ឧបនាយករដ្ឋមន្ត្រី ស៊ុន ចាន់ថុល ណែនាំឱ្យរដ្ឋបាលរាជធានីភ្នំពេញ បន្តខិតខំពង្រឹងស្ថេរភាពនយោបាយ បន្តបង្ក្រាបការឆបោកតាមប្រព័ន្ធបច្ចេកវិទ្យា

(ភ្នំពេញ)៖ ឯកឧត្ដមឧបនាយករដ្ឋមន្ត្រី ស៊ុន ចាន់ថុល បានណែនាំឱ្យរដ្ឋបាលរាជធានីភ្នំពេញ បន្តខិតខំពង្រឹងស្ថេរភាពនយោបាយ។ បន្តថែរក្សាសន្តិសុខ សុវត្ថិភាពជូនប្រជាពលដ្ឋ ខិតខំទប់ស្កាត់ព័ត៌មានក្លែងក្លាយបំភ្លើសការពិតនាំអាប់អោនជាតិ។ បន្តទប់ស្កាត់បទល្មើសគ្រប់ប្រភេទ លួច ឆក់ ប្លន់ ល្បែង ស៊ីសង ពិសេសការបង្ក្រាបការឆបោកតាមប្រព័ន្ធបច្ចេកវិទ្យា (ONLINE SCAMS)។

ការណែនាំរបស់ឯកឧត្ដម ស៊ុន ចាន់ថុល ឧបនាយករដ្ឋមន្ត្រី ទទួលបន្ទុកជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ នារសៀលថ្ងៃទី១៥ ខែមករា ឆ្នាំ២០២៦នេះ ក្នុងពិធីបិទសន្និបាតបូកសរុបលទ្ធផលការងារ ប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលរាជធានីភ្នំពេញ នៅសណ្ឋាគាររ៉េស៊ីដងសុខាភ្នំពេញ។

ឯកឧត្ដមឧបនាយករដ្ឋមន្ត្រីបានជម្រុញឱ្យរដ្ឋបាលរាជធានីភ្នំពេញ ត្រូវបន្តការគៀងគរអ្នកវិនិយោគ ឱ្យវិនិយោគនៅតាមមូលដ្ឋាន ពិសេសគឺការវិនិយោគក្នុងទំហំទុនវិនិយោគ ក្រោម៥លានដុល្លារចុះក្រោម ដើម្បីឱ្យបងប្អូនប្រជាពលរដ្ឋ មានការងារធ្វើស្របទៅតាមការចង់បានរបស់រាជរដ្ឋាភិបាល។ ពាក់ព័ន្ធនិងការកៀរគរអ្នកវិនិយោគនេះ ក្រុមប្រឹក្សាអភិវឌ្ឍន៍កម្ពុជា បានខិតខំដើរទាក់ម៉ូយខ្លាំង ដើម្បីស្វែងរកអ្នកវិនិយោគនៅកម្ពុជា។ ឯកឧត្ដមក៏បានជំរុញឱ្យរដ្ឋបាលរាជធានីភ្នំពេញ បន្តការកសាងហេដ្ឋារចនាសម្ព័ន្ធនានា ដូចជាផ្លូវ លូ ប្រឡាយ សួនច្បារ។ ធ្វើអនាម័យ បរិស្ថាន កាងារមនុស្សធម៌ ការងារសង្គ្រោះ និងការដោះស្រាយគ្រោះមហន្តរាយជាដើម។

ឯកឧត្ដមឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា ក្នុងឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា ដើរទាក់ម៉ូយអ្នកវិនិយោគបាន៦៣០គម្រោង ក្នុងទំហំទឹកប្រាក់ប្រមាណ១០ពាន់លានដុល្លារអាមេរិក ខណៈដែលនៅក្នុងឆ្នាំ២០២៤ មានត្រឹមតែ ៤១៤គម្រោងប៉ុណ្ណោះ មានន័យថា ក្នុង១ឆ្នាំៗ គម្រោងវិនិយោគចេះតែកើនឡើងរហូត យើងនឹងបន្តខិតខំប្រឹងប្រែងបន្ថែមទៀត ដើម្បីឱ្យកម្ពុជាទទួលបានការវិនិយោគកាន់តែច្រើន៕