះទេ ដោយការព្យាយាមហៅទូរសព្ទទៅកាន់លោកចូល តែទំនាក់ទំនងគ្នាបាន។ម្យ៉ាងទៀត The Mirror News បានព្យាយាមទំនាក់ទំនងតាមប្រព័ន្ធតេលេក្រាមលោកបានចូលមើលហើយ ប៉ុន្តែលោកមិនបានឆ្លើយតបឬបំភ្លឺមកកាន់អង្គភាពយើងនោះទេ៕