រដ្ឋមន្ត្រី នេត្រ ភក្ត្រា៖ ដំណើរនៃការឆ្ពោះទៅមុខក្នុងការអភិវឌ្ឍប្រទេសជាតិឱ្យមានការរីកចម្រើន ដូច្នេះគឺចាំបាច់បំផុតត្រូវការមូលធនមនុស្សប្រកបដោយគុណភាព ដើម្បីធ្វើការប្រកួតប្រជែងខ្ពស់
(ភ្នំពេញ)៖ លោក នេត្រ ភក្ត្រា បានគូសបញ្ជាក់ថា ដំណើរនៃការឆ្ពោះទៅមុខក្នុងការអភិវឌ្ឍប្រទេសជាតិឱ្យមានការរីកចម្រើន ដូច្នេះគឺចាំបាច់បំផុតត្រូវការមូលធនមនុស្សប្រកបដោយគុណភាព ដើម្បីធ្វើការប្រកួតប្រជែងខ្ពស់។ កម្ពុជា បានដាក់បង្គោលចររួចទៅហើយ ដើម្បីសម្រេចបង្គោលចរចំនួន២ នៅក្នុងរយៈពេល២៥ឆ្នាំ ដូចនេះ មូលធនមនុស្ស គឺជាអាទិភាពគន្លឹះទី១ សម្រាប់រាជរដ្ឋាភិបាលកម្ពុជា នីតិកាលទី៧ ដែលដឹកនាំដោយសម្តេចបវរធិបតី ហ៊ុន ម៉ាណែត ក្នុងការជំរុញសេដ្ឋកិច្ច ឱ្យសម្រេចបាននូវគោលដៅរបស់កម្ពុជានៅឆ្នាំ២០៣០ និងធ្វើឱ្យកម្ពុជាក្លាយជាប្រទេសមានចំណូលខ្ពស់នៅឆ្នាំ២០៥០។
ការគូសបញ្ជាក់របស់រដ្ឋមន្ត្រីក្រសួងព័ត៌មាន បានធ្វើឡើងក្នុងឱកាសលោករដ្ឋមន្ត្រីអញ្ជើញបើកវគ្គបណ្តុះបណ្តាលស្តីពី «ការលើកកម្ពស់ការអនុវត្តច្បាប់ និងការគ្រប់គ្រងរដ្ឋបាលផ្ទៃក្នុង» នៅព្រឹកថ្ងៃទី១១ ខែសីហា ឆ្នាំ២០២៥នេះ។
លោករដ្ឋមន្ត្រីបានបញ្ជាក់ទៀតថា មូលធនមនុស្សប្រកបដោយសមត្ថភាពខ្ពស់ មិនត្រឹមតែមានចំណេះដឹងតែមួយប៉ុណ្ណោះទេ ប៉ុន្តែ ត្រូវមានសមត្ថភាពគ្រប់គ្រាន់ ច្បាស់លាស់ មានស្នាដៃ មានសីលធម៌ មានគុណធម៌ មានសុជីវធម៌ និងមានសុខភាពល្អ។
លោករដ្ឋមន្ត្រី នេត្រ ភក្ត្រា បានបន្តលើកឡើងថា ក្រសួង ស្ថាប័នទាំងអស់ ដែលចំណុះឱ្យរាជរដ្ឋាភិបាល គឺបានរៀបចំផែនការជាច្រើនដើម្បីអភិវឌ្ឍន៍ធនធានមនុស្សនៅក្រសួង ស្ថាប័នរបស់ខ្លួន ឱ្យដើរស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល និងចក្ខុវិស័យរបស់រាជរដ្ឋាភិបាល ដើម្បីឈានទៅសម្រេចឱ្យមាននូវការកសាងមូលធនមនុស្សប្រកបដោយគុណភាពខ្ពស់។ លោកបន្ថែមថា នៅពេលប្រទេសអភិវឌ្ឍន៍ ធនធានមនុស្សមិនអាចខ្វះបានជាដាច់ខាត ធនធានមនុស្សមិនអាចធ្វើការងារដោយចុងដៃ ចុងជើងនោះទេ។
លោករដ្ឋមន្ត្រីបានបន្តទៀតថា ប្រទេសជាតិរីកចម្រើន គឺចាំបាច់បំផុតធនធានមនុស្ស ដូច្នេះហើយនៅក្នុងក្របខណ្ឌនេះក្រសួងព័ត៌មាន បានរៀបចំផែនការយុទ្ធសាស្រ្ត ក្នុងការកសាង និងអភិវឌ្ឍន៍មូលធនមនុស្ស ដែលសំដៅលើធនធានមនុស្សប្រកបដោយសមត្ថភាព ទេពកោសល្យ គោរពវិជ្ជាជីវៈ និងភាពច្នៃប្រឌិត ជាកត្តាគន្លឹះ និងមានសក្តានុពលដែលគាំទ្រដល់គ្រប់ដំណើរការអភិវឌ្ឍន៍ ពីព្រោះថាស្ថាប័ននីមួយៗ មិនអាចដំណើរការបានប្រកបដោយគុណភាព ប្រសិទ្ធភាព ស័ក្តិសិទ្ធិភាព និងផលិតភាពឡើយ ប្រសិនបើគ្មានធនធានមនុស្សដែលមានគុណវុឌ្ឍខ្ពស់ និងកិច្ចខិតខំប្រឹងប្រែងអនុវត្តការងារដោយប្រកាន់ខ្ជាប់នូវក្រមសីលធម៌ និងវិជ្ជាជីវៈ។
សូមរំលឹកថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាក៏ធ្លាប់បានថ្លែងថា «កម្ពុជាមិនអាចក្លាយជាប្រទេសអ្នកមានបានទេ ប្រសិនបើធនធានមនុស្ស ពុំមានចំណេះដឹង និងសមត្ថភាព ជំនាញ ពុំអាចប្រកួតប្រជែងនៅលើឆាកអន្តរជាតិ ពុំមានសុខភាពល្អគ្រប់គ្រាន់ និងពុំមានសមត្ថភាព ចូលរួមកសាងមូលដ្ឋាននៃសង្គម សេដ្ឋកិច្ច និងឧស្សាហកម្ម ដែលផ្អែកលើចំណេះដឹង។ ដូច្នេះ មិនមែនជាការចៃដន្យឡើយ ដែលយុទ្ធសាស្ត្របញ្ចកោណ-ដំណាក់កាលទី១ បានកំណត់យកអាទិភាព គន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ពោលគឺយកកត្តាមនុស្សជាអាទិភាពខ្ពស់បំផុត»៕
