ក្រុមប៉ូលិសព្រហ្មទណ្ឌក្រុងតាខ្មៅចាប់បានបុរសម្ចាស់PassAppម្នាក់ ក្រោយលួចកាបូប យកលុយ និងសម្ភារៈមានតម្លៃជាច្រើនរបស់ជនរងគ្រោះ រួចដុតកាបូបកម្ទេសចោល បំបាត់ដាន
(កណ្ដាល)៖ ក្រុមមន្ត្រីនគរបាលផ្នែកព្រហ្មទណ្ឌនៃអធិការដ្ឋាននគរបាលក្រុងតាខ្មៅ ដឹកនាំដោយលោកវរសេនីយ៍ឯក យី វណ្ណដា អធិការនគរបាលក្រុងពិតជាមានជំនាញនិងធ្វើការបានលឿនរហ័សជូនប្រជាពលរដ្ឋរងគ្រោះនៅក្នុងមូលដ្ឋានប្រាកដមែន ដោយបង្ក្រាបបានជនសង្ស័យជាម្ចាស់PassAppម្នាក់ភ្លាមៗបន្ទាប់ពីជនរងគ្រោះបានដាក់ពាក្យបណ្ដឹងនៅអធិការដ្ឋាននគរបាលក្រុងតាខ្មៅកាលពីថ្ងៃទី០៧ ខែសីហា ឆ្នាំ២០២៥ម្សិលមិញនេះ។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី០៩ ខែសីហា ឆ្នាំ២០២៥នេះ។
ប្រភពបានឱ្យដឹងបន្តថា ជនសង្ស័យមានឈ្មោះ ប៊ុន ណារុន ភេទប្រុស អាយុ៣៨ឆ្នាំ ជនជាតិខ្មែរ មុខរបរ រត់ផាសអាប់ ទីកន្លែងកំណើត សង្កាត់លេខ២ ទីរួមខេត្ត ខេត្តកំពង់ឆ្នាំង បច្ចុប្បន្ន ផ្ទញលេខ E2257 ផ្លូវ០៤ ភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ជាម្ចាស់ PassApp ពាក់ស្លាកលេខ PP.1IC.4237 ពណ៌ស និងមានលេខសម្គាល់ខ្លួន P41645 ដោយកាលពីវេលាម៉ោង៦និង៥៩នាទីយប់ថ្ងៃទី០៧ ខែសីហា ឆ្នាំ២០២៥បានដឹកស្ត្រីជាជនរងគ្រោះពីក្រុងតាខ្មៅទៅផ្ទះស្ថិតនៅក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដោយជនរងគ្រោះបានភ្លេចកាបូបដាក់ឯកសារមួយ មានប្លង់ដី ឯកសារជួលផ្ទះ សោផ្ទះ លុយជិត១០០០ដុល្លារ និងមានរបស់របរមានតម្លៃមួយចំនួនទៀត នៅក្នុង PassApp ដែលខ្លួនបានកក់ជិះទៅផ្ទះ ប៉ុន្តែជនសង្ស័យមិនបានយកមកឱ្យគាត់វិញភ្លាមៗនោះទេ ស្រាប់តែបិទទូរស័ព្ទទាក់ទងលែងបានតែម្ដង រហូតដល់ម៉ោងប្រមាណជា១១ព្រឹកថ្ងៃទី០៨ ខែសីហា ឆ្នាំ២០២៥ ទើបខលចូល តែជនសង្ស័យបានព្យាយាមនិយាយប្រកែកជាច្រើនលើកច្រើនសារដោយគ្មានការទទួលខុសត្រូវ និងបានហុចទូរស័ព្ទទៅប្រពន្ធរបស់ខ្លួនជួយនិយាយជំនួសថែមទាំងបានគំរាមប្ដឹងជនរងគ្រោះវិញទៀត ទើបជនរងគ្រោះបានសម្រេចចិត្តដាក់ពាក្យបណ្តឹងទៅកាន់លោកអធិការនៃអធិការដ្ឋាននគរបាលក្រុងតាខ្មៅតែម្ដង។
បើយោងតាមពាក្យបណ្ដឹងដែលអង្គភាព The Mirror News បានឱ្យដឹងថា នាងខ្ញូំសុំប្ដឹងម្ចាស់ PassApp ស្លាកលេខ PP.1IC.4237 ពណ៌ស ដែលមានលេខសម្គាល់ខ្លួន P41645 និងមានលេខទូរស័ព្ទ 015 379 681 ពីបទលួចយកកាបូបនាងខ្ញុំដោយចេតនា។ ដោយកាលពីវេលាម៉ោង១៩និង១៤នាទី យប់ថ្ងៃទី៧ ខែសីហា ឆ្នាំ២០២៥ នាងខ្ញុំបានធ្វើការកក់ (Booking) PassApp ស្លាកលេខ PP.1IC.4237 ពណ៌ស មានលេខសម្គាល់ខ្លួន P41645 និងលេខទូរស័ព្ទ 015 379 681 ពីចំណុចផ្លូវជាតិលេខ២១បេ ភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្ដាលដើម្បីជិះទៅផ្ទះនាងខ្ញុំ នៅផ្លូវលំចូលវត្តគល់ទទឹង ស្ថិតក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដោយបានភ្លេចកាបូបដាក់ឯកសារមួយ ដោយមានប្លង់ដី ឯកសារជួលផ្ទះ សោផ្ទះ លុយជិត១០០០ដុល្លារ និងមានរបស់របរមានតម្លៃមួយចំនួនទៀត នៅក្នុង PassApp ខាងលើ ហើយ ម្ចាស់ PassAppនេះ មិនបានយកមកឱ្យនាងខ្ញុំវិញភ្លាមៗនោះទេ ដោយមិនបានទទួលខុសត្រូវចំពោះសម្ភារៈរបស់អតិថិជនដែលបានភ្លេចនៅលើ PassApp របស់ខ្លួនឡើយ។
ប្រភពច្បាស់ការណ៍បានឱ្យដឹងថា ជនសង្ស័យបានសារភាពថា គេពិតជាបានឃើញជនរងគ្រោះភ្លេចកាបូបនៅលើPassApp របស់ខ្លួនមែន តែគេបានយកទៅដុតកម្ចេចចោលអស់ហើយ ដោយបានយកតែលុយប៉ុណ្ណោះ៕
