ក្រុមប៉ូលិសចាប់ឃាត់ខ្លួនម្ចាស់ទីតាំងហាងបញ្ចាំយីហោ «និមល» នៅស្រុកត្រាំកក់ ខេត្តតាកែវ បន្ទាប់ពីលក់ម៉ូតូមិនប្រក្រតីឱ្យប្រជាពលរដ្ឋ
(តាកែវ)៖ កម្លាំងនគរបាលស្រុកត្រាំកក់បានចាប់ឃាត់ខ្លួនស្ដ្រីម្ចាស់ទីតាំងបញ្ចាំមួយកន្លែងយីហោ «និមល» នៅថ្ងៃទី៤ ខែមីនា ឆ្នាំ២០២៦នេះ បន្ទាប់ពីលក់ម៉ូតូមិនប្រក្រតីឲ្យប្រជាពលរដ្ឋ ដោយម៉ូតូនោះមានកាតគ្រី និងផ្លាកលេខចំនួន២ (ក្លែងក្លាយ)។
ជនរងគ្រោះឈ្មោះ អ៊ុំ ផាន្នី មានស្រុកកំណើតនៅភូមិពាម ឃុំកំពង់រាប ស្រុកព្រៃកប្បាស ខេត្តតាកែវ បានបញ្ជាក់ថា គាត់បានទិញម៉ូតូពីហាង «និមល» កាលពីនៅថ្ងៃទី១៣ ខែកុម្ភៈ ឆ្នាំ២០២៦ ហើយនៅពេលបានផ្លាកលេខ និងកាតគ្រី កន្លែងលក់នោះ បានប្រគល់ឲ្យគាត់យកទៅកឹបដោយខ្លួនឯង។ ខណៈបុរសនោះ បានយកទៅក្រុមហ៊ុនហុងដា ២៧១ កឹបឲ្យ តែគេមិនព្រមកឹបឲ្យនោះឡើយ ហើយមិនបានប្រាប់ថា មានបញ្ហាអ្វីនោះដែរ។ បុរសនោះក៏បន្តយកទៅជាងធម្មតាទើបគេកឹបលេខឲ្យ ដោយជនរងគ្រោះមិនអស់ចិត្ត ក៏បន្តទៅសួរជំនាញ និងមន្ទីរសាធារណៈការ និងដឹកជញ្ជូនរាជធានីភ្នំពេញ។ ពេលនោះ មន្ដ្រីជំនាញបញ្ជាក់ថា ផ្លាកលេខ និងកាតគ្រី គឺក្លែងក្លាយ ដោយម៉ូតូនោះ មានផ្លាកលេខដើមខេត្តកំពង់ស្ពឺ។
បច្ចុប្បន្ន សមត្ថកិច្ចជំនាញ នៃអធិការដ្ឋាននគរបាលស្រុកត្រាំកក់ កំពុងធ្វើការសួរនាំ និងចាត់ការបន្ដតាមនីតិវិធី៕
