ពុទ្ធោ! ដើមបណ្ដឹងទន្ទឹងរង់ចាំយុត្តិធម៌រហូតបាត់បង់ជីវិត នៅមិនទាន់បានទទួលសំណងនៅឡើយ ទោះបីឈ្នះក្ដីនៅសាលាដំបូងរាជធានីភ្នំពេញ និងសាលាឧទ្ធររួចហើយក៏ដោយ!

(កណ្ដាល)៖ ពុទ្ធោ! លោកយាយវ័យ៦៩ឆ្នាំម្នាក់ ឈ្មោះ តឹក ស្រី ជាជនជាតិខ្មែរ សញ្ជាតិខ្មែរ រស់នៅផ្ទះ៥៤២ ផ្លូវ១ ភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាលជាដើមបណ្ដឹងបានព្យាយាមទទ្ទឹងរង់ចាំយុត្តិធម៌រហូតបាត់បង់ជីវិតបាត់ នៅតែមិនទាន់ទទួលបានសំណង ទោះបីគាត់ឈ្នះក្ដីទាំងនៅសាលាដំបូងរាជធានីភ្នំពេញ និងនៅសាលាឧទ្ធររួចហើយក៏ដោយ។ នេះបើតាមប្រភពដែលអង្គភាពព័ត៌មាន The Mirror News ទទួលបាននៅថ្ងៃទី០៩ ខែកុម្ភៈ ឆ្នាំ២០២៦នេះ។

បើតាមប្រភពពីសាច់ញាតិសពខាងលើបានឱ្យដឹងថា ដើមបណ្ដឹងឈ្មោះ តឹក ស្រី​ បានស្លាប់ទៅហើយ កាលពីថ្ងៃទី៣០ ខែធ្នូ ឆ្នាំ២០២៥ និងមានសេចក្ដីចម្លងសំបុត្រកំណើតចុះថ្ងៃទី៣១ ខែធ្នូ ឆ្នាំ២០២៥ ដោយគាត់មិនទាន់ទទួលបានសំណងពីឈ្មោះ យ៉ែម ច័ន្ទវរិន្ទ នៅឡើយនោះទេ។

ប្រភពបន្តថា កាលពីថ្ងៃទី៩ ខែឧសភា ឆ្នាំ២០២២ ឈ្មោះ តឹក ស្រី ពិតជាបានដាក់ពាក្យប្ដឹងឈ្មោះ យ៉ែម ច័ន្ទវរិន្ទ ភេទស្រី អាយុ៥៩ឆ្នាំ ជនជាតិខ្មែរ សញ្ជាតិខ្មែរ កាន់អត្តសញ្ញាណប័ណ្ណ លេខ ៦០២ លេខ ០២០០០១៥៥០ ជាមន្ត្រីរាជការនៅមន្ទីររៀបចំដែនដី សំណង់ និងសូរិយោដីខេត្តកណ្ដាល មានអាសយដ្ឋាន បុរីប៉េងហួត ផ្ទះលេខ៥១ ផ្លូវ១៤ សង្កាត់និរោច ខណ្ឌច្បារអំពៅ រាជធានីភ្នំពេញពីបទ «រំលោភលើទំនុកចិត្ត» ទៅកាន់លោកឧត្តមសេនីយ៍ឯកប្រធាននាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ ក្រសួងមហាផ្ទៃ ដោយបានបញ្ជាក់ក្នុងពាក្យបណ្ដឹងថា កាលពីថ្ងៃទី២៤ ខែកក្កដា ឆ្នាំ២០១៩ លោកយាយបានប្រគល់ប្រាក់ចំនួន៣០,០០០$ , នៅថ្ងៃទី០២ ខែធ្នូ ឆ្នាំ២០១៩ ចំនួន២០,០០០$ នៅថ្ងៃទី២១ ខែមិថុនា ឆ្នាំ២០២១ ចំនួន២២,០០០$ និងនៅថ្ងៃទី២១ ខែកក្កដា ឆ្នាំ២០២១ ចំនួន ២២,៥០០$ សរុបទឹកប្រាក់ទាំងអស់ចំនួន៩៤,៥០០$ ទៅឲ្យឈ្មោះ យ៉ែម ច័ន្ទវរិន្ទ ដើម្បីរត់ការធ្វើច្បាប់ឈូសឆាយធ្វើព្រំដី និងធ្វើកម្មសិទ្ធិ ប្លង់រឹង ចំនួន៤ប្លង់ ក្នុងនោះចំនួន៣ប្លង់ មានទីតាំងស្ថិតនៅ ភូមិអន្លង់ស្លែង ឃុំសំបូរមាស ស្រុកមុខកំពូល ខេត្តកណ្តាល និងចំនួន១ប្លង់ទៀត ស្ថិតនៅ ភូមិថ្មី ឃុំស្វាយអំពារ ស្រុកមុខកំពូល ខេត្តកណ្តាល។ ក្រោយពីបានទទួលប្រាក់គ្រប់ចំនួន ឈ្មោះ យ៉ែម ច័ន្ទវរិន្ទ មិនបានរត់ការធ្វើច្បាប់ឈូសឆាយធ្វើព្រំដី និងធ្វើកម្មសិទ្ធិ ប្លង់រឹងលើដីធ្លីដែលមានទីតាំងដូចខាងលើនោះទេ។ ហើយលោកយាយក៏បានព្យាយាមទំនាក់ទំនងទៅឈ្មោះ យ៉ែម ច័ន្ទវរិន្ទ ប៉ុន្តែត្រូវឈ្មោះនេះបានគេចវេសបិទទូរស័ព្ទមិនអាចទំនាក់ទំនងបានរហូតដល់បច្ចុប្បន្ន។

បើតាមប្រភពផ្សេងទៀតបានឱ្យដឹងដែរថា ជនជាប់ចោទឈ្មោះ យ៉ែម ច័ន្ទវរិន្ន ក៏ត្រូវបានសាលាដំបូងរាជធានីភ្នំពេញបានសម្រេចឱ្យផ្តន្ទាទោសលើជនជាប់ចោទឈ្មោះ យ៉ែម ច័ន្ទវរិន្ន ដាក់ពន្ធនាគាររយៈពេល១ឆ្នាំ និងពិន័យជាប្រាក់ចំនួន២លានរៀល ពីបទ រំលោភលើទំនុកចិត្ត ប្រព្រឹត្តនៅចំណុចរាជធានីភ្នំពេញ កាលពីអំឡុងឆ្នាំ២០១៩ ដល់ឆ្នាំ២០២១ តាមបញ្ញត្តិមាត្រា ៣៩១ និងមាត្រា ៣៩២ ក្រមព្រហ្មទណ្ឌនៃព្រះរាជាណាចក្រកម្ពុជា។ និងបង្គាប់ឱ្យឈ្មោះ យ៉ែម ច័ន្ទវរិទ្ឋ សងប្រាក់ចំនួន ៧៩៥០០ដុល្លារអាមេរិក និងជម្ងឺចិត្ត ១០លានរៀល ទៅឱ្យដើមបណ្តឹងរដ្ឋប្បវេណីឈ្មោះ តឹក ស្រី ទៀតផង។

បើតាមប្រភពមួយទៀតក៏បានឱ្យដឹងទៀតថា សាលាឧទ្ធរក៏បានតម្កល់សាលក្រមព្រហ្មទណ្ឌ របស់សាលាដំបូងរាជធានីភ្នំពេញទុកជាបានការផងដែរនៅក្នុងសំណុំរឿង ឈ្មោះ យ៉ែម ច័ន្ទវរិន្ន ជាប់ចោទពីបទ រំលោភលើទំនុកចិត្ត ប្រព្រឹត្តនៅចំណុចរាជធានីភ្នំពេញ កាលពីអំឡុងឆ្នាំ ២០១៩-២០២១។

ប្រភពបានបង្ហើបឱ្យដឹងដែរថា ឈ្មោះ យ៉ែម ច័ន្ទវរិន្ន ​ក៏ធ្លាប់បានឆ្លើយសារភាពថា រូបគេពិតជាបានទទួលប្រាក់ចំនួន៩៤,៥០០ដុល្លារពីឈ្មោះ តឹក ស្រី ប្រាកដមែន ដើម្បីរត់ការធ្វើច្បាប់ឈូសឆាយលើព្រំដីចំនួន៤ប្លង់ ក្នុងនោះ ១ប្លង់នៅភូមិអន្លង់ស្លែង ឃុំសំបូរមាស ស្រុកមុខកំពូល ខេត្តកណ្ដាល និង ១ប្លង់ទៀត នៅភូមិថ្មី ឃុំស្វាយអំពារ ស្រុកមុខកំពូល ខេត្តកណ្ដាល។

ជុំវិញករណីខាងលើនេះ  កាលពីរសៀលថ្ងៃទី៣ ខែកុម្ភៈ ឆ្នាំ២០២៦ រហូតមកទល់ថ្ងៃទី៩ ខែកុម្ភៈ ឆ្នាំ២០២៦នេះ អង្គភាព The Mirror News នៅមិនទាន់បានទទួលការបំភ្លឺពីលោកស្រី យ៉ែម ច័ន្ទវរិន្ន នៅឡើយនោះទេ ព្រោះទូរសព្ទហៅចូល ប៉ុន្តែមិនមានមនុស្សលើកឬទទួលនោះទេ។  ពាក់ព័ន្ធករណីខាងលើនេះ អង្គភាព​ The Mirror News នៅរង់ចាំទទួលការបំភ្លឺពីគ្រប់ភាគីពាក់ព័ន្ធនៅរៀងរាល់ម៉ោងធ្វើការ៕