រដ្ឋមន្ត្រី ឈាង រ៉ា៖ យើងត្រូវនៅឱ្យជាប់ជាមួយក្តីសង្ឃឹម! 

(កំពង់ស្ពឺ)៖ ឯកឧត្ដមសាស្រ្ដាចារ្យ ឈាង រ៉ា បានគូសបញ្ជាក់ថា «យើងត្រូវនៅអោយជាប់ជាមួយក្តីសង្ឃឹម យើងនឹងមិនខ្សោយ ហើយយើងនឹងកាន់តែបន្តឆ្ពោះទៅមុខក្នុងល្បឿនមួយ ដែលពេលនោះសុខាភិបាលខេត្ត នឹងមិនមានគម្លាតពីសុខាភិបាលរាជធានី។ មន្រ្តីសុខាភិបាល បានលះបង់ក្នុងការបំពេញការងារ ដើម្បីកសាងប្រព័ន្ធសុខាភិបាលកម្ពុជាមួយ រីកចម្រើនមានគុណភាព នឹងប្រើប្រាស់ដោយប្រជាពលរដ្ឋ។ ប្រទេសយើងតូច គ្រាន់តែជាចំនួន តែមិនតូចជាគុណភាពនោះទេ ខ្ញុំលើកទឹកចិត្តឱ្យខិតខំក្នុងវិជ្ជាជីវៈបន្ថែមទៀត។»។

ការថ្លែងរបស់ឯកឧត្ដមសាស្រ្ដាចារ្យ ឈាង រ៉ា រដ្ឋមន្រ្ដីក្រសួងសុខាភិបាលក្នុងឱកាសអញ្ជើញជាអធិបតីភាពក្នុងពិធីបិទសន្និបាតបូកសរុបការងារសុខាភិបាលឆ្នាំ២០២៥ និងលើកទិសដៅឆ្នាំ២០២៦ របស់មន្ទីរសុខាភិបាលនៃរដ្ឋបាលខេត្តកំពង់ស្ពឺ កាលពីព្រឹកថ្ងៃទី២៤ ខែកុម្ភៈ ឆ្នាំ២០២៦។  ពិធីនេះមានការអញ្ជើញចូលរួមពី ឯកឧត្តម លោកជំទាវ ថ្នាក់ដឹកនាំក្រសួង អភិបាលរងនៃគណៈអភិបាលខេត្ត លោក លោកស្រី ថ្នាក់ដឹកនាំនិងមន្រ្តី បុគ្គលិក របស់មន្ទីរសុខាភិបាលនៃរដ្ឋបាលខេត្តកំពង់ស្ពឺ។

ឯកឧត្តមរដ្ឋមន្ត្រីបានសម្តែងនូវការកោតសរសើរ និងថ្លែងអំណរគុណ ចំពោះថ្នាក់ដឹកនាំ មន្រ្តីរាជការ និងបុគ្គលិកទាំងអស់ នៃមន្ទីរសុខាភិបាលកំពង់ស្ពឺ ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងការបម្រើសេវាសុខាភិបាលជូនប្រជាពលរដ្ឋ ដោយស្មារតីទទួលខុសត្រូវខ្ពស់ ឆន្ទៈ ក្រមសីលធម៌វិជ្ជាជីវៈ  និងប្រកបដោយគុណភាព ប្រសិទ្ធភាព សុវត្ថិភាព ស័ក្តិសិទ្ធភាព និងសមធម៌។ឯកឧត្តមបានវាយតម្លៃខ្ពស់ពីការវិវត្តន៍ថ្មីៗជាច្រើន ទាំងលើការងារកសាងហេដ្ឋារចនាសម្ព័ន្ធ ដូចជាការសាងសង់ និងជួសជុលបន្ថែមនូវអគារផ្សេងៗ ការកសាងសមត្ថភាពមន្រ្តី និងបុគ្គលិក ឱ្យកាន់តែមានសមត្ថភាពខ្ពស់ ស្របតាមបទដ្ឋានវិទ្យាសាស្រ្ត និងស្តង់ដាជាតិ ប្រកបដោយនវានុវត្តន៍។

ឯកឧត្តមសាស្រ្តាចារ្យបានសំដែងនូវការកោតសរសើរ និងវាយតម្លៃខ្ពស់ដល់មន្រ្តីសុខាភិបាលទាំងអស់ ដែលមានទឹកចិត្តមុះមុត ក្នុងការជួយអន្តរាគមន៍សុខភាពបន្ទាន់ៗ ពេលមានកាឈ្លានពានតាមព្រំដែន ដល់ខេត្តដែលមានតម្រូវការជំនួយជាចាំបាច់ក្នុងការជួយសង្ក្រោះវីរយុទ្ធជន និងប្រជាជនភៀសសឹក។ឯក

ឯកឧត្តមសាស្រ្តាចារ្យរដ្ឋមន្រ្តីបានផ្ដល់នូវអនុសាសន៍ជូនដល់សមាជិក សមាជិកា នៃអង្គសន្និបាតទាំងមូលយកទៅពិចារណា ក្នុងការរៀបចំផែនការ និងទិសដៅសម្រាប់ការងារនៅក្នុងឆ្នាំ២០២៦ និងឆ្នាំបន្តបន្ទាប់ណរួមមាន៖ *១.បន្តពង្រឹង និងពង្រីក ហេដ្ឋារចនាសម្ព័ន្ធ មន្ទីរពេទ្យខេត្ត ស្រុក និងមណ្ឌលសុខភាព បុស្តិ៍សុខភាព។ *២.បន្តលើកកម្ពស់ និងបណ្តុះបណ្តាលសមត្ថភាពបន្ថែមទៀតដល់មន្ត្រី *៣.ពង្រឹងសាមគ្គីភាព វិន័យក្នុងពេលបំពេញការងារ និងការផ្តល់សេវា ២៤ម៉ោង លើ២៤ម៉ោង និង៧ថ្ងៃ/សប្តាហ៍។ *៤.ពង្រឹងការលើកកម្ពស់គុណភាព សុវត្ថិភាព នៃសេវា ដើម្បីបង្កើនទំនុកចិត្តពីប្រជាពលរដ្ឋ។ *៥.ពង្រឹងលើការធ្វើបដិសណ្ឋារកិច្ច ក្នុងការផ្តល់សេវាថែទាំដល់អ្នកជំងឺ។*៦.ពង្រឹងប្រព័ន្ធព័ត៌មាន តាមដាន និងវាយតម្លៃ ក្នុងយន្តការសុខភាពឌីជីថលលូបនីយកម្ម និងការវាយតម្លៃឱ្យបានជាប្រចាំក្នុងមណ្ឌលសុខភាព និងមន្ទីរពេទ្យបង្អែក។ *៧.បន្តរួមគ្នាដោះស្រាយបញ្ហាក្នុងមូលដ្ឋានរបស់ខ្លួនឱ្យបានច្រើន និងប្រសិទ្ធភាព ជាពិសេសប្រជាពលរដ្ឋដែលមានការលំបាក និងខ្វះធនធាន។ *៨.បន្តធ្វើការសហការឱ្យបានខ្ពស់ជាមួយអជ្ញាធរ និងដៃគូ ក្នុងអភិវឌ្ឍន៍វិស័យសុខាភិបាល ពិសេសការពង្រីកសេវានៅតាមសហគមន៍ *៩.មណ្ឌលសុខភាព មន្ទីរពេទ្យបង្អែក ត្រូវបន្តប្រើប្រាស់ប្រព័ន្ធប្រមូលទិន្នន័យ ជាពិសេសទាក់ទងនឹងព័ត៌មានត្រឡប់របស់អ្នកជំងឺ និងទិន្នន័យសម្រាប់ធ្វើការតាមដាននិងវាយតម្លៃគុណភាពសេវារបស់មន្ទីរពេទ្យ ដើម្បីរៀបចំការអភិវឌ្ឍន៍របស់ខ្លួនទៅមុខ។ *១០.ពង្រឹងការងារនិយតកម្មសុខាភិបាលឯកជន និងក្រមសីលធម៌គណៈវិជ្ជាជីវៈវេជ្ជសាស្រ្តទាំង៥។

ឯកឧត្តរដ្ឋមន្រ្តី ឈាង​ រ៉ា បានសម្តែងពីជំនឿចិត្តថា មន្រ្តីសុខាភិបាលទាំងអស់ នឹងចែករំលែកផ្តល់នូវចំណេះដឹង ជំនាញ និងបទពិសោធន៍ថ្មីៗ ដែលបានមកពីការអនុវត្តជាក់ស្តែង របស់សមាជិក សមាជិកានៃអង្គសន្និបាតទាំងមូល យកទៅប្រើប្រាស់ជាចំណេះដឹងក្នុងការកែលម្អ និងរៀបចំផែនការការងាររបស់មន្ទីរសុខាភិបាល ការិយាល័យសុខាភិបាលស្រុកប្រតិបត្តិ មន្ទីរពេទ្យ និងមណ្ឌលសុខភាព សម្រាប់ឆ្នាំ២០២៦ និងឆ្នាំបន្ត ឱ្យបានកាន់តែល្អប្រសើរថែមទៀត៕