ទង្វើអមនុស្សធម៌របស់ទាហានឈ្លានពានថៃ គឺជាការបំពានដ៏ធ្ងន់ធ្ងរបំផុតផ្ទុយពីមាគ៌ាព្រះពុទ្ធសាសនា ក្នុងឋានៈជាប្រទេស មួយដែលមានប្រជាពលរដ្ឋភាគច្រើនលើសលប់ប្រតិបត្តិព្រះពុទ្ធសាសនា

(ភ្នំពេញ)៖ ក្រសួងធម្មការនិងសាសនានិងគណៈសង្ឃនាយកទាំងពីរគណៈបានថ្កោលទោសយ៉ាងដាច់អហង្ការ ចំពោះទាហានឈ្លានពានថៃ ដែលបានប្រើយន្តហោះ F-16 គ្រាប់បែកចង្កោម និងកាំភ្លើងធំ វាយប្រហារមកលើ ទីអារាមសាសនា ព្រះពុទ្ធបដិមា សាលាបុណ្យ ទីសក្ការបូជា ប្រាសាទបុរាណ និងទីតាំងស៊ីវិល។ នេះបើយោងតាមញ្ញតិថ្កោលទោសរបស់ក្រសួងធម្មការនិងសាសនានិងគណៈសង្ឃនាយកទាំងពីរគណៈដែលអង្គភាពព័ត៌មាន The Mirror News ទទួលបាននៅថ្ងៃទី២៦ ខែកក្ដដា ឆ្នាំ២០២៥នេះ។

ក្រសួងធម្មការ រួមទាំងគណៈសង្ឃនាយកទាំងពីរគណៈបានបញ្ជាក់ថា ជាក់ស្តែងនៅថ្ងៃទី២៤ ខែកក្កដា ឆ្នាំ២០២៥ ពួកទាហានឈ្លានពានថៃបានធ្វើការវាយប្រហារមកលើ វត្តតាមាន់សែនជ័យ ស្ថិតនៅក្នុងស្រុកបន្ទាយអំពិល ខេត្តឧត្តរមានជ័យ បណ្តាលឱ្យខូចខាតព្រះវិហារ កុដិព្រះសង្ឃ និងទីសក្ការបូជា ព្រមទាំងធ្វើឱ្យបាត់បង់អាយុជីវិតលោកតាអាចារ្យមួយរូប ដែលជាអ្នកប្រណិប័តន៍ធម៌ និងថែទាំទីអារាម។ នេះជាអំពើដ៏ឃោរឃៅ អមនុស្សធម៌ និងជាអំពើឧក្រិដ្ឋកម្មប្រឆាំងមនុស្សជាតិ ដែលមិនអាច អត់ឱនឱ្យបានឡើយ។

ក្រសួងធម្មការនិងសាសនានិងគណៈសង្ឃនាយកទាំងពីរគណៈបានសង្កត់ធ្ងន់ថា «ទង្វើអមនុស្សធម៌នេះ គឺជាការបំពានដ៏ធ្ងន់ធ្ងរបំផុតផ្ទុយពីមាគ៌ាព្រះពុទ្ធសាសនា ក្នុងឋានៈជាប្រទេស មួយដែលមានប្រជាពលរដ្ឋភាគច្រើនលើសលប់ប្រតិបត្តិព្រះពុទ្ធសាសនា»។

ក្រសួងធម្មការនិងសាសនានិងគណៈសង្ឃនាយកទាំងពីរគណៈ សូមឱ្យកងទ័ពឈ្លានពានថៃ បញ្ឈប់ជា បន្ទាន់និងដោយគ្មានលក្ខខណ្ឌចំពោះការវាយប្រហារមកលើទីអារាមសាសនា ព្រះពុទ្ធបដិមា សាលាបុណ្យ ទីសក្ការបូជា ប្រាសាទបុរាណ និងទីតាំងស៊ីវិល៕