លោក ហែម ដារិទ្ធិ ដឹកនាំកម្លាំងដុតកម្ទេចទំនិញ ដែលផ្ទុកសារធាតុគីមី និងខូចគុណភាពជាង១តោនចោល
(ព្រះសីហនុ)៖ លោក ហែម ដារិទ្ធិ អភិបាលរងខេត្ត តំណាងលោក ម៉ាង ស៊ីណេត អភិបាលខេត្តព្រះសីហនុ អភិបាលរងក្រុងស្រុក និងមន្ទីរ អង្គភាពជុំវិញខេត្ត ព្រះរាជអាជ្ញា សាខាគយ កងកម្លាំងសមត្ថកិច្ច និងមន្ត្រីនៃអគ្គនាយកដ្ឋានកិច្ចការពាអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) សាខាខេត្តព្រះសីហនុ កាលពីថ្ងៃទី២០ ខែមករា ឆ្នាំ២០២៦ បានដុតកំទេចផលិតផលម្ហូបអាហារហួសកាលបរិច្ឆេទ ប្រមាណ១តោនចោល ដែលមិនអនុលោមតាមលក្ខខ័ណ្ឌតម្រូវ ផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ធានាឱ្យបាននូវផលិតផលប្រើប្រាស់ និងម្ហូបអាហារដែលមានសុវត្ថិភាពចំពោះសុខភាព ដើម្បីការពារសុខមាលភាពប្រជាពលរដ្ឋ នៅទីលានចាក់សំរាម ស្ថិតក្នុងភូមិអូរកំបុត សង្កាត់អូរឧកញ៉ាហេង ក្រុងកំពង់សោម ខេត្តព្រះសីហនុ
លោក ហែម ដារិទ្ធិ បានកោតសរសើរដល់មន្ត្រីសាខា ក ប ប ខេត្តព្រះសីហនុ ដែលបានដកហូតម្ហូបអាហារមិនភាពអនុលោម មកកំទេចចោលទាន់ពេលវេលា ព្រោះទំនិញនេះអាចបង្កផលប៉ះពាល់ដល់សុខភាពអ្នកប្រើប្រាស់។
បើតាមលោក ឃុន ស៊ីម៉ន ប្រធានសាខា ក.ប.ប. ខេត្ត បានថ្លែងថា ការដុតកំទេចទំនិញថ្ងៃនេះ គឺដើម្បីឆ្លើយតបនឹងកង្វល់របស់ប្រជាពលរដ្ឋ និងអនុសាសន៍ណែនាំដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ជាគោលនយោបាយចំបងរបស់រាជរដ្ឋាភិបាលកម្ពុជា គឺធ្វើយ៉ាងណាឲ្យម្ហូបអាហារ គ្មានសារធាតុគីមី មានអនាម័យ រក្សាឲ្យបាននូវសុខភាពប្រជាពលរដ្ឋ ស្ថេរភាពទីផ្សារផ្នែកម្ហូបអាហារ នាំឲ្យមានកំណើនសេដ្ឋកិច្ច និងការអភិវឌ្ឍន៍។
លោកប្រធានសាខាក៏បានប្ដេជ្ញាបន្តការងារអនុវត្ត តាមអនុសាសន៍ដ៍ខ្ពង់ខ្ពស់របស់លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ក៏ដូចជាអគ្គនាយក នៃអគ្គនាយកដ្ឋាន កិច្ចការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) និងការណែនាំពីលោក ម៉ាង ស៊ីណេត អភិបាលខេត្ត ធ្វើយ៉ាងណាឲ្យមន្ត្រីសាខា ក.ប.ប. ទាំងអស់ បន្តប្រឹងប្រែងត្រួតពិនិត្យទំនិញនៅលើទីផ្សារ និងនៅតាមហាងលក់ទំនិញនានាថែមទៀត ដើម្បីចូលរួមលើកកម្ពស់សុវត្ថិភាពម្ហូបអាហារ ជូនអ្នកប្រើប្រាស់នៅក្នុងខេត្តព្រះសីហនុ៕
