រដ្ឋមន្ត្រី៖ ឈាង រ៉ា៖ ជំងឺឆ្លងគឺជាបញ្ហាសុខភាពសកល ដែលពិបាកក្នុងការលុបបំបាត់ និងទាមទារឱ្យការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ ដើម្បីអាចលុបបំបាត់ជំងឺនេះបាន

(ភ្នំពេញ)៖ រដ្ឋមន្ត្រីសុខាភិបាល លោកសាស្ត្រាចារ្យ ឈាង រ៉ា បានគូសបញ្ជាក់ថា ជំងឺឆ្លងគឺជាបញ្ហាសុខភាពសកល ដែលពិបាកក្នុងការលុបបំបាត់ និងទាមទារឱ្យការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ ដើម្បីអាចលុបបំបាត់ជំងឺនេះបាន។

ការថ្លែងយ៉ាងដូច្នេះរបស់លោកសាស្រ្តាចារ្យ បានធ្វើឡើងក្នងសន្និសីទសារព័ត៌មាន សន្និបាតសុខាភិបាលលើកទី៤៥ នាថ្ងៃចន្ទ ទី២៦ ខែមករា ឆ្នាំ២០២៦ នៅសណ្ឋាគារសូហ្វីតែល ភ្នំពេញភូគីត្រា។

លោក ឈាង រ៉ា បានបន្តថា ជំងឺឆ្លងមួយចំនួនលើសកលលោក មានការលំបាកក្នុងការលុបបំបាត់ ដោយសារការឆ្លងលឿនរហ័ស និងយ៉ាងងាយស្រួលបំផុតតាមរយៈការធ្វើដំណើររបស់ប្រជាជនពីប្រទេសមួយ ទៅប្រទេសមួយ ពីទ្វីបមួយ ទៅទ្វីបមួយទៀត ដែលធ្វើឱ្យពិបាក ក្នុងការទប់ស្កាត់ការរីករាលដាល បញ្ហានេះទាមទារការចូលរួមយ៉ាងសកម្មពីបណ្តាប្រទេសទាំងអស់ ដើម្បីអាចចូលរួមទប់ស្កាត់ និងលុបបំបាត់ឲ្យមានប្រសិទ្ធភាព។

លោករដ្ឋមន្ត្រីបន្តថា «ដូច្នេះហើយក្រសួងសុខាភិបាលកម្ពុជាបាននិងកំពុងធ្វើការយ៉ាងសកម្មជាមួយដៃគូអន្តរជាតិជាច្រើន ដើម្បីលុបបំបាត់ជំងឺឆ្លងផ្សេងៗ។ ជាពិសសេស ក្រសួងសុខាភិបាលបានសហការជាមួយទីភ្នាក់ងារ KOICA ក្នុងការបណ្តុះបណ្តាលការបង្ការ និងត្រួតពិនិត្យការចម្លងរោគកម្រិតខ្ពស់ ដើម្បីបង្កើនប្រសិទ្ធភាពព្យាបាលអ្នកជំងឺ និងបានចុះហត្ថលេខាលើគម្រោងពង្រឹងប្រព័ន្ធសុខាភិបាល ក្នុងការការពារ និងឆ្លើយតបចំពោះជំងឺឆ្លងផងដែរ»។

ជាងនេះទៅទៀត ក្រសួងសុខាភិបាលបានបើកកិច្ចប្រជុំអន្តរក្រសួងស្តីពីការទប់ស្កាត់ការឆ្លងរាលដាលជំងឺជាអន្តរជាតិ និងបន្តកិច្ចសហប្រតិបត្តិការជាមួយមូលនិធិសកល ដើម្បីលុបបំបាត់ជំងឺអេដស៍ របេង និងគ្រុនចាញ់៕