មាត់ទន្លេក្រុងតាខ្មៅកំពុងក្លាយជាសម្បុកចោរដើរលួចទូរស័ព្ទប្រជាពលរដ្ឋយ៉ាងសកម្ម

(កណ្ដាល)៖ ក្រុងតាខ្មៅត្រូវបានគេចាត់ទុកថាជាតំបន់កំពុងអភិវឌ្ឍយ៉ាងលឿន ទាំងផ្នែកសំណង់អគារ ផ្លូវថ្នល់ និងទីលានសាធារណៈជាពិសេសមាត់ទន្លេក្រុងតាខ្មៅ។ ទីនោះបានក្លាយជាកន្លែងកម្សាន្តដ៏ពេញនិយមសម្រាប់ប្រជាពលរដ្ឋជាច្រើន ដែលចូលចិត្តមកដើរលំហែផងដែរ។ ប៉ុន្តែ បច្ចុប្បន្ននេះ មាត់ទន្លេមួយនេះកំពុងជួបប្រទះបញ្ហាដ៏គួរឱ្យព្រួយបារម្ភមួយគឺមានក្រុមចោរយ៉ាងសកម្មដែលតែងតែដើរបំភាន់និងលួចយកទូរស័ព្ទរបស់អ្នកដើរកំសាន្ត។

ជាក់ស្ដែងនៅយប់ថ្ងៃទី២៧ ខែកក្ដដា ឆ្នាំ២០២៥នេះ មានប្រជាពលរដ្ឋមិនតិចជាង២នាក់ទេដែលត្រូវបានក្រុមចោរទាំងនេះ បានធ្វើសកម្មភាពលួចយកទូរស័ព្ទពីក្នុងឃ្លុបម៉ូតូខាងមុខរបស់ពួកគាត់ លឿនដូចភ្នែកបន្ទោរ។

បើតាមប្រភពព័ត៌មានពីជនរងគ្រោះបានឲ្យដឹងថា មានក្រុមចោរបានលួចទូរស័ព្ទរបស់ពួកគាត់បាត់ភ្លាមៗ ខណៈពួកគាត់កំពុងបើកម៉ូតូយឺតៗមើលគេឯងនៅតាមទីន្លែងលក់ដូរនៅមាត់ទន្លេនេះ។គាត់បន្តថា គាត់ត្រូវបានចោរលួចយកទូរស័ព្ទអាយហ្វូនiPhone)។

ប្រភពផ្សេងទៀតថា ចោរក៏បានលួចទូរស័ព្ទគាត់បាត់ភ្លាមៗផងដែរគឺលួចលឿនណាស់ ជំនាញលួចតែម្ដង លួចភ្លាមវាបិទទូរស័ព្ទភ្លាម ទោះបីយើងព្យាយាមខលទៅក៏មិនចូល ហើយវាបានបិទទីតាំងទៀត ខណៈពេលគាត់កំពុងឈប់ចូលទិញស្បែកជើង សឹងមិនទាន់បាន៥នាទីផង ដោយគាត់បានដាក់ទូរស័ព្ទនៅក្នុងឃ្លុបម៉ូតូខាងមុខ។

ប្រភពពីស្ត្រីអ្នកលក់ម្នាក់បានឲ្យដឹងថា គាត់ក៏ធ្លាប់រងគ្រោះដែរ គឺមានចោរបានលួចទូរស័ព្ទបាត់អស់១គ្រឿងផងដែរ ខណៈគាត់កំពុងមមាញឹកលក់ដូរគឺចោរ វាបន្លំខ្លួនមកលួចតែម្ដង។

ប្រជាពលរដ្ឋជាច្រើនបានអំពាវនាវដល់អាជ្ញាធរមូលដ្ឋានជាពិសេសលោកចៅហ្វាយក្រុងតាខ្មៅ លោកចៅហ្វាយខេត្តកណ្ដាលមេត្តាបង្កើនការដាក់កម្លាំងជំនាញឃ្លាំមើល និងចាត់វិធានការរឹតបន្តឹងភូមិឃុំសង្កាត់មានសុវត្ថិភាពឲ្យបានខ្លាំងក្លាបំផុតផង ព្រោះមានក្រុមចោរបានកំពុងធ្វើសកម្មភាពយ៉ាងសកម្មដើរលួចទ្រព្យសម្បត្តិរបស់ប្រជាពលរដ្ឋនៅតាមទីសាធារណៈនៅក្រុងតាខ្មៅ ខេត្តកណ្ដាល៕