បុរសម្នាក់បើកបរបំពានភ្លើងស្តុបពណ៌ក្រហម ជ្រុលទៅបុករថយន្តកុងទីន័របណ្ដាលឱ្យរបួសធ្ងន់ធ្ងរ ខណៈតៃកុងឡានបើករត់ ត្រូវបានកម្លាំងប៉ូលិសចាប់ឃាត់ខ្លួន!

(កណ្ដាល)៖ បុរសម្នាក់រងរបួសធ្ងន់ធ្ងរក្នុងហេតុការណ៍គ្រោះថ្នាក់ចរាចរណ៍រវាងម៉ូតូ ជាមួយរថយន្តកុងទីន័រ កាលពីវេលាម៉ោង២៣៖៤៨នាទី ថ្ងៃអង្គារ ទី២៤ ខែកុម្ភៈ ឆ្នាំ២០២៦ នៅចំណុចខាងមុខភ្លើងស្តុបព្រែកហូរ នៅលើកំណាត់ផ្លូវជាតិលេខ២ កែង ផ្លូវលេខ ១១៥ ស្ថិតនៅភូមិតាក្តុលត្បូង សង្កាត់តាក្ដុល ក្រុងតាខ្មៅ ខេត្តកណ្ដាល។ នេះបើតាមប្រភពព័ត៌មានដែលអង្គភាព​ The Mirror News ទទួលបាននៅថ្ងៃទី២៥ ខែកុម្ភៈ ឆ្នាំ២០២៦នេះ។

ប្រភពពីមន្ត្រីនគរបាលក្រុងតាខ្មៅបានឱ្យដឹងទៀតថា កម្លាំងជំនាញបានឃាត់ខ្លួនអ្នកបើកបររថយន្តម្នាក់ឈ្មោះ ជីម ភត្រា ភេទប្រុស អាយុ ៤៣ឆ្នាំ មានទីលំនៅភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម ដោយបានធ្វើតេស្តទឹកនោម ជាលទ្ធផល អវិជ្ជមាន(-) និងលទ្ធផលជាតិស្រវឹង 0,00mg/L។

ប្រភពបន្តឱ្យដឹងថា នៅវេលាម៉ោង ថ្ងៃ ខែ ឆ្នាំ កើតហេតុខាងលើមានម៉ូតូមួយគ្រឿងម៉ាក HONDA DREAM ពណ៌ខ្មៅ ពាក់ផ្លាកលេខ កណ្ដាល1AT-8361 អ្នកបើកបរមិនទាន់ស្គាល់ឈ្មោះ ភេទប្រុស អាយុប្រហែល ៣១ឆ្នាំ បើកបរមិនពាក់មួកសុវត្ថិភាព តាមផ្លូវជាតិលេខ២ មានទិសដៅពី ត្បូង ទៅជើង ពេលបើកមកដល់កន្លែងកើតហេតុខាងលើ មិនឈប់ភ្លើងស្តុបពណ៌ក្រហម ក៏បានបុកជាមួយរថយន្តមួយគ្រឿងម៉ាក HYUNDAI ប្រភេទក្បាលសណ្ដោង ពណ៌ខៀវ ពាក់ផ្លាកលេខ ព្រះសីហនុ3A-2138 និងមានសណ្ដោងសឺមីរ៉ឺម៉ក ពណ៌បៃតង ពាក់ផ្លាកលេខ ភ្នំពេញ4A-6698 បើកបរដោយឈ្មោះ ជីម ភត្រា ភេទប្រុស អាយុ ៤៣ឆ្នាំ មានទីលំនៅភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម បើកបររថយន្តតាមផ្លូវលេខ១១៥ មានទិសដៅពីកើតទៅលិចបណ្ដាលឲ្យអ្នកបើកម៉ូតូរងរបួសធ្ងន់ ត្រូវបានរថយន្តសង្រ្គោះដឹកយកទៅសង្រ្គោះនៅមន្ទីរពេទ្យជ័យជំនះ។ ចំណែករថយន្តបាន បើករត់គេចចេញពីកន្លែងកើតហេតុ រហូតដល់ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក៏ត្រូវបានប្រជាពលរដ្ឋជួយឃាត់រថយន្ត និងអ្នកបើកបរ ហើយបានរាយការណ៍ជូនសមត្ថកិច្ចប៉ុស្ដិ៍ចោមចៅទី១ ជួយអន្តរាគមន៍ និងបានប្រគល់ជូនមកផ្នែកជំនាញចរាចរណ៍ក្រុងតាខ្មៅដើម្បីចាត់ការតាម នីតិវិធី។

ប្រភពបន្តទៀតថា ករណីគ្រោះថ្នាក់ចរាចរណ៍ខាងលើមានការខូចខាតម៉ូតូចំនួន១គ្រឿងធ្ងន់និងរថយន្តចំនួន ០១គ្រឿង ស្រាល។ ចំពោះមធ្យោបាយពាក់ព័ន្ធខាងលើត្រូវបានយកមករក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់។

ប្រភពបានបញ្ជាក់ឱ្យដឹងទៀតថា ចំពោះមូលហេតុបឋមករណីខាងលើ បណ្ដាលមកពី អ្នកបើកបរម៉ូតូ បើកបរមិនគោរពភ្លើងស្តុបពណ៌ក្រហម ទើបបណ្ដាលឲ្យមានគ្រោះថ្នាក់កើតឡើង។​ រីឯអ្នកបើកបររថយន្ត បើករថយន្តរត់គេចចេញពីកន្លែងកើតហេតុ៕