លោកប្រធានាធិបតី ដូណាល់ ត្រាំ៖ សម្ដេចធិបតី ហ៊ុន ម៉ាណែត ជាថ្នាក់ដឹកនាំដ៏ឆ្នើមមួយរូប ដែលផ្តល់តម្លៃលើជីវិតមនុស្ស និងស្រឡាញ់សន្តិភាព!

(ភ្នំពេញ)៖ លោកប្រធានាធិបតី ដូណាល់ ត្រាំ បានមានប្រសាសន៍ថា សម្ដេច ហ៊ុន ម៉ាណែត ជាថ្នាក់ដឹកនាំដ៏ឆ្នើមមួយរូប ដែលផ្តល់តម្លៃលើជីវិតមនុស្ស និងស្រឡាញ់សន្តិភា។

ការថ្លែងដូច្នេះរបស់លោក ដូណាល់ ត្រាំ ប្រធានាធិបតីសហរដ្ឋអាមេរិកនៅក្នុងលិខិតមួយច្បាប់ដែលលោកបានផ្ញើជូនចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដែលបណ្ដាញសារព័ត៌មាន The Mirror News ទើបទទួលបាននៅថ្ងៃទី២៨ ខែសីហា ឆ្នាំ២០២៥នេះ។

លោប្រធានាធិបតីសហរដ្ឋអាមេរិកបានបន្តថា លោកសូមអរគុណចំពោះលិខិតដ៏កក់ក្តៅរបស់សម្ដេចធិបតី ហ៊ុន ម៉ាណែត និងជាពិសេសការស្នើរូបលោកសម្រាប់ពានរង្វាន់ណូបែលសន្តិភាព។

លោកបានថ្លែងទៀតថា លោកមានកិត្តិយសក្រៃលែងដែលបានសន្ទនាជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដើម្បីរួមចំណែកបញ្ចប់ជម្លោះប្រដាប់អាវុធ ជាមួយប្រទេសថៃ។

លោកប្រធានាធិបតី ដូណាល់ ត្រាំ បានសង្កត់ធ្ងន់ថា ប្រទេសកម្ពុជាមានប្រវត្តិសាស្ត្រ និងវប្បធម៌ដ៏យូរអង្វែង និងសម្បូណ៌បែប។ លោកពិតជាមានមោទនភាពដែលបានចូលរួមជាផ្នែកមួយនៃកិច្ចព្រមព្រៀងបទឈប់បាញ់ដែលបានបញ្ចប់នូវសោកនាដកម្មនៃជម្លោះប្រដាប់អាវុធ និងបានសង្គ្រោះជីវិតមនុស្សរាប់ពាន់នាក់ ចាប់ពីពេលនេះតទៅ

លោក ដូណាល់ ត្រាំ បានបញ្ជាក់យ៉ាងយ៉ាងដូច្នេះថា យើងអាចផ្តោតការយកចិត្តទុកដាក់ជាមួយគ្នាលើការកសាងវិបុលភាព សម្រាប់ប្រជាជាតិដ៏អស្ចារ្យរបស់យើងទាំងពីរ៕