«ការប្រមូលចំណូលពន្ធ នៅក្នុងឆ្នាំ២០២៦នេះ អាចនឹងជួបបញ្ហាប្រឈម ដោយតម្រូវការទំនិញមួយចំនួនដូចជា៖ រថយន្ត គ្រឿងសំណង់ អាចនឹងមានការថមថយ»
(ភ្នំពេញ)៖ «ការប្រមូលចំណូលពន្ធ នៅក្នុងឆ្នាំ២០២៦នេះ អាចនឹងជួបបញ្ហាប្រឈម ដោយតម្រូវការទំនិញមួយចំនួនដូចជា៖ រថយន្ត គ្រឿងសំណង់ អាចនឹងមានការថមថយ»។ នេះជាការបញ្ជាក់របស់លោកបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជានៅក្នុងសន្និសីទសារព័ត៌មាន ស្តីពីកិច្ចប្រជុំបូកសរុបលទ្ធផលការងារគយ និងរដ្ឋាករកម្ពុជា ប្រចាំឆ្នាំ២០២៥ និងលើកទិសដៅឆ្នាំ២០២៦ នៅអគារអគ្គនាយកដ្ឋានគយ និងរដ្ឋាករកម្ពុជា នាព្រឹកថ្ងៃទី១២ ខែកុម្ភៈ ឆ្នាំ២០២៥។
លោក គុណ ញឹម បានបញ្ជាក់ទៀតថា «សម្រាប់អគ្គនាយកដ្ឋានគយ និងរដ្ឋាករកម្ពុជា ការប្រមូលចំណូលពន្ធអាករ នៅឆ្នាំ២០២៦ អាចជួបបញ្ហាប្រឈមខ្លះ ដោយផែនការចំណូល ដែលកំណត់ដោយច្បាប់ហិរញ្ញវត្ថុ សម្រាប់ការគ្រប់គ្រងនៅឆ្នាំ២០២៦ មានកំណើនរហូតដល់១៨.៥ភាគរយ បើធៀបនឹងឆ្នាំ២០២៥។ នៅក្នុងឆ្នាំ២០២៦នេះ សង្កេតឃើញថា ស្ថានភាពការផ្គត់ផ្គង់ ជាពិសេសយានយន្ដ គ្រឿងសំណង់ និងទំនិញប្រើប្រាស់ប្រចាំថ្ងៃ អាចនឹងមានការធ្លាក់ចុះ ដោយសារការថមថយ នៃតម្រូវការប្រើប្រាស់នៅក្នុងប្រទេស»។
លោកបណ្ឌិតបានលើកឡើងថា អគ្គនាយកដ្ឋានគយ និងរដ្ឋាករកម្ពុជា នឹងបន្ដខិតខំប្រឹងប្រែង នៅក្នុងការអនុវត្ដតួនាទីរបស់ខ្លួន ជាពិសេសអនុវត្ដ ឲ្យបានខ្ជាប់ខ្ជួននូវផែនការសកម្មភាព ដែលបានកំណត់ឡើង និងត្រៀមអនុវត្ដគោលនយោបាយ ដែលដាក់ចេញដោយរាជរដ្ឋាភិបាល នៅក្នុងឆ្នាំ២០២៦នេះ។
គូសបញ្ជាក់ថា ចំណូលរបស់អគ្គនាយកដ្ឋានគយ និងរដ្ឋាករកម្ពុជា ដែលប្រមូលបាន នៅក្នុងឆ្នាំ២០២៥ បានជិត ៣.២ពាន់លានដុល្លារ លើសពីផែនការរហូតដល់ ២៤ភាគរយ ដែលជាចំនួនមួយខ្ពស់ ស្មើនឹងឆ្នាំ២០១៩៕
