លោក ប៉ែត សារ៉ាត់ អនុប្រធានមន្ទីរ តំណាងដ៏ខ្ពង់ខ្ពស់ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូន ខេត្តកណ្ដាល យកអំណោយសប្បុរសធម៌មកចែកជូនបងប្អូនវីរកងទ័ពជួរមុខ ឈរជើងការពារបូរណភាពទឹកដីនៅចំនុចប្រាសាទតាមាន់

(ឧត្ដរមានជ័យ)៖ នៅថ្ងៃទី៣១ ខែកក្កដា ឆ្នាំ ២០២៥នេះ លោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្ដាល បានដឹកនាំក្រុមការងារ ស.ស.យ.ក វិស័យសាធារណការ តំណាងដ៏ខ្ពង់ខ្ពស់លោកប្រធានមន្ទីរយកអំណោយសប្បុរសធម៌របស់មន្ទីរ មកចែកជូនដល់បងប្អួនវីរកងទ័ព ដែលកំពុងតែឈរជើងយ៉ាងរឹងមាំក្នុងការថែរក្សាបូរណៈភាពទឹកដី នៅតំបន់ប្រាសាទតាមាន់។

អំណោយដែលបាននាំមកចែកជូនរួមមាន៖ សាច់គោ ត្រីខ មី កាហ្វេ គ្រឿងឧបភោគបរិភោគ និងថវិកាមួយចំនួន ដែលបានមកពីមន្ត្រីរាជការ សមាជិក ស ស យ ក និងសមាជិកយុវជនគណបក្សនៃមន្ទីរសាធារណការនិងដឹកជញ្ជូនខេត្តកណ្ដាល។ ដោយមានការអញ្ជើញចូលរួមពីឯកឧត្ដម នាក់ វង្ស ផងដែរ។

នាឱកាសនោះ លោកប៉ែត សារ៉ាត់ បានសំណេះសំណាលជាមួយបងប្អូនវីរកងទ័ពដែលបានកំពុងឈរជើងការពារទឹកដីពីការឈ្លានពានរបស់សត្រូវនៅជួរមុខ។លោកបន្តថា កម្ពុជាមិនចង់ឃើញសង្គ្រាមនោះទេ ព្រោះសង្រ្គាមបានធ្វើឲ្យយើងទទួលរងទុក្ខលំបាក វេទនា បែកបាក់គ្រួសារ ឃ្លៀតឆ្ងាយ និងបាត់បង់មនុស្សជាទីស្រលាញ់ផងដែរ។ លោកបន្តទៀតថា សង្រ្គាមបានបន្សល់នូវទុកវិនាសកម្មជាច្រើន ធ្វើឱ្យប្រជាពលរដ្ឋទទួលរងទុក្ខលំបាក វេទនា អន្តរាយ ឈឺចាប់ ខ្លោចផ្សាណាស់ សោកសៅ ទ្រហោយំ ព្រាត់ប្រាស់ និរាសចាកអ្វីៗគ្រប់យ៉ាងទាំងអស់ មិនថា ប្រទេស តូច ឬធំ និងមានឬ ក្រ នោះឡើយ។

ក្នុងឱកាសនោះ លោក​ ប់ែត សារ៉ាត់ ក៏បានសំណូមពរដល់បងប្អូនប្រជាពលរដ្ឋទាំងអស់ឱ្យស្រឡាញ់សុខសន្តិភាព និងអរគុណសន្តិភាព ព្រោះសន្តិភាពនេះ ជាសេចក្តីសុខរបស់យើងទាំងអស់គ្នា សូមកុំឱ្យមានសង្រ្គាម ទើបយើងនាំគ្នាបួងសួងសុំសន្តិភាព បើមានប្រទេសមានសន្តិភាពទើបមានការអភិវឌ្ឍន៍គ្រប់វិស័យ។ លោកបន្តឱ្យដឹងទៀតថា ប្រទេសយើងត្រូវប្រទេសថៃឈ្លានពាន រំលោភបំពានក៏ដោយ ក៏មេដឹងនាំយើងនៅតែអត់ធ្មត់ ទប់ចិត្ត ប្រុងកងទ័ពយ៉ាងរឹងមាំ ប្រើបញ្ញា ស្មារតី ចរចា និងការទូតដ៏ឈ្លាសវៃ ដើម្បីដោះស្រាយបញ្ហាដោយសន្តិវិធី។

លោកក៏បានសំណូមពរដល់បងប្អូនប្រជាពលរដ្ឋខ្មែរទាំងអស់ ត្រូវរួបរួមសាមគ្គីជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាង ពេលបានឃើញប្រទេសជាតិ មានសន្តិភាពនោះទេ ឃើញបងប្អូនបានរស់នៅជួបជុំគ្រួសារ ពោរពេញទៅដោយស្នាមញញឹមគ្រប់ៗគ្នា។

លោក ប៉ែត​ សារ៉ាត់ អនុប្រធានមន្ទីរសាធារណការនិងដឹកជញ្ជូនខេត្តកណ្ដាល ក៏បានបួងសួងសូមអោយប្រទេសកម្ពុជា មានសុខសន្តិភាពដូចមុន និងសូមអោយកងទ័ពជួរមុខទាំងអស់ មានសុវត្ថិភាព និងបានជួបជុំគ្រួសារ ព្រមទាំងសូមឱ្យប្រជាពលរដ្ឋបានសុខសប្បាយ និងបានត្រលប់ទៅភូមិឋានរបស់ខ្លួន និងសូមឱ្យបដិសន្ធិវិញ្ញាណរបស់វីរៈកងទ័ព ដែលបានពលីជីវិតក្នុងសមរភូមិ ទទួលបានសេចក្តីសុខក្នុងសុគតិភពកុំបីឃ្លៀងឃ្លាតឡើយ។

ទន្ទឹមនោះ បងប្អូនកងកម្លាំងដែលវីរៈកងទ័ពដ៏អង់អាចក្លាហានរបស់កម្ពុជាដែលបានឈរជើងការពារបូរណភាពទឹកដីនៅតំបន់ជួរមុខនៃប្រាសាទតាមាន់ក៏បានសម្ដែងការថ្លែងអំណរគុណយ៉ាងជ្រាលជ្រៅចំពោះលោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្ដាល និងអ្នកពាក់ព័ន្ធទាំងអស់ដែលមានការយកចិត្តទុកដាក់ និងជួយគាំទ្រ ឧបត្ថម្ភជាបន្តបន្ទាប់៕