ទីតាំងផលិតបារីមួយកន្លែងដែលគេសង្ស័យថា មិនទាន់មានច្បាប់អនុញ្ញាតត្រឹមត្រូវ បានកំពុងលាក់ខ្លួនយ៉ាងស្ងៀមស្ងាត់ក្បែររបងវិទ្យាល័យទន្លេបិទ ស្រុកត្បូងឃ្មុំ
(ត្បូងឃ្មុំ)៖ ទីតាំងឃ្លាំងផលិតបារីមួយដ៏ធំបានកំពុងសម្ងំលាក់ខ្លួនយ៉ាងស្ងៀមស្ងាត់នៅក្បែររបងវិទ្យាល័យទន្លេបិទ ស្ថិតក្នុងភូមិទន្លេបិទក្រោម ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។ នេះបើតាមប្រភពដែលបណ្ដាញសារព័ត៌មានទទួលបាននៅថ្ងៃទី២៩ ខែវិច្ឆិកា ឆ្នាំ២០២៥នេះ។
ប្រភពបន្តថា ទីតាំងឃ្លាំងផលិតបារីដ៏ធំនេះ មានថៅកែជាជនជាតិចិន ហើយគេដាក់ចម្ងល់ថា តើទីតាំងផលិតបារីនេះ មានច្បាប់អនុញ្ញាតត្រឹមត្រូវឬយ៉ាងណានោះទេ សូមអាជ្ញាធរមានសមត្ថកិច្ចមេត្តាចុះជួយពិនិត្យផង?។
ប្រភពបន្តថា ចំពោះផលិតផលបារីនេះ មានម៉ាកសញ្ញាដូចជាបារីចិន ហើយចំពោះអ្នកបម្រើការនៅទីនោះ មានជនជាតិខ្មែរ ជាបុគ្គលិកកម្មករតូចតាចប្រមាណជា៤០ទៅ៥០នាក់ប៉ុណ្ណោះ។ ក្រៅពីនោះ ជាជនជាតិចិន ដែលមានភារកិច្ចមើលការខុសត្រូវ ឬជាមេការធំៗ ។ នៅទីនេះកម្មករ ក៏ដូចជាមន្ត្រីរាជការមិន អាចចេញ-ចូលបានតាមអំពើចិត្តនោះឡើយ។ ពោលគឺមានការយាមការតឹងរឹង តាមបទបញ្ជារបស់ថៅកែជាជនជាតិចិន។ បើគ្មានការអនុញ្ញាតពីថៅកែជនជាតិចិនទេ គេមិនអាចចូលទៅក្នុងរោងចក្រផលិតបារីនេះបានឡើយ។ ប្រភពបានបន្តឱ្យដឹងថា បារីដែលផលិតរួច ត្រូវបានគេនាំចេញទៅក្រៅប្រទេស តាមច្រកព្រំដែនខេត្តត្បូងឃ្មុំឆ្លងដែនទៅប្រទេសវៀតណាម។
ប្រភពបន្តទៀតថា តើទីតាំងផលិតបារីដ៏ធំមួយកន្លែងនេះ មានច្បាប់ទម្លាប់ត្រឹមត្រូវដែរឬយ៉ាងណាទេ ឬចេញដោយស្ថាប័នណានោះទេ ខណៈអាជ្ញាធរខេត្តត្បូងឃ្មុំ ក៏ដូចជាមន្ទីរជំនាញបានត្រឹមតែឆ្លើយថា «មិនដឹង»។
ប្រភពផ្សេងទៀតថា វាគ្រាន់តែជាការសម្របសម្រួលយល់មុខរវាងពួកឈ្មួញថៅកែជនជាតិចិន និងមេៗខេត្តតែប៉ុណ្ណោះ។ ចំពោះច្បាប់ទម្លាប់គ្មានអ្នកណាដឹងថា តើថៅកែទីតាំងខាងលើនេះ បានសុំច្បាប់ដល់ថ្នាក់ណានោះទេ?
ប្រភពមួយទៀតបានឱ្យដឹងថា នៅខេត្តត្បូងឃ្មុំ ក្រៅពីទីតាំងផលិតបារីដ៏ធំមួយកន្លែងខាងលើនេះ ក៏មានកន្លែងផ្សេងទៀតដូចជានៅសួង ឬនៅស្រុកពញាក្រែក ក៏មានរោងចក្រផលិតបារីបែបនេះដែរ ដូច្នេះសូមអាជ្ញាធរមានសមត្ថកិច្ចខេត្តត្បូងមេត្តាជួយដាក់មន្ត្រីជំនាញចុះពិនិត្យទីតាំងខាងលើផង ដើម្បីសង្គមនីតិរដ្ឋទាំងអស់គ្នា៕
