លោក ជួន កក្កដា៖ បើផ្អែកតាមទស្សនៈអប់រំទំនើប ច្បាប់ និងសីលធម៌វិជ្ជាជីវៈ គ្រូមិនគួរវាយសិស្សឡើយ
(ភ្នំពេញ)៖ លោក ជួន កក្កដា អនុរដ្ឋលេខាធិការ នៃក្រសួងធម្មការនិងសាសនានៅលើបណ្ដាញសង្គមហ្វេសប៊ុកនាព្រឹកថ្ងៃទី១៨ ខែកុម្ភៈ ឆ្នាំ២០២៦នេះ បានបង្ហោះសារចែករំលែកថា បើផ្អែកតាមទស្សនៈអប់រំទំនើប ច្បាប់ និងសីលធម៌វិជ្ជាជីវៈ គ្រូមិនគួរវាយសិស្សឡើយ។
នៅលើបណ្ដាញសង្គម លោកអនុរដ្ឋលេខាធិការ ជួន កក្ដដា បានក៏បានលេីកយកមូលហេតុសំខាន់ៗដែលការប្រើហិង្សាមិនមែនជាជម្រើសល្អ៖
*១. ផលប៉ះពាល់ផ្នែកចិត្តសាស្ត្រ នៅពេលគ្រូវាយសិស្ស សិស្សនឹងរៀនដោយសារតែខ្លាច មិនមែនដោយសារតែចង់ចេះនោះទេ។ ការណ៍នេះធ្វើឱ្យសិស្សបាត់បង់ទំនុកចិត្ត និងខ្លាចក្នុងការសួរដេញដោល ម្យ៉ាងទៀតការប្រើហិង្សាអាចបង្កើតជាគំនុំរវាងសិស្ស និងគ្រូ ដែលធ្វើឱ្យបរិយាកាសសិក្សាក្លាយជាភាពតានតឹង។
*២. ឥទ្ធិពលលើចរិយាសម្បទា នៅពេលគ្រូប្រើការវាយដំដើម្បីដោះស្រាយបញ្ហា ក្មេងនឹងយល់ច្រឡំថា ហិង្សាគឺជាមធ្យោបាយដោះស្រាយបញ្ហា។ ពួកគេអាចនឹងយកទៅប្រើប្រាស់ជាមួយមិត្តភក្តិ ឬសមាជិកគ្រួសារនៅថ្ងៃក្រោយ។
*៣. ទិដ្ឋភាពច្បាប់ និងក្រមសីលធម៌ ក្រសួងអប់រំ យុវជន និងកីឡា បានហាមឃាត់ដាច់ខាតនូវការប្រើហិង្សាលើកុមារគ្រប់រូបភាព។ គ្រូដែលប្រើហិង្សាអាចប្រឈមនឹងការវិន័យរដ្ឋបាល ឬទោសទណ្ឌតាមច្បាប់។ ការវាយដំគឺជាការរំលោភលើសិទ្ធិ និងសេចក្តីថ្លៃថ្នូររបស់សិស្ស។
លោកអនុរដ្ឋរូបនេះបានបន្តលើកឡើងថា បេីមានសំណួរសួរថា ចុះបើមានសិស្សឌឺដង ឬមិនស្តាប់បង្គាប់ តើគ្រូគួរធ្វើដូចម្តេច? លោកបន្ថែមថា ជំនួសឱ្យការប្រើរំពាត់ គ្រូអាចប្រើវិធីសាស្ត្រ វិន័យដូចជា ស្វែងយល់ពីមូលហេតុដែលសិស្សខូចប្រហែលមកពីបញ្ហាគ្រួសារ ឬការចង់បានការចាប់អារម្មណ៍។ ឧទាហរណ៍ មិនឱ្យលេងបាល់ ឬមិនឱ្យចូលរួមកម្មវិធីសប្បាយៗក្នុងថ្នាក់ រហូតដល់ពួកគេកែខ្លួន។ យេីងអាចផ្តល់រង្វាន់ និងការលើកទឹកចិត្ត ផ្តោតលើការសរសើរចំណុចល្អ ដើម្បីឱ្យសិស្សចង់ធ្វើល្អបន្តទៀត។ ម្យ៉ាងទៀតការសហការជាមួយមាតាបិតាគឺល្អបំផុត ជួបពិភាក្សាជាមួយអាណាព្យាបាលដើម្បីរកដំណោះស្រាយរួមគ្នា។
អតីតព្រះធម្មវិជ្ជា ជួន កក្ដដា បានគូសបញ្ជាក់ថា រំពាត់អាចធ្វើឱ្យសិស្សខ្លាចក្នុងរយៈពេលខ្លី ប៉ុន្តែសេចក្តីស្រឡាញ់ និងការពន្យល់ ទើបអាចកែប្រែមនុស្សម្នាក់ឱ្យល្អបានយូរអង្វែង។ លោកបន្ថែមថា បេីមានការខុសឆ្គងសូមអភ័យទោសផង CKD៕
