ប្អូនប្រុសបង្កើ់តទាញពូថៅកាប់បងស្រីនិងក្មួយបង្កើតឱ្យស្លាប់ទាំង២នាក់ នៅខេត្តតាកែវ

(ខេត្តតាកែវ)៖ បុរសម្នាក់បានទាញពូថៅកាប់បងស្រីបង្កើត និងក្មួយប្រុសបង្កើតរបស់ខ្លួនឯង បណ្ដាលឲ្យស្លាប់ទាំង២នាក់ ម្ដាយនិងកូន កាលពីយប់ថ្ងៃទី១៧ ខែកុម្ភៈ ឆ្នាំ២០២៦ នៅភូមិត្រាវអែម ឃុំពពេល ស្រុកត្រាំកក់ ខេត្តតាកែវ។ នេះបើតាមប្រភពព័ត៌មានដែលអង្គភាព The Mirror News ទទួលបាននៅថ្ងៃទី១៨ ខែកុម្ភៈ ឆ្នាំ២០២៦នេះ។

ប្រភពបានបន្តថា ជនដៃដល់ដែលបានកាប់ទៅលើម្ដាយនិងកូនបណ្ដាលឲ្យស្លាប់យ៉ាងរន្ធត់នេះ ត្រូវជាប្អូនប្រុសបង្កើត ដែលបានប្រើប្រាស់ពូថៅដៃកាប់ទៅលើបងស្រីបង្កើត និងក្មួយប្រុសរបស់ខ្លួនឯងបណ្ដាលឱ្យស្លាប់ទាំង២នាក់ ម្ដាយកូន យ៉ាងអាណោចអាធ័មបំផុត។

ប្រភពបានបញ្ជាក់ថា មូលហេតុគឺបណ្ដាលមកពីការស្អប់ និងធ្លាប់មានទំនាស់ពាក្យសំដីបន្តិចបន្តួច ហើយជនដៃដល់ធ្លាប់បោកទូរស័ព្ទដៃបងស្រីចោលទៀតផង។ ក្រោយពេលធ្វើសកម្មភាពរួចជនដៃដល់បានជិះម៉ូតូរត់គេចខ្លួនបាត់ស្រមោលពីកន្លែងកើតហេតុតែម្ដង។

បើតាមការបញ្ជាក់ពីសាច់ញាតិគ្រួសារសព ក្រោយពីសមត្ថកិច្ចជំនាញបានចុះធ្វើការត្រួតពិនិត្យនិងធ្វើកោសល្យវិច្ច័យរួចរាល់ហើយ ទើបអនុញ្ញាតឲ្យលើកសពដាក់លើគ្រែដើម្បីតម្កល់ធ្វើបុណ្យតាមប្រពៃណីខ្មែរ និងកំពុងតាមកំណត់មុខសញ្ញាជនដៃដល់ ដើម្បីយកមកធ្វើការអនុវត្តតាមមតិវិធីច្បាប់។

ស្ថានភាពបច្ចុប្បន្ន៖ សពទាំង២នាក់ម្ដាយកូន ត្រូវបានសាច់ញាតិរៀបចំធ្វើបុណ្យតាមប្រពៃណី៕