អ្នកនាំពាក្យក្រសួងការពារជាតិ៖ មកទល់ពេលនេះ កងទ័ពរបស់កម្ពុជាមិនទាន់មានភាពចាំបាច់ណាមួយក្នុងការប្រើអាវុធធុនធ្ងន់ប្រភេទ PHL-03 នៅឡើយនោះទេ

(ភ្នំពេញ)៖ ដើម្បីឆ្លើយតបនឹងការចោទប្រកាន់ លាភពណ៌ និងផ្សព្វផ្សាយព័ត៌មានក្លែងក្លាយ និងកខ្វក់របស់អ្នកសារព័ត៌មានថៃ និងអ្នកនាំពាក្យជើងគោកថៃ, អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានបញ្ជាក់ជាថ្មីថា មកទល់ពេលនេះ កងទ័ពរបស់កម្ពុជាមិនទាន់មានភាពចាំបាច់ណាមួយក្នុងការប្រើអាវុធធុនធ្ងន់ប្រភេទ PHL-03 នៅឡើយនោះទេ។

ការចេញមកបញ្ជាក់បែបនេះរបស់អ្នកនាំពាក្យក្រសួងការពារជាតិកម្ពុជាបានធ្វើឡើងបន្ទាប់ពីអ្នកសារព័ត៌មានរបស់ថៃ និងអ្នកនាំពាក្យកងទ័ពជើងគោករបស់ថៃ បានរួមគ្នាប្រឌិតព័ត៌មាន បង្កើតនូវព័ត៌មានក្នុងចេតនាយុទ្ធសាស្ត្រកខ្វក់ ដោយបំភ័ន្តប្រជាជនរបស់ខ្លួន និងសហគមន៍អន្តរជាតិ ដើម្បីចោទប្រកាន់មកលើកម្ពុជា។

ក្នុងឱកាសធ្វើសន្និសីទសារព័ត៌មានបង្ហាញបច្ចុប្បន្នភាព ថ្ងៃទី៤ នៃការបង្កសង្គ្រាមរបស់យោធាថៃឈ្លានពានដែនអធិបតេយ្យកម្ពុជា នារសៀលថ្ងៃទី២៧ ខែកក្កដា ឆ្នាំ២០២៥ អ្នកនាំពាក្យក្រសួងការពារជាតិ បានបញ្ជាក់យ៉ាងដូច្នេះថា «ការផ្សាយព័ត៌មានរបស់ថៃ និងការលើកឡើងរបស់អ្នកនាំពាក្យកងទ័ពជើងគោលកថា ថាកម្ពុជា បានប្រើប្រាស់អាវុធធុនធ្ងរ PHL-03 នេះគឺជាពព័ត៌មាន ដែលប្រឌិត កំហុស បំពុល និងលាភពណ៌មកកាន់កម្ពុជា។ ចំពោះការផ្សព្វផ្សាយព័ត៌មាននេះ​ជាការបំពុលព័ត៌មានពលរដ្ឋខ្លួនឯង និងសហគមន៍អន្តរជាតិ មកទល់ពេលនេះ កម្ពុជាមិនទាន់មានភាពចាំបាច់ណាមួយក្នុងការប្រើប្រភេទអាវុធ PHL-03 នៅឡើយទេ»។

ចំពោះការចោទប្រកាន់ពីសំណាក់អ្នកនាំពាក្យកងទ័ពជើងគោកថៃ មកលើកងទ័ពកម្ពុជា ធ្វើឡើងដោយគ្មានភស្តុតាងអ្វីទាំងអស់។ ការចោទប្រកាន់របស់ភាគីថៃ គ្រាន់តែជាលេស ដើម្បីខ្លួនចាប់ផ្តើមប្រើប្រាស់អាវុធធន់ធ្ងន់សាហាវជាងមុន ដើម្បីសម្រេចបំណងរំលោភឈ្លានពានកម្ពុជាតែប៉ុណ្ណោះ៕