លោកអធិការ យី វណ្ណដា បន្តណែនាំឲ្យកម្លាំងផ្នែកជំនាញ និងកម្លាំងប៉ុស្ដិ៍នគរបាលរដ្ឋបាលទាំងអស់ ត្រូវបង្ក្រាបក្រុមក្មេងទំនើង គ្រឿងញៀន និងបទល្មើសផ្សេងៗក្នុងមូលដ្ឋាន

(កណ្ដាល)៖ ដោយអនុវត្តតាមគោលការណ៍ដឹកនាំរបស់លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាលនៅរសៀលថ្ងៃទី៥ ខែធ្នូ ឆ្នាំ២០២៥ លោកវរសេនីយ៍ឯក យី វណ្ណដា អធិការនៃអធិការដ្ឋាននគរបាលក្រុងតាខ្មៅបានដឹកនាំកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងលេីកទិសដៅបន្ដខែធ្នូ ឆ្នាំ២០២៥ដោយមានការចូលរួមពីលោក-លោកស្រីអធិការរង លោកនាយផ្នែក លោកនាយប៉ុស្តិ៍ នាយរងផ្នែក នាយរងប៉ុស្ដិ៍ និងមន្ត្រីពាក់ព័ន្ធទាំងអស់ផងដែរ ។

លោកអធិការបានបន្តណែនាំឲ្យកម្លាំងផ្នែកជំនាញ និងកម្លាំងប៉ុស្ដិ៍នគរបាលរដ្ឋបាលទាំងអស់ ត្រូវពង្រឹងលើកិច្ចការងារការពារថ្នាក់ដឹកនាំជាតិ , ការងារសន្តិសុខសុវត្ថិភាព និងរបៀបរៀបរយសាធារណៈ, កិច្ចការងារភូមិសង្កាត់មានសុវត្ថិភាព ការងារបង្ក្រាបក្រុមក្មេងទំនើង គ្រឿងញៀន និងបទល្មើសផ្សេងៗនៅក្នុងមូលដ្ឋាន ក៏ដូចជាការចុះដោះស្រាយការកកស្ទះចរាចរណ៍ ជាពិសេសសម្រួលចរាចរណ៍ជូនប្អូនៗ ក្មួយៗសិស្សសាលាពេលចេញពីរៀន និងតាមបណ្តោយផ្លូវមានបញ្ហាប្រឈមនានា ជូនបងប្អូនប្រជាពលរដ្ឋ។

លោកអធិការ​​ យី វណ្ណដា ក៏បានសង្កត់ធ្ងន់ដល់ផ្នែកជំនាញ និងលោកនាយប៉ុស្ដិ៍ ត្រូវបន្តពង្រឹងត្រួតពិនិត្យតាមដានឲ្យបានខ្លាំង លើទីតាំងឆបោកតាមប្រព័ន្ធអនឡាញ ដែលបច្ចុប្បន្ននេះ មានជនបរទេសមួយចំនួន បាននឹងកំពុងយកកម្ពុជាធ្វើជាជម្រក ក្នុងការប្រព្រឹត្តិអំពើឆបោកតាមបច្ចេកវិទ្យា និងជំរុញការគ្រប់គ្រងត្រួតពិនិត្យទីតាំងតូចធំនៃសកម្មភាពប្រព្រឹត្តបទល្មើសទីតាំងឆបោកតាមប្រព័ន្ធអនឡាញ ដែលកន្លែងលួចបើកល្បែងដែលបានចូលបង្ក្រាបហើយ មិនឱ្យមានលួចបើកវិញ ជាពិសេសលួច បង្កប់តាមទីតាំងតូចៗ៕