លោក ប៉ែត សារ៉ាត់ ដឹកនាំក្រុមការងារបច្ចេកទេសចុះពិនិត្យស្ថានភាពផ្លូវមួយចំនួនក្នុងក្រុងអរិយក្សត្រដែលបានកំពុងរងការខូចខាតដោយសារការធ្វើអាជីវកម្មដឹកខ្សាច់ និងថ្ម
(កណ្ដាល)៖ លោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូន ខេត្តកណ្ដាលនៅព្រឹកថ្ងៃសុក្រ ទី២៥ ខែកក្កដា ឆ្នំា២០២៥ នេះ បានដឹកនាំក្រុមការងារបច្ចេកទេស សហការជាមួយរដ្ឋបាលក្រុងអរិយក្សត្រ ចុះពិនិត្យស្ថានភាពផ្លូវជាតិលេខ 70B និងផ្លូវលេខ380A1 និងផ្លូវមួយចំនួនដែលរងការខូចខាតដោយសារការធ្វើអាជីវកម្មដឹកខ្សាច់ និងថ្ម។
នាឳកាសនោះ លោក ប៉ែត សារ៉ាត់ បានដឹកនាំកិច្ចប្រជុំផ្សព្វផ្សាយពីច្បាប់ផ្លូវថ្នល់ មាត្រា២៦ និង សេចក្តីជូនដំណឹង លេខ ០៥២ សក.សជណ.គតលទ ស្តីពីការចូលរួមទប់ស្កាត់ការដឹកជញ្ជូនលេីសទម្ងន់កម្រិតកំណត់ របស់ក្រសួងសាធារណការ និងដឹកជញ្ជូន ជូនដល់ម្ចាស់ដេប៉ូខ្សាច់ ថ្ម និងក្រុមហ៊ុនដឹកជញ្ជូនគ្រប់ប្រភេទ និងសូមអោយម្ចាស់អាជីវកម្មទាំងអស់គោរពតាមបទដ្ឋានបច្ចេកទេស សេចក្តីជូនដំណឹង និងច្បាប់ផ្លូវថ្នល់ ដែលនៅជាធរមាន ស្ថិតក្នុងភូមិសាស្ត្រក្រុងអរិយក្សត្រ ខេត្តកណ្ដាល។
បើយោងតាមសេចក្តីជូនដំណឹងស្តីពីការចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ កាលពីថ្ងៃទី១៨ ខែកក្ដដា ឆ្នាំ២០២៥បានឱ្យដឹងថា កន្លងមក គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានពិនិត្យឃើញថា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ ម្ចាស់ការដ្ឋានអាជីវកម្មនានា អ្នកបើកបរ រថយន្តធុនធ្ងន់ និងប្រតិបត្តិករដឹកជញ្ជូនធុនធ្ងន់ទាំងអស់ បានចូលរួមគោរពច្បាប់ និងលិខិតបទដ្ឋានគតិយុត្តបានល្អ។ ប៉ុន្តែទន្ទឹមគ្នានេះ ក៏នៅមានរថយន្តដឹកជញ្ជូនធុនធ្ងន់មួយចំនួនតូច នៅតែបន្តសកម្មភាពដឹកលើស ទម្ងន់កម្រិតកំណត់តាមបណ្តាញផ្លូវថ្នល់នៅឡើយ។
ប្រភពបន្តថា ដូចនេះ ដើម្បីចូលរួមថែរក្សាហេដ្ឋារចនាសម្ព័ន្ធផ្លូវថ្នល់ ស្ពានរបស់យើងឱ្យបានស្ថិតស្ថេរ គង់វង្ស និងជាប់ធន់តាមអាយុកាលបច្ចេកទេសសាងសង់ ព្រមទាំងចូល រួមចំណែកកាត់បន្ថយគ្រោះថ្នាក់ចរាចរណ៍ និងថវិកាជាតិក្នុងការជួសជុលថែទាំផ្លូវថ្នល់ ស្ពាននៅទូទាំង ប្រទេស គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សូមធ្វើការ ណែនាំដូចខាងក្រោម៖
*១-ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីកយកអាចម៍ដី ម្ចាស់រោងចក្រ ផលិតស៊ីម៉ងត៍ ចំណីសត្វ។ល។ ម្ចាស់អាជីវកម្មដ្ឋានទំនិញផ្សេងៗ សូមចូលរួមសហការអនុវត្តដោយត្រូវ ត្រួតពិនិត្យទម្ងន់ផ្ទុករបស់រថយន្តកុំឱ្យដឹកលើសទម្ងន់កម្រិតកំណត់ មុនពេលដឹកជញ្ជូនចេញពីចំណុច គោលដៅដើមទីរបស់ខ្លួននីមួយៗ។
*២-ម្ចាស់ក្រុមហ៊ុនដឹកជញ្ជូន អ្នកបើកបររថយន្តធុនធ្ងន់ និងប្រតិបត្តិករដឹកជញ្ជូនធុនធ្ងន់ទាំង អស់ត្រូវដឹកទំនិញ ឬត្រូវណែនាំដល់អ្នកបើកបររថយន្តធុនធ្ងន់របស់ខ្លួន អនុវត្តឱ្យបានត្រឹមត្រូវ និងម៉ឺងម៉ាត់ តាមបទប្បញ្ញត្តិដូចមានចែងក្នុងមាត្រា២៦ នៃច្បាប់ស្តីពីផ្លូវថ្នល់។
*៣-ក្នុងករណីម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីកយកអាចម៍ដី ម្ចាស់ រោងចក្រផលិតស៊ីម៉ងត៍ ចំណីសត្វ។ល។
ប្រភពដដែលបន្តទៀតថា ម្ចាស់អាជីវកម្មដ្ឋានទំនិញផ្សេងៗ ម្ចាស់ក្រុមហ៊ុនដឹកជញ្ជូនណា នៅតែបណ្តែតបណ្តោយឱ្យដឹកជញ្ជូនទំនិញលើសទម្ងន់កម្រិតកំណត់ នោះគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នឹងចាត់វិធានការដោយបញ្ឈប់អាជីវកម្មដឹកជញ្ជូន របស់ក្រុមហ៊ុនចំនួន១ (មួយ)ឆ្នាំ បើរងនូវការពិន័យអន្តរការណ៍ម្តងរួចហើយ នៅតែបន្តប្រព្រឹត្តល្មើសទៀត ឬអាចស្នើទៅអាជ្ញាធរមានសមត្ថកិច្ច ដើម្បីបិទទីតាំងអាជីវកម្មនោះតែម្តង។
គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សូមសំដែង នូវសេចក្តីសង្ឃឹម និងជឿជាក់ថា ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីកយកអាចម៍ដី ម្ចាស់រោងចក្រផលិតស៊ីម៉ងត៍ ចំណីសត្វ។ល។
ម្ចាស់អាជីវកម្មដ្ឋានទំនិញផ្សេងៗ ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ អ្នកបើកបររថយន្តធុនធ្ងន់ និងប្រតិបត្តិករដឹកជញ្ជូនធុនធ្ងន់ទាំងអស់ នឹងចូលរួមអនុវត្ត តាមសេចក្តីជូនដំណឹងនេះ ឱ្យបានម៉ឺងម៉ាត់បំផុត មានប្រសិទ្ធភាព និងដោយស្មារតីទទួលខុសត្រូវខ្ពស់៕
