មន្ត្រីពេទ្យឈ្មោះ ហេង រតនា បម្រើការងារនៅមន្ទីរពេទ្យបង្អែកខេត្តរតនគិរីបើកបរធ្វេសប្រហែសបានបុកកុមារីអាយុ៤ឆ្នាំម្នាក់ស្លាប់ ខណៈកំពុងដឹកយកទៅសង្គ្រាះបន្ទាន់នៅមន្ទីរពេទ្យគន្ធបុប្ផាខេត្តសៀមរាប ពេលនេះចេញសេចក្ដីបំភ្លឺហើយ
(រតនគិរី)៖ បន្ទាប់ពីមានការចុះផ្សាយកាលពីថ្ងៃទី២១ ខែ កញ្ញា ឆ្នាំ២០២៥ ដោយសារព័ត៌មានក្នុងស្រុកថា លោក ហេង រតនា មន្ត្រីបំរើការងារនៅមន្ទីរពេទ្យបង្អែកខេត្ត បើកបររថយន្តធ្វេសប្រហែស និងមិនមានការប្រុងប្រយ័ត្នក្នុងចំណោមមនុស្សដើរចេញចូលឆ្លងកាត់ ទើបបណ្តាលអោយកិនក្មេងស្លាប់បាត់បង់ជីវិត។
ពេលនេះ មន្ទីរពេទ្យបង្អែកខេត្តរតនគិរីបំភ្លឺថា នៅថ្ងៃទី១៩ ខែកញ្ញា ឆ្នាំ២០២៥ វេលាម៉ោង ១៣:៤៧ នាទីរសៀល មានករណីគ្រោះថ្នាក់ចរាចរណ៍មួយបានកើតឡើងនៅក្នុងបរិវេណនៃ មន្ទីរពេទ្យបង្អែកខេត្តរតនគិរី រវាងរថយន្តលោក ហេង រតនា មន្ត្រីបំរើការងារនៅផ្នែករបួសវះកាត់ និង កុមារីម្នាក់ ដែលបណ្តាលឱ្យកុមារីនោះរងរបួសធ្ងន់។ ឧបទ្ទវហេតុនេះ កើតឡើងអំឡុងពេលរថយន្តលោក ហេង រតនា បើកបរមកកន្លែងធ្វើការក្នុងល្បឿនយឺតៗ លុះដល់កន្លែងកើតហេតុកុមារីនោះបានដើរចូល រថយន្តក្នុងទិសដៅស្របគ្នានៅចំណុចផ្លូវកោង។
ប្រភពបន្តថា ភ្លាមៗនោះ ក្រុមគ្រូពេទ្យបានអន្តរាគមន៍សង្គ្រោះ តែ ដោយស្ថានភាពអ្នកជំងឺកាន់តែធ្ងន់ ក្រុមគ្រូពេទ្យក៏បានបញ្ជូនកុមារីឈ្មោះ បឿន ចន្ធូ អាយុ ០៤ឆ្នាំ ទៅ ព្យាបាលបន្តនៅមន្ទីរពេទ្យគន្ធបុប្ផា ខេត្តសៀមរាប។ រថយន្តគិលានសង្គ្រោះបានបញ្ជូនកុមារីឈ្មោះ បឿន ចន្ទ អាយុ ០៤ឆ្នាំ ដែលរស់នៅភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ជិតដល់ទីរួមខេត្ត សៀមរាប កុមារីនោះបានទទួលមរណៈភាព។
ប្រភពបានបញ្ជាក់ថា ទាក់ទងករណីគ្រោះថ្នាក់ចរាចរណ៍នេះ ភាគីទាំងសងខាង ដែលមានការចូលរួមពីមន្ត្រីសមត្ថកិច្ចជំនាញ បានសម្របសម្រួល និងយល់ព្រមដោះស្រាយបញ្ចប់ ជាមួយគ្នារួចរាល់។
សាធារណជនលើកជាចម្ងល់ថា តើលោក ហេង រតនា មន្ត្រីបំរើការងារនៅមន្ទីរពេទ្យបង្អែកខេត្តរតនគិរីអាចរួចផុតពីសំណាញ់ច្បាប់បានយ៉ាងដូចម្ដេច ឬមួយគ្រាន់តែសងសំណងដល់ជនរងគ្រោះហើយ ចប់រឿង ឬយ៉ាងណា?។
ពាក់ព័ន្ធករណីគ្រោះថ្នាក់ចរាចរណ៍ខាងលើនេះ បើយោងតាមច្បាប់ ស្តីពី ចរាចរណ៍ផ្លូវគោកមាត្រា៨៥ បានចែងថា៖ ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី ១(មួយ)ឆ្នាំ ទៅ ៣(បី)ឆ្នាំ និងពិន័យជាប្រាក់ពី៤ ០០០ ០០០(បួនលាន) រៀលទៅ១៥ ០០០ ០០០ (ដប់ប្រាំលាន)រៀល និងអាចត្រូវផ្តន្ទាទោសដោយទោសបន្ថែមមួយឬច្រើន ដូចមានចែងក្នុងប្រភេទនៃទោសបន្ថែម នៃក្រមព្រហ្មទណ្ឌ។
អំពើល្មើសខាងលើនេះ ត្រូវផ្តន្ទាទោសដាក់ពន្ធនាគារពី២ (ពីរ)ឆ្នាំទៅ៥ (ប្រាំ)ឆ្នាំ និងពិន័យ ជាប្រាក់ ពី១០ ០០០ ០០០ (ដប់លាន)រៀលទៅ២៥ ០០០ ០០០ (ម្ភៃប្រាំលាន)រៀល កាលបើអំពើ នេះបានប្រព្រឹត្តក្នុង ករណីណាមួយដូចក្រោម៖ *ក-បើកបរដោយគ្មានបណ្ណបើកបរ ឬមានបណ្ណបើកបរ តែមិនត្រឹមត្រូវតាមប្រភេទយានយន្ត។ *ខ-ស្ថិតក្នុងស្ថានភាពស្រវឹងដោយមានអត្រាជាតិអាល់កុលចាប់ពី០,៤០(សូន្យក្បៀស សែសិប) មីលីក្រាមក្នុងមួយលីត្រខ្យល់ឬចាប់ពី០,៨០(សូន្យក្បៀសប៉ែតសិប)ក្រាមក្នុងមួយលីត្រ ឈាមឡើងទៅ។ *គ- បណ្តាលឱ្យមានស្លាប់មនុស្សច្រើននាក់។ *ឃ-រត់គេចខ្លួនពីកន្លែងកើតហេតុក្នុងគោលបំណងគេចវេសពីការទទួលខុសត្រូវ៕
