លោកស្នងការ ហេង សុផល៖ គ្មានគោលការណ៍ណែនាំពីថ្នាក់ដឹកនាំ ដើម្បីឲ្យដាក់គោលដៅលើផ្លូវលំនោះទេ 

(កំពង់ធំ)៖ ក្រោយពីមហាជននៅលើបណ្ដាញសង្គមចែកចាយរូបភាពនគរបាលចរាចរណ៍នៅស្រុកសន្ទុកចុះរឹតបន្តឹងច្បាប់ចរាចរណ៍ នៅចំណុចភូមិវាំងខាងជើង ឃុំតាំងក្រសាំង ស្រុកសន្ទុក ខេត្តកំពង់ធំ ចំណុចលើផ្លូវលំ កាលពីថ្ងៃទី២៣ ខែកុម្ភៈ ឆ្នាំ២០២៦ លោកស្នងការ ហេង សុផល បានបញ្ជាឲ្យមន្ដ្រីនគរបាលចរាចរណ៍បញ្ឈប់សកម្មភាពដាក់គោលដៅនៅលើផ្លូវលំ (ផ្លូវដី) បើទោះបីគោលដៅនោះគ្រាន់តែអប់រំណែនាំពលរដ្ឋ មិនផាកពិន័យក៏ដោយ។ លោកស្នងការបញ្ជាក់ច្បាស់ៗថា គ្មានគោលការណ៍ណែនាំពីថ្នាក់ដឹកនាំ ដើម្បីឲ្យដាក់គោលដៅលើផ្លូវលំនោះទេ។

បើតាមសេចក្ដីបំភ្លឺព័ត៌មានរបស់អ្នកនាំពាក្យស្នងការដ្ឋាននគរបាលខេត្តកំពង់ធំ នៅថ្ងៃទី២៤ ខែកុម្ភៈ ឆ្នាំ២០២៦នេះ បានបញ្ជាក់ថា កម្លាំងជំនាញសណ្តាប់ធ្នាប់ស្រុកសន្ទុក ពិតជាបានដាក់គោលដៅត្រួតពិនិត្យផ្សព្វផ្សាយ អប់រំ ពិតប្រាកដមែន តែពុំបានផាកពិន័យដល់អ្នកបើកបរមធ្យោបាយទាំងអស់នោះទ គ្រាន់តែបានធ្វើការអប់រំណែនាំតែប៉ុណ្ណោះ។ ហើយក៏គ្មានគោលការណ៍ពីថ្នាក់ដឹកនាំឲ្យចុះរឹតបន្តឹង លើផ្លូវលំ (ផ្លូវដី) នោះដែរ។

ដូច្នេះស្នងការនគរបាលខេត្តបានធ្វើការណែនាំបន្ថែមដល់កម្លាំងជំនាញសណ្តាប់ធ្នាប់ ចំពោះការរឹតបន្តឹងច្បាប់ចរាចរណ៍ឲ្យអនុវត្តនៅតាមផ្លូវកៅស៊ូ និងផ្លូវជាតិតែប៉ុណ្ណោះ៕