ថៅកែគេហទំព័រសាន់ដេធីវីអនឡាញយករូបភាពចាស់មកផ្សាយថា «មហាជនសំណូមពរដល់លោក ចេង ឌីណា មេត្តាជួយបង្ក្រាបទីតាំងមាន់ជល់ដីកំពុងលេងនៅក្បែរល្អឥដ្ឋក្នុងភូមិ-ឃុំព្រះប្រសប់ស្រុកខ្សាច់កណ្ដាល» តាមពិតគឺមិនមានអ្នកលេងនោះទេ

(កណ្ដាល)៖ បន្ទាប់ពីថៅកែគេហទំព័រសាន់ដេធីវីអនឡាញ ឈ្មោះ​ ស៊ាន ប៊ុនសុង បានចុះផ្សាយអត្ថបទមួយដាក់ចំណងជើងថា «មហាជនសំណូមពរដល់លោក ចេងឌីណា មេត្តាជួយបង្ក្រាបទីតាំងមាន់ជល់ដីកំពុងលេងនៅក្បែរល្អឥដ្ឋក្នុងភូមិ-ឃុំព្រះប្រសប់ស្រុកខ្សាច់កណ្ដាល»​ ភ្លាមៗនោះ លោក ចេង ឌីណា អភិបាលស្រុកខ្សាច់កណ្ដាលបានបញ្ជាឱ្យលោកវរសេនីយ៍ឯក ម៉ែន សុខឃឿន អធិការនៃអធិការដ្ឋានគនរបាលស្រុកដឹកនាំកម្លាំងចុះទៅស្រាវជ្រាវដល់ទីតាំងខាងលើនោះភ្លាមៗ ប៉ុន្តែកម្លាំងជំនាញពុំបានឃើញមានការលេងជល់មាន់ដីដូចការចុះផ្សាយរបស់គេហទំព័រសាន់ដេធីវីអនឡាញនោះទេ។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី១៤ ខែសីហា ឆ្នាំ២០២៥នេះ។

ប្រភពបន្តថា ចំពោះរូបភាពដែលថៅកែគេហទំព័រសាន់ដេធីវីអនឡាញយកទៅចុះផ្សាយគឺជារូបភាពចាស់។​

ប្រភពពីលោកវរសេនីយ៍ឯក ម៉ែន សុខឃឿន អធិការដ្ឋានគនរបាលស្រុកខ្សាច់កណ្ដាលបានអះអាងថា ពាក់ព័ន្ធសារព័ត៌មានចុះផ្សាយខាងលើនេះ មិនមានទេនៅតាមគោលដៅទាំងអស់នោះ ព្រោះលោកបានឱ្យកម្លាំងចុះដល់គោលដៅអស់ហើយ មានទាំងកម្លាំងយុត្តិធម៌ និងកម្លាំងប៉ុស្តិ៍។ លោកអធិការបន្តអះអាងថា ចំពោះរូបភាពដែលដាក់ក្នុងការចុះផ្សាយនោះគឺជារូបភាពចាស់ទេ។

បើតាមលោក ចេង ឌីណា អភិបាលស្រុកខ្សាច់កណ្ដាលក៏បានបំភ្លឺឱ្យអង្គភាពThe Mirror News ដឹងផងដែរថា ទីមួយ ចំពោះទីតាំងនិងរូបភាពដែលថៅកែថៅកែគេហទំព័រសាន់ដេធីវីអនឡាញ ឈ្មោះ​ ស៊ាន ប៊ុនសុង យកទៅចុះផ្សាយគឺជាទីតាំងចាស់និងរូបភាពចាស់ ព្រោះលោកបានឱ្យកម្លាំងអធិការដ្ឋាននគរបាលចុះទៅស្រាវជ្រាវហើយគឺថា មិនមានលេងដូចការចុះផ្សាយរបស់គេហទំព័រសាន់ដេធីវីអនឡាញនោះទេ សូមកុំមានការភាន់ច្រឡំ៕