មុខសញ្ញាលេងល្បែងអាប៉ោងនិងមាន់ជល់ដីខុសច្បាប់ជាង១០នាក់បានរត់គេចខ្លួនបាត់អស់ ប៉ូលិសស្រុកលើកដែកចាប់បានតែមាន់រស់១ក្បាលនិងសម្ភារៈមួយចំនួន!

(កណ្ដាល)៖ កម្លាំងនគរបាលស្រុកលើកដែកដឹកនាំដោយលោកវរសេនីយ៍ឯក អាំ ធូ អធិការនគរបាលស្រុកមិនអាចចាប់ក្រុមអ្នកញៀបល្បែងខុសច្បាប់បានសូម្បីតែ១នាក់ក្នុងចំណោមមុខសញ្ញាលេងល្បែងអាប៉ោងនិងមាន់ជល់ដីខុសច្បាប់ជាង១០នាក់ ចាប់បានតែមាន់រស់១ក្បាលនិងសម្ភារៈមួយចំនួននៅថ្ងៃអង្គារ ទី១៧ ខែកុម្ភៈឆ្នាំ២០២៦នេះ នៅចំណុចក្នុងព្រៃស្វាព្រៀម ស្ថិតក្នុងភូមិ តាហ៊ីង ឃុំព្រែកដាច់ ស្រុកលើកដែក ខេត្តកណ្តាល។ នេះបើតាមរបាយការណ៍របស់លោកវរសេនីយ៍ឯក អាំ ធូ អធិការនគរបាលស្រុកលើកដែកដែលអង្គភាពព័ត៌មាន The Mirror News ទទួលបាននៅថ្ងៃទី១៧ ខែកុម្ភៈ ឆ្នាំ២០២៦នេះ។

ប្រភពបានឲ្យដឹងថា ប្រតិបត្តិការខាងលើនេះ បន្ទាប់ពីប្រជាពលរដ្ឋដែលបានសរសេរបង្ហោះក្នុងតេឡេក្រាមរបស់ស្នងការនគរបាលខេត្តកណ្ដាលដោយមានខ្លឹមសារថា សូមគោរពរាយការណ៌ជូនឯកឧត្តមប្រធាន ជាទីគោរពពីខ្ញុំ មានសង្វៀនមាន់ជល់និងអាប៉ោងដែលទើបតែបើកលែងក្នុងសប្តាហ៌នេះ ក្នុងខែ០២ ឆ្នាំ២០២៦ ទីតាំងក្នុងភូមិព្រែកតាហ៊ីង ឃុំព្រែកដាច់ ខេត្តកណ្តាល ជាប់ព្រំប្រទល់ ស្រុកកោះធំ ភូមិស្តីធំ សង្វៀនជល់មាន់ខាងលើនេះ កងកម្លាំងប៉ូលិស៌ស្រុកលើកដែកបានចុះបង្រ្កាបម្តង ជាពីរដងរួចទៅហើយកាលពីឆ្នាំមុន។

ពាក់ព័ន្ធការបង្ក្រាបខាងលើនេះ លោកអធិការ អាំ ធូ បានបញ្ជាក់ថាមុខសញ្ញាលេងល្បែងប្រហែលជាង១០នាក់បានរត់គេចខ្លួនអស់ តែកម្លាំងរបស់លោកចាប់វត្ថុតាងបានមួយចំនួនរួមមាន៖ មាន់រស់០១ ក្បាល, ដុំស្គុតរុំជើងមាន់ប្រើរួចចំនួន១១ដុំ, កន្ត្រកដាក់មាន់ចំនួន០២, កៅស៊ូតង់ចំនួន០១, ហាន់តោបាញ់អាប៉ោងចំនួន០១, ស្បែកជើងផ្ទាត់ម្ខាង, ធុងស្ពេត្រូ០១និងម៉ូតូចាស់០២គ្រឿងក្នុងនោះមាន៖ ១.ម៉ាកសង់កូរ៉េ ពណ៌ខ្មៅ០១ គ្រឿងគ្មានស្លាកលេខ និងមួយគ្រឿងទៀតពណ៌ក្រហមគ្មានស្លាកលេខ។

លោកអធិការបញ្ជាក់ទៀតថា បន្ទាប់ពីកម្លាំងរបស់លោកបានធ្វើការចាប់យកវត្ថុតាងទាំងនោះយកមករក្សាទុកនៅអធិការដ្ឋាននគរបាលស្រុក លោកនឹងធ្វើការស្រាវជ្រាវរកមុខសញ្ញាលេងល្បែងស៊ីសងទាំងនោះមកធ្វើកិច្ចសន្យាណែនាំអប់រំ៕