លោកស្រី រ៉េត ផល្លីដា ភរិយារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានអញ្ជើញចូលរួមបើកបវេសនកាល នៅសាលាបឋមសិក្សាកន្ទួត ស្ថិតនៅ ឃុំតាំងក្រូច ស្រុកសំរោងទង ខេត្តកំពង់ស្ពឺ

(កំពង់ស្ពឺ)៖ លោកស្រី រ៉េត ផល្លីដា ភរិយារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នៅព្រឹកថ្ងៃសៅរ៍ ទី១ ខែវិច្ឆិកា ឆ្នាំ២០២៥ បានអញ្ជើញចូលរួមបើកបវេសនកាល នៅសាលាបឋមសិក្សាកន្ទួត ស្ថិតនៅ ឃុំតាំងក្រូច ស្រុកសំរោងទង ខេត្តកំពង់ស្ពឺ។

នាឱកាសនោះ លោកស្រី និងក្រុមការងារសប្បុរសធម៌រួមគ្នាដើម្បីកុមារ បានជួបសំណេះសំណាលជាមួយលោកគ្រូ អ្នកគ្រូ និងក្មួយៗសិស្សានុសិស្ស ព្រមទាំងបានចែកសំភារៈសិក្សាមួយចំនួន ជូនក្មួយៗសិស្សានុសិស្ស២៧៥នាក់ផងដែរ។លោស្រីបានលើកទឹកចិត្ត និងជំរុញមាតាបិតាសិស្សបញ្ជូនកូនទៅចុះឈ្មោះចូលសិក្សាឲ្យបានគ្រប់ៗគ្នា ពីព្រោះសាលារៀនគឺថ្នាលបណ្តុះបណ្តាលដល់កុលបុត្រ កុលធីតា ដែលជាទំពាំងស្នងឬស្សី និងធនធានមនុស្សដ៏សំខាន់ ក្នុងអភិវឌ្ឍន៍ ប្រទេសជាតិរបស់យើង។

គួរបញ្ជាក់ថា នៅព្រឹកថ្ងៃទី១ ខែវិច្ឆិកា ឆ្នាំ២០២៥ ជាថ្ងៃបើកបវេសនកាលឆ្នាំសិក្សា២០២៥- ២០២៦ ទូទាំងប្រទេស។ រាជរដ្ឋាភិបាលកម្ពុជា នីតិកាលទី៧ នៃរដ្ឋសភា នៅតែបន្តយកចិត្តទុកដាក់ខ្ពស់លើវិស័យអប់រំ តាមរយៈ ការបន្តរិះរកវិធានការ និងយុទ្ធសាស្ត្របន្ថែមទៀត ដើម្បីធ្វើយ៉ាងណាឱ្យសាលារៀនក្លាយជាអង្គភាពផ្តល់សេវា សាធារណៈប្រកបដោយប្រសិទ្ធភាពខ្ពស់ អភិបាលកិច្ចល្អ និងមានគណនេយ្យភាពចំពោះប្រជាជន និងសហគមន៍ ដោយការពង្រឹងអភិបាលកិច្ចសាលារៀន និងការលើកកម្ពស់សកម្មភាពបង្រៀននិងរៀន តម្រង់ឆ្ពោះទៅរក ការកែលម្អលទ្ធផលនៃការសិក្សារបស់សិស្សកាន់តែប្រសើរឡើង ប្រកបដោយវិន័យ សីលធម៌ គុណធម៌ និង ឥរិយាបថថ្លៃថ្នូរ សក្តិសមជាកុលបុត្រ កុលធីតាខ្មែរ និងជាទំពាំងស្នងឫស្សីរបស់ជាតិ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវសូមអាណាព្យាបាលយកក្មួយៗ ដែលទើបនឹងដល់អាយុត្រូវចូលសាលារៀន ជាពិសេសកុមារតូចអាយុពី៣ឆ្នាំ ទៅ៥ឆ្នាំ នៅមត្តេយ្យសិក្សា និងកុមារអាយុ៦ឆ្នាំ ឬ៧០ខែ នៅបឋមសិក្សា ព្រមទាំងជាថ្ងៃឡើងថ្នាក់ថ្មីរបស់ក្មួយៗ ដែលបានខិតខំរៀនសូត្រក្នុងឆ្នាំសិក្សាកន្លងមក ដើម្បីបន្តក្រេបជញ្ជក់នូវ ចំណេះវិជ្ជាបន្ថែមទៀតពីសាលារៀនសាធារណៈទាំងអស់នៅទូទាំងប្រទេស៕