អាជ្ញាធររាជធានីភ្នំពេញរកអត់ឃើញបទល្មើសប្រព័ន្ធបច្ចេកវិទ្យាឆបោកតាមអនឡាញ ដូចការផ្សព្វផ្សាយព័ត៌មានរបស់គណនីហ្វេសប៊ុក ឈ្មោះ ស៊ែ វីរះស្ពេសអិច នោះទេ!

(ភ្នំពេញ)៖ ថ្មីៗនេះមានការផ្សព្វផ្សាយព័ត៌មានរបស់គណនីហ្វេសប៊ុក ឈ្មោះ ស៊ែ វីរះស្ពេសអិច ដែលមានខ្លឹមសាររៀបរាប់ពីទីតាំងអគារអនឡាញមួយចំនួន នៅរាជធានីភ្នំពេញដើម្បីឲ្យសមត្ថកិច្ចចុះបង្រ្កាប។  ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមបំភ្លឺជូនដល់សាធារណជនមេត្តាជ្រាបថាៈ ដោយទីតាំងអគារដែលគណនីហ្វេសប៊ុក ឈ្មោះ ស៊ែ វីរះស្ពេសអិច បានរៀបរាប់ រួមមាន៖ *១- អគារ the bridge (ខណ្ឌចំការមន)*២- អគារ Marry Time (ខណ្ឌមានជ័យ)*៣- អគារPNN (ខណ្ឌជ្រោយចង្វារ)*៤- អគារស្កាយឡាញ ក្បែរផ្សារអូឬស្សី (ខណ្ឌ៧មករា)*៥- អគារមានរូបម្កុដិ (ខណ្ឌដូនពេញ)*៦-អគារស្កាយទ្រី (ខណ្ឌឫស្សីកែវ)។ នេះបើតាមប្រភពពីក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញដែលអង្គភាព The Mirror News ទទួលបាននៅថ្ងៃទី៣ ខែកុម្ភៈ ឆ្នាំ២០២៦នេះ។

ប្រភពខាងល់ើបញ្ជាក់ថា កន្លងមកគណៈបញ្ជាការឯកភាពរដ្ឋបាលរាជធានីភ្នំពេញ បានដឹកនាំកម្លាំងសមត្ថកិច្ចចម្រុះ ចុះពិនិត្យរដ្ឋបាលទីតាំងខាងលើដោយទីតាំងខ្លះចុះពិនិត្យរដ្ឋបាលជាចំហរ ,ចុះឆែកឆេរ មួយទីតាំង ចំនួន០២ទៅ ០៣លើករួចមកហើយ ជាលទ្ធផលពុំឃើញបទល្មើសប្រព័ន្ធបច្ចេកវិទ្យាឆបោកតាមអនឡាញនោះទេ និងបានរកឃើញជនបរទេសដែលស្នាក់នៅគឺមានលិខិតស្នាមស្របច្បាប់ត្រឹមត្រូវ ហើយបច្ចុប្បន្ននេះដោយអនុវត្តតាមអនុក្រឹត្យ០៣ អនក្រ.បក របស់រាជរដ្ឋាភិបាលកម្ពុជា ចុះថ្ងៃទី០៥ ខែមករា ឆ្នាំ២០២៦ ស្តីពីការគ្រប់គ្រងសន្តិសុខ សុវត្ថិភាព ទីតាំងរស់នៅប្រមូលផ្តុំដើម្បីធានា សន្តិសុខសុវត្ថិភាពសង្គម និងសណ្តាប់ធ្នាប់សាធារណៈ គណៈបញ្ជាការឯកភាពរដ្ឋបាលរាជធានីភ្នំពេញប្តេជ្ញាចុះស្រាវជ្រាវនិងត្រួតពិនិត្យ បង្រ្កាបរាល់សកម្មភាពប្រព្រឹត្តបទល្មើសតាមប្រព័ន្ធវិទ្យាឆបោកតាមអនឡាញខុសច្បាប់ នៅក្នុងភូមិសាស្រ្តរាជធានីភ្នំពេញ។

ប្រភពដដែលបន្តថា ជាមួយគ្នានេះសមត្ថកិច្ចក៏បានចុះណែនាំដល់ម្ចាស់ទីតាំងត្រូវសហការជាមួយសមត្ថកិច្ចដើម្បីបង្រ្កាបបើមានជនល្មើសបើកលួចលាក់បទល្មើសឆបោកអនឡាញខុសច្បាប់និងក៏បានណែនាំដល់ម្ចាស់ទីតាំងកុំឲ្យមានការលួចលាក់ឃុបឃិតជាមួយជនល្មើស បើក្នុងករណីសមត្ថកិច្ចរកឃើញម្ចាស់ទីតាំងជាប់ពាក់ព័ន្ធឃុបឃិតឲ្យបើកបទល្មើសតាមប្រព័ន្ធបច្ចេកវិទ្យាឆបោកអនឡាញខុសច្បាប់សមត្ថកិច្ចនិងអនុវត្តតាមនីតិវិធី។

អាជ្ញាធររាជធានីភ្នំពេញបានបញ្ជាក់យ៉ាងដូច្នេះទៀតថា ពាក់ព័ន្ធបទល្មើសបច្ចេកវិទ្យាឆបោកអនឡាញខុសច្បាប់នេះ គណៈបញ្ជាការឯកភាពរដ្ឋបាលរាជធានីភ្នំពេញបានប្តេជ្ញាដាក់ចេញជាវិធានការណ៍ម៉ឺងម៉ាត់បំផុត មិនអនុញ្ញាតឲ្យកើតមានបើកប្រពន្ធ័បច្ចេកវិទ្យាឆបោកអនឡាញខុសច្បាប់ជាដាច់ខាត៕