ជនជាតិអង់គ្លេស២នាក់ ត្រូវបានតុលាការជំនុំជម្រះទោស ករណីរត់ពន្ធកញ្ឆាក្រៀមឆ្លងដែនពីថៃមកកម្ពុជា

(ភ្នំពេញ)៖ ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញលោក ទិត្យសុធី បូរ៉ាឆាត រួមទាំងលោក ទុង រតនា ជាតំណាងអយ្យការ បានដំណើការសវនាការជំនុំជម្រើលើសំណុំរឿងជនជាតិអង់គ្លេស២នាក់ ទី១៖ឈ្មោះ Staven ភេទប្រុស អាយុ៤១ឆ្នាំ ទី២៖ឈ្មោះ Jam ភេទប្រុស អាយុ២៨ឆ្នាំ ដែលពាក់ពន្ធ័រត់ពន្ធកញ្ឆាក្រៀមឆ្លងដែនពីថៃ ហើយត្រូវបង្ក្រាបបាននៅព្រលានយន្តហោះអន្តរជាតិភ្នំពេញ។

បុរសជនជាតិអងគ្លេសទាំង២នាក់នេះ ត្រូវកម្លាំងសមត្ថកិច្ចជំនាញផ្នែកគ្រឿងញៀនចាប់ខ្លួនភ្លាមៗ កាលពីថ្ងៃទី១៧ ខែមិថុនា ឆ្នាំ២៩២៥ ក្រោយរកឃើញជាប់ពាក់ព័ន្ធករណីរត់ពន្ធកញ្ឆាក្រៀមជិត២០គីឡូក្រាម ពីប្រទេសថៃ តាមអាកាសយានដ្ឋានអន្តរជាតិភ្នំពេញ។

ក្រោយសវនាការនេះ បានបិទបញ្ចប់ចៅក្រមប្រធានក្រុមប្រឹក្សា បានសម្រេចលើកយកសំណុំរឿងនេះ ទៅប្រកាសសាលក្រមនៅថ្ងៃទី២៤ ខែកុម្ភ: ឆ្នាំ២០២៦ខាងមុខ។

គួរបញ្ជាក់ថា ប្រតិបត្តិការនេះ​ ធ្វើឡើងកាលពីថ្ងៃទី១៧ ខែមិថុនា ដោយអនុវត្ដតាមបទបញ្ជានាយឧត្តមសេនីយ៍ ស ថេត អគ្គស្នងការនគរបាលជាតិ កម្លាំងជំនាញនៃមន្ទីរប្រឆាំងគ្រឿងញៀន សហការជាមួយសមត្ថកិច្ចគយ និងរដ្ឋាករប្រចាំអាកាសយានដ្ឋានអន្តរជាតិភ្នំពេញ និងសម្របសម្រួលនីតិវិធីពីលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បង្ក្រាបករណីដឹកជញ្ជូនកញ្ឆាក្រៀមឆ្លងដែន តាមផ្លូវអាកាស នៅអាកាសយានដ្ឋានអន្តរជាតិភ្នំពេញ ធ្វើការចាប់ខ្លួនជនល្មើសម្នាក់ សញ្ជាតិអង់គ្លេសអាយុ៤១ឆ្នាំ និងម្នាក់ទៀតឈ្មោះ Jam អាយុ២៨ឆ្នាំ។

ជាលទ្ធផល កម្លាំងជំនាញបានរកឃើញវត្ថុតាងកញ្ឆាក្រៀមចំនួន២២ដុំ ស្មើនឹងទម្ងន់១៩គីឡូ៩០២ក្រាម។ បច្ចុប្បន្ន ជនសង្ស័យ និងវត្ថុតាងចាប់យកខាងលើ ត្រូវបនាកម្លាំងសមត្ថកិច្ចជំនាញកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធីច្បាប់៕