Breaking: កណ្ដាប់ដែករបស់លោកមេបញ្ជាការ សំ តុលា បញ្ជាឱ្យកម្លាំងកងរាជអាវុធហត្ថខេត្តកណ្ដាលស្រាវជ្រាវរហូតចាប់ឃាត់ខ្លួនឃាតកៈដែលបានយកចបជីកវ៉ៃស្ត្រីម្នាក់ឡើងផុងលលាដ៏ក្បាលស្លាប់ពេលបញ្ជូនទៅព្យាបាលនៅមន្ទីរពេទ្យ
(កណ្ដាល)៖ ក្រោមកណ្ដាប់ដៃដែករបស់លោកឧត្ដមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាលដោយបានសហការជាមួយកម្លាំងកងរាជអាវុធហត្ថខេត្តតាកែវបានបំបែកករណីហិង្សាដោយចេតនាមានស្ថានទម្ងន់ទោសដោយជនរងគ្រោះបានស្លាប់និងជនរងគ្រោះម្នាក់ទៀតបានរងរបួសធ្ងន់ដោយបានស្រាវជ្រាវឈានដល់ការឃាត់ខ្លួនជនសង្ស័យម្នាក់ឈ្មោះ ប៉ែន សុថារិទ្ធ ដែលបានធ្វើសកម្មភាពកាប់លើជនរងគ្រោះ កាលពីវេលាម៉ោង២១:១០នាទី ថ្ងៃទី២០ ខែសីហា ឆ្នាំ២០២៥ នៅចំណុចផ្លូវលំ ស្ថិតក្នុងភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្ដាល ។ នេះបើតាមប្រភពពីលោកឧត្ដមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាលដែលបានប្រាប់ឱ្យអង្គភាព The Mirror News ទទួលបាននៅរសៀលថ្ងៃទី២៥ ខែសីហា ឆ្នាំ២០២៥នេះ។
ប្រភពមន្ត្រីជំនាញកងរាជអាវុធហត្ថខេត្តកណ្ដាលបានឱ្យដឹងថា ជនរងគ្រោះមានចំនួន២នាក់៖ ទី១. ឈ្មោះ ម៉ាន់ សុគន្ធា ភេទស្រី អាយុ៤០ឆ្នាំ មុខរបរ លក់ដូរ បច្ចុប្បន្នរស់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្ដាល បានស្លាប់ពេលបញ្ជូនទៅព្យាបាលនៅមន្ទីរពេទ្យដោយសាររងរបួសក្បាលចំនួន៤កន្លែង និងដៃខាងស្តាំចំនួន១កន្លែង។ និងទី២. ឈ្មោះ កុយ ពៅ ភេទប្រុស អាយុ៥១ឆ្នាំ មុខរបរ កម្មករ បច្ចុប្បន្នរស់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្ដាល រងរបួសធ្ងន់ត្រង់ក្បាល១កន្លែង ជើងស្តាំ១កន្លែង និងដៃស្តាំ១កន្លែង កំពុងសំរាកព្យាបាលនៅមន្ទីរពេទ្យបង្អែកស្រុកកណ្តាលស្ទឹងត្រូវជាស្វាមីរបស់សពខាងលើ។
ប្រភពបន្តថា ជនសង្ស័យឈ្មោះ ប៉ែន សុថារិទ្ធ ភេទប្រុស អាយុ៣៣ឆ្នាំ មុខរបរមិនពិតប្រាកដ បច្ចុប្បន្នស្នាក់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្តាល និងម៉ូតូ១គ្រឿងរបស់ជនសង្ស័យត្រូវបានយករក្សាទុកនៅកន្លែង។
ពាក់ព័ន្ធករណីដ៏សាហាវព្រៃផ្សៃខាងលើនេះ បើតាមតាមចម្លើយរបស់ឈ្មោះ អឿន កញ្ញា ភេទស្រី អាយុ១៥ឆ្នាំ មុខរបរសិស្ស មានទីលំនៅភូមិត្រពាំងស្វា ឃុំទ្រា ស្រុកកណ្តាលស្ទឹង ខេត្តកណ្តាល បានបំភ្លឺឱ្យមន្ត្រីជំនាញកងរាជអាវុធហត្ថដឹងថា កាលពីល្ងាចថ្ងៃទី១៩ ខែសីហា ឆ្នាំ២០២៥ ជនរងគ្រោះ ម៉ាន់ សុគន្ឋា ត្រូវជាម្តាយបង្កើត បានប្រាប់គាត់ថា ជនសង្ស័យឈ្មោះ ប៉ែន សុថារិទ្ឋិ មួយរយះនេះបានគប់ដុំថ្មលើដំបូលផ្ទះជនរងគ្រោះរាល់ថ្ងៃ នឹងផ្តាំផ្ញើឱ្យខ្លួនមើលថែប្អូនផង ។ លុះដល់វេលាម៉ោង១៥:២០នាទី ថ្ងៃទី២០ ខែសីហា ឆ្នាំ២០២៥ ជនសង្ស័យបំរ៉ុងវ៉ៃប្អូនប្រុសជនរងគ្រោះតាមដងផ្លូវ ស្រាប់តែជនរងគ្រោះឃើញនឹងបានស្រែកឱ្យជនសង្ស័យ ហើយក៏បានឈ្លោះប្រកែកគ្នា បន្តិចបន្ទួច។ រហូតដល់ម៉ោងកើតហេតុខាងលើ ជនសង្ស័យបានធ្វើសកម្មភាពកាប់ជនរងគ្រោះ ចំក្បាលចំនួន៤កន្លែង និងដៃខាងស្តាំចំនួន១កន្លែង ក្រោយពីបញ្ចូនដល់មន្ទីរពេទ្យជនរងគ្រោះបានដាច់ខ្យល់ស្លាប់ ចំណែកប្តី ជនរងគ្រោះ បានរងរបួសធ្ងន់ ក្រោយធ្វើសកម្មភាពរួចរត់គេចខ្លួនបាត់។
ក្រោយទទួលព័ត៌មាន កម្លាំងជំនាញអាវុធហត្ថស្រុក សហការជាមួយ កម្លាំងនគរបាលស្រុក ចុះពិនិត្យកន្លែងកើតហេតុ និងស្រាវជ្រាវរកជនសង្ស័យមកចាត់ការតាមនីតិច្បាប់ ។
ក្រោយជំនាញធ្វើកោសល្យវិច័យរួច សពបានប្រប្រគល់ឲ្យក្រុមគ្រួសារធ្វើបុណ្យតាមប្រពៃណី ចំណែកជនរងគ្រោះជាប្តី កំពុងព្យាបាលនៅមន្ទីរពេទ្យបង្អែកស្រុកកណ្តាលស្ទឹង។ ហើយកម្លាំងជំនាញកំពុងចុះស្រាវជ្រាវ ស្វែងរកជនសង្ស័យ ចាត់ការតាមនីតិវិធី។
រហូតដល់ថ្ងៃទី២៥ ខែសីហា ឆ្នាំ២០២៥ក្រោមបទបញ្ជាយ៉ាងម៉ឺងម៉ាត់របស់លោកឧត្ដមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាល កម្លាំងជំនាញកងរាជអាវុធហត្ថស្រុកសហការជាមួយកម្លាំងអាវុធហត្ថស្រុកបាទីទើបបង្ក្រាបនិងចាប់ឃាត់ជនសង្ស័យឈ្មោះ ប៉ែន សុថារិទ្ធ ភេទប្រុស អាយុ៣៣ឆ្នាំ មុខរបរមិនពិតប្រាកដ នៅចំណុចភូមិត្រពាំងស្វា ឃុំទ្រា ស្រុកកណ្តាលស្ទឹង ខេត្តកណ្តាល ជាប់ព្រំប្រទល់ស្រុកបាទី ខេត្តតាកែវ នាំខ្លួនយកមកសាកសួរនៅអង្គភាព។
ក្រោយពីសាកសួរ កម្លាំងជំនាញបានសហការជាមួយកម្លាំងអាវុធហត្ថស្រុកបាទី ខេត្តតាកែវ នាំខ្លួនជនសង្ស័យទៅចង្អុលបង្ហាញ និងចាប់យកវត្ថុតាង ដោយមានចបជីកដែក ប្រវែង ០,៧៧ស.ម ដែលជនសង្ស័យយកទៅលាក់ទុកក្រោយធ្វើសកម្មភាព នៅចំណុចភូមិបាទី ឃុំក្រាំងធ្នង់ ស្រុកបាទី ខេត្តតាកែវ ។
ជនសង្ស័យបានសារភាពថា នៅវេលាម៉ោងកើតហេតុខ្លួនកំពុងដេកនៅក្នុងផ្ទះ ដែលផ្ទះនៅទល់មុខគ្នា ជនរងគ្រោះជាប្រពន្ធ បានស្រែកជេរម៉ែខ្លួន ពេលនោះធ្វើឲ្យខ្លួនខឹង បានយកចបជីកធ្វើពីដែកប្រវែងប្រហែលជិតមួយម៉ែត្រ កាន់ដើរទៅដល់មុខផ្ទះជនរងគ្រោះ ពេលនោះ ជនរងគ្រោះជាប្តីបានចេញមក ខ្លួនបានវាយចំនួន៣ចបជីក ធ្វើពីដែកចំក្បាល១ចបជីក ជើង១ចបជីក ដៃ១ចបជីក បានរត់គេចទៅខាងកើតផ្ទះ ហើយជនរងគ្រោះជាប្រពន្ធបានចេញមកចាប់ខ្លួនពីក្រោយ ខ្លួនក៏បានវាយចំនួន៥ចបជីក ទៅលើជនរងគ្រោះជាប្រពន្ធចំក្បាល មិនដឹងស្លាប់ឬរស់ទេ ក្រោយធ្វើសកម្មភាពរួច បានកាន់ចបជីកដើរទៅយកម៉ូតូនៅផ្ទះ ហើយជិះគេចខ្លួនទៅយកម៉ូតូទៅទុក នៅផ្ទះម្តាយនៅភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ ហើយរត់ទៅសំងំលាក់ខ្លួនក្នុងព្រៃក្រោយភូមិ រហូតដល់ថ្ងៃសមត្ថកិច្ចចាប់ខ្លួនបានតែម្តង៕
