ក្រុមអនុព័ន្ធយោធាបរទេស១៤រូប មកពី៩ប្រទេសនឹងទៅកាន់ខេត្តឧត្តរមានជ័យដើម្បីពិនិត្យស្ថានភាពជាក់ស្តែងនៅព្រំដែន និងជនភៀសសឹក ក្រោយកម្ពុជាអនុវត្តយ៉ាងពេញលេញលើបទឈប់បាញ់គ្នារវាងកងទ័ពកម្ពុជា និងថៃ

(ភ្នំពេញ)៖ អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតិ បានឱ្យដឹងថា នៅថ្ងៃទី១០ ខែសីហា ឆ្នាំ២០២៥នេះ ក្រុមអនុព័ន្ធយោធាបរទេស ១៤រូប មកពី៩ប្រទេស នឹងទៅកាន់ខេត្តឧត្តរមានជ័យ ដើម្បីពិនិត្យស្ថានភាពជាក់ស្តែងនៅព្រំដែន និងជនភៀសសឹក ក្រោយកម្ពុជាអនុវត្តយ៉ាងពេញលេញលើបទឈប់បាញ់គ្នារវាងកងទ័ពកម្ពុជា និងថៃ។

គួរជម្រាបថា កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅម៉ាឡេស៊ី បានធ្វើឡើងដើម្បីអនុវត្តកិច្ចព្រមព្រៀងដែលបានឯកភាពគ្នាកាលពីថ្ងៃទី២៨ ខែកក្កដា ឆ្នាំ២០២៥ រួមមានការបន្តបទឈប់បាញ់ ការមិនចល័តកម្លាំងទ័ព និងការបង្កើតក្រុមអ្នកសង្កេតការណ៍អាស៊ានដឹកនាំដោយម៉ាឡេស៊ី ដើម្បីត្រួតពិនិត្យការអនុវត្តបទឈប់បាញ់។ ភាគីទាំងពីរបានប្តេជ្ញាចិត្តក្នុងការកាត់បន្ថយភាពតានតឹង ការទប់ស្កាត់ព័ត៌មានក្លែងក្លាយ និងការចាត់តាំងគណៈកម្មាធិការព្រំដែនក្នុងតំបន់ (RBC) ដើម្បីសម្របសម្រួលការអនុវត្តបទឈប់បាញ់។ ភាគីកម្ពុជាបានស្នើសុំឱ្យដោះលែងយោធិនកម្ពុជាដែលស្ថិតក្នុងការឃុំឃាំងរបស់កងទ័ពថៃផងដែរ។

ការឱ្យដឹងបែបនេះ របស់អ្នកនាំពាក្យក្រសួងការពារជាតិ បានធ្វើឡើងនៅក្នុងឱកាសបន្តធ្វើសន្និសីទសារព័ត៌មានរៀបចំសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី១០ ខែសីហា ឆ្នាំ២០២៥នេះ។

អ្នកនាំពាក្យក្រសួងការពារជាតិ បានឱ្យដឹងយ៉ាងដូច្នេះថា៖ «នៅថ្ងៃទីអាទិត្យទី១០ ខែសីហា ឆ្នាំ២០២៥នេះ ក្រុមអនុព័ន្ធយោធាបរទេស ប្រចាំព្រះរាជាណាចក្រកម្ពុជា MACPP ដែលមាននិវេសនដ្ឋានស្ថិតនៅក្នុង និងក្រៅប្រទេសកម្ពុជា បានចេញដំណើរពីរាជធានីភ្នំពេញ ឆ្ពោះទៅខេត្តឧត្តរមានជ័យ ដើម្បីពិនិត្យស្ថានភាពជាក់ស្តែង និងទីតាំងស្នាក់នៅរបស់ជនភៀសសឹកក្រោយកម្ពុជា ចូលរួមអនុវត្តបទឈប់បាញ់យ៉ាងពេញលេញលេញដោយមានវត្តមានមកពីប្រទេសចំនួន៩ មានចំនួន១៤រូប បានចូលរួម»។

អ្នកនាំពាក្យក្រសួងការពារជាតិ ឱ្យដឹងថា នៅក្នុងចំណោមអនុព័ន្ធយោធាទាំង៩ ប្រទេស រួមមាន៖ អនុព័ន្ធយោធាមកពីប្រទេសអូស្ត្រាលី, អនុព័ន្ធយោធាចក្រភពអង់គ្លេស, អនុព័ន្ធយោធាកាណាដា អនុព័ន្ធយោធាចិន អនុព័ន្ធយោធាបារាំង អនុព័ន្ធយោធាជប៉ុន អនុព័ន្ធយោធាកូរ៉េខាងត្បូង អនុព័ន្ធយោធាឡាវ និងអនុព័ន្ធយោធាវៀតណាម។

ជាមួយគ្នានេះដែរ លោកស្រីឧត្តមសេនីយ៍ឯក ម៉ាលី សុជាតា បានថ្លែងថា ពិធីនេះចុះពិនិត្យស្ថានភាពជាក់ស្តែងនៅតាមព្រំដែនរបស់អនុព័ន្ធយោធាបរទេសទាំង៩ប្រទេស ដឹកនាំដោយមានឧត្តមសេនីយ៍ឯក ផាត វិបុលសុភ័ក្ត្រ អគ្គនាយករង អគ្គនាយកដ្ឋាននយោបាយ និងកិច្ចការបរទេស និងជានាយក នាយកដ្ឋានទាក់ទងអន្តរជាតិ ក្រសួងការពារជាតិ រួមនឹងនាយទាហាន ក្រសួងការពារជាតិ និងកងទ័ពជើងគោកជាច្រើនរូបទៀត។ ដើម្បីធានាថាបេសកកម្មនេះនឹងប្រព្រឹត្តទៅដោយរលូន។ ការចូលរួមរបស់ប្រទេសដៃគូទាំងនេះ គឺជាការឆ្លុះបញ្ចាំងឱ្យឃើញពីបំណងប្រាថ្នារួម ក្នុងការធ្វើឱ្យបទឈប់បាញ់ទទួលបានជោគជ័យ និងយូរអង្វែង ជាមួយនឹងគោលដៅនាំមកវិញនូវសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍសម្រាប់ប្រជាជននៃប្រទេសទាំងពីរ។

គួរឱ្យដឹងថា ដំណើរបេសកកម្មចុះពិនិត្យនៅតាមព្រំដែន និងជំរុំភៀសសឹករបស់អនុព័ន្ធយោធាបរទេសនេះ គឺបានកើតចេញពីលទ្ធផលបន្តពីកិច្ចប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥កន្លងទៅនេះ នៅប្រទេសម៉ាឡេស៊ី និងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) នៅថ្ងៃទី៧ ខែសីហា ឆ្នាំ២០២៥ថ្មីៗនេះ ដោយបានឯកភាពគ្នាអនុវត្តឱ្យបានពេញលេញនូវបទឈប់បាញ់រវាងកងទ័ពប្រទេសកម្ពុជា និងថៃ។

ភាគីកម្ពុជា គឺនៅតែបន្តការប្តេជ្ញាចិត្តយ៉ាងម៉ឹងម៉ាត់ និងច្បាស់លាស់បំផុតនូវការប្តេជ្ញាចិត្តឥតងាករេរបស់ខ្លួនក្នុងការគោរព និងអនុវត្តឱ្យបានខ្ជាប់ខ្ជួននូវលក្ខខណ្ឌនៃកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នារវាងភាគីទាំងពីរ ​នៅក្នុងកិច្ចប្រជុំវិសាមញ្ញគណៈកម្មាធិការកិច្ចព្រំដែទូទៅ (GBC) កាលពីថ្ងៃទី៧ ខែរសីហា ឆ្នាំ២០២៥ ថ្មីៗនេះ ដោយធ្វើការជាមួយភាគីថៃ ប្រទេសម៉ាឡេស៉ី សមាជិកអាស៊ាន និងដៃគូពាក់ព័ន្ធទាំងអស់ ដើម្បីធានាថាការអនុវត្តបទឈប់បាញ់ប្រកបដោយប្រសិទ្ធភាព ពេញលេញ និងដោះស្រាយរាល់វិវាទដោយសន្តិវិធី ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន៕