សាលាដំបូងខេត្តកំពង់ចាមបញ្ជូនម៉ូតូ១០០គ្រឿងជូនដល់វីរកងទ័ពជួរមុខការពារទឹកដី

(ភ្នំពេញ)៖ ប្រធានសាលាដំបូងខេត្តកំពង់ចាម លោក សួស ឡា បានបញ្ជូនម៉ូតូចម្រុះម៉ាកចំនួន ១០០គ្រឿង ដល់វីរកងទ័ពជួរមុខ។ ម៉ូតូចម្រុះទាំង ១០០គ្រឿងនេះ គឺជាវត្ថុចាប់យកត្រូវរឹបអូសជាសម្បត្តិរដ្ឋចូលជាស្ថាពរ​នៃរដ្ឋបាលសាលាខេត្តកំពង់ចាម។

តាមរយៈសកម្មភាពនេះ​សាលាដំបូងខេត្តំពង់ចាម ជាស្ថាប័នដំបូង ដែលបានបញ្ជូនវត្ថុតាងចាប់យក និងត្រូវបានរឹបអូសជាសម្បត្តិរដ្ឋចូលជាស្ថាពរ ជូនដល់វីរកងទ័ពជួរមុខការពារទឹកដី។ កាយវិការនេះជាគំរូមួយដ៏ល្អ សម្រាប់ស្ថាប័នតុលាការដទៃទៀតយកលំនាំតាមក្នុងការបញ្ជូនវត្ថុតាងចាប់យក និងត្រូវបានរឹបអូសជាសម្បត្តិរដ្ឋចូលជាស្ថាពរ ដើម្បីបម្រើជាប្រយោជន៍ជាតិជូនដល់វីរៈកងទ័ពជួរមុខដែលកំពុងត្រូវការក្នុងប្រើប្រាស់។

គួរជម្រាបជូនថា ការប្រគល់ជូនកងទ័ពកម្ពុជាកំពុងការពារទឹកដីនេះ គឺមានការឯកភាពពីក្រសួងយុត្តិធម៌ និងក្រសួងសេដ្ឋកិច្ចនិងហិរញ្ញវត្ថុ។

គួររំលឹកថា កាលពីថ្ងៃទី២១ ខែសីហា ឆ្នាំ២០២៥ លោក អ៊ុន ចាន់ដា អភិបាលខេត្តកំពង់ចាម បានប្រគល់ម៉ូតូនោះ បន្តជូនទៅតំណាងកងយុទ្ធពលខេមរភូមិន្ទ កងពលធំលេខ៣ ចំនួន៥០គ្រឿង។

នៅចំពោះមុខអ្នកសារព័ត៌មាន អ្នកមុខ អ្នកការ លោកអភិបាលខេត្ត និងតំណាងកងពលធំលេខ៣ បានសម្តែងនូវទឹកចិត្តរីករាយ ថ្លែងអំណរគុណដ៏ជ្រាលជ្រៅបំផុតចំពោះ ឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ ដែលបានយកចិត្តទុកដាក់ដល់សមរភូមិជួរមុខ សម្របសម្រួលផ្តល់នូវម៉ូតូចំនួន ១០០គ្រឿង ដែលជាតម្រូវការចាំបាច់បំផុតក្នុងការដឹកជញ្ជូនស្បៀងជូនដល់យុទ្ធជននៅលេណដ្ឋានជួរមុខ៕