ឧបនាយករដ្ឋមន្រ្តី ស៊ុន ចាន់ថុល ទទួលជួបសម្តែងការគួរសម និងពិភាក្សាការងារជាមួយឯកឧត្តម កៅ គឹមហួន អគ្គលេខាធិការអាស៊ាន

(ភ្នំពេញ)៖ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នារសៀលថ្ងៃអង្គារ ទី៣ ខែមីនា ឆ្នាំ២០២៦ បានទទួលជួប ឯកឧត្តម កៅ គឹមហួន អគ្គលេខាធិការអាស៊ាន ក្នុងជំនួបសម្ដែងការគួរសម និងពិភាក្សាការងារ។

ក្នុងកិច្ចប្រជុំនេះ ឯកឧត្តម កៅ គឹមហួន អគ្គលេខាធិការអាស៊ានបានសម្តែងការអបអរសាទរដល់រាជរដ្ឋាភិបាលកម្ពុជា ដែលសម្រេចបានសមិទ្ធផលគួរឱ្យកត់សម្គាល់កាលពីឆ្នាំកន្លងមក រួមមាន ការសម្ពោធដាក់ឱ្យប្រើប្រាស់ជាផ្លូវការនូវអាកាសយានដ្ឋានអន្តរជាតិតេជោ ការកើនឡើងនូវការបណ្តាក់ទុនវិនិយោគ និងការកើនឡើងនូវចំនួនភ្ញៀវទេសចរណ៍ចូលមកប្រទេសកម្ពុជា។ ក្នុងឱកាសនេះ ឯកឧត្តមអគ្គលេខាធិការអាស៊ានក៏បានជម្រាបជូនអំពីការដាក់ចេញនូវផែនការយុទ្ធសាស្ត្រតភ្ជាប់អាស៊ាន ២០២៦-២០៣៥ (ASEAN Connectivity Strategic Plan 2026-2035)។

ឯកឧត្តមឧបនាយករដ្ឋមន្ត្រី ស៊ុន ចាន់ថុល ក្នុងឱកាសនេះបានជម្រាបជូន ឯកឧត្តមអគ្គលេខាធិការអាស៊ានអំពីការចូលរួមយ៉ាងសកម្មរបស់កម្ពុជា លើផែនការតភ្ជាប់របស់អាស៊ាននាពេលកន្លងមក តាមរយៈការកសាងហេដ្ឋារចនាសម្ព័ន្ធគន្លឹះស្របតាមទិសដៅនេះនៅក្នុងប្រទេសកម្ពុជា សំដៅធានាឱ្យបាននូវរំហូរពាណិជ្ជកម្មដោយរលូននៅក្នុងតំបន់។

បន្ថែមពីនេះ ឯកឧត្តមឧបនាយករដ្ឋមន្ត្រីក៏បានលើកឡើងពីផែនការបេសកកម្មគោះទ្វារវិនិយោគិនអន្តរជាតិ នៅតាមបណ្តាប្រទេសមួយចំនួននាពេលខាងមុខផងដែរ៕