«កុំបំពានលើបន្ទាត់ក្រហម! សម្តេច ហ៊ុន ម៉ាណែត បញ្ជាក់ថា៖កម្ពុជាមិនរំលោភលើអ្នកណាទេ តែមានសមត្ថភាពគ្រប់គ្រាន់ដើម្បីការពារខ្លួន»

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នៅថ្ងៃទី២២ ខែកក្កដានេះបានថ្លែងអំពីស្ថានការណ៍នៅតំបន់ព្រំដែនរវាងកម្ពុជា និងថៃ ដោយបញ្ជាក់ថា ក្នុងរយៈពេលមួយនេះ មានការចោទប្រកាន់ដោយគ្មានមូលដ្ឋានពីថ្នាក់ដឹកនាំនយោបាយ កងទ័ព និងបណ្ដាញសារព័ត៌មានថៃ ទាក់ទងនឹងបញ្ហាច្រើន ដូចជា៖ ការលូកដៃចូលក្នុងនយោបាយផ្ទៃក្នុងរបស់ថៃ ការដាក់មីន និងការគម្រាមអនុវត្តវិធានការជាឯកតោភាគីនៅតំបន់ដែលមានវិវាទ រួមទាំងតំបន់មុំបី និងប្រាសាទតាមាន់ធំ។

សម្តេចបានឲ្យដឹងថា ក្រសួងការបរទេសនិងសហប្រតិបត្តិការអន្តរជាតិ ក្រសួងការពារជាតិ និងស្ថាប័នពាក់ព័ន្ធរបស់កម្ពុជា បានធ្វើការឆ្លើយតបយ៉ាងសកម្ម ដើម្បីការពារភាពត្រឹមត្រូវ និងផលប្រយោជន៍ជាតិរបស់កម្ពុជា។ ព្រមទាំងត្រៀមអនុវត្តវិធានការចាំបាច់បន្ថែមទៀត ក្នុងគោលដៅការពារ​អធិបតេយ្យភាព និងឧត្តមប្រយោជន៍ជាតិខ្មែរ។

ក្នុងសារដែលផ្ញើទៅឲ្យភាគីថៃ សម្តេចបានរំលឹកថា៖១. តំបន់ឬទីកន្លែងដែលមានវិវាទ ឬមិនទាន់ដាច់ស្រេចថាស្ថិតក្នុងដែនអធិបតេយ្យភាពរបស់ប្រទេសណាមួយ គឺគ្មានភាគីណាមានសិទ្ធិធ្វើសកម្មភាពឬដាក់ចេញនូវវិធានការជាឯកតោភាគីនៅក្នុងតំបន់ឬទីកន្លែងនោះ។ រាល់វិធានការនានាដែលអាចអនុវត្តបាន ត្រូវមានការឯកភាពគ្នារវាងភាគីទាំងពីរជាមុនសិន។

២. បន្ទាត់ក្រហមនៅតែជាបន្ទាត់ក្រហម មិនមានការប្រែប្រួលទេ។ សូមកុំបំពាន។

៣. កម្ពុជាមិនរំលោភបំពានលើអ្នកណាទេ ប៉ុន្តែកម្ពុជាក៏មិនឲ្យអ្នកណាមួយរំលោភបំពានលើខ្លួននោះដែរ។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេចក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ប្រឆាំងនឹងការរំលោភបំពាន។

៤. វិធីសាស្រ្តបៀមឈាមព្រួសដាក់អ្នកដទៃ មិនមែនជាវិធីសាស្រ្តដែលមានសីលធម៌និងសុច្ចរិតភាពនោះទេ។ វិធីសាស្ត្របែបនេះមិនត្រូវប្រើទេ បើយើងពិតជាចង់កសាងនូវទំនុកចិត្តរវាងគ្នានិងគ្នា។

៥. កម្ពុជានៅតែរក្សាជំហរក្នុងការស្វែងរកដំណោះស្រាយលើបញ្ហានេះ ដោយមធ្យោបាយអហឹង្សា ឲ្យបានឆាប់រហ័ស ប្រកបដោយភាពច្បាស់លាស់និងចីរភាព។

សម្តេចបានបញ្ជាក់ថា កម្ពុជានឹងបន្តការពារតាមផ្លូវច្បាប់អន្តរជាតិ និងបន្តអនុវត្តការចូលរួមដោយសន្តិភាព ក្នុងការដោះស្រាយបញ្ហាដែលកើតឡើងជាមួយប្រទេសជិតខាង ដោយផ្អែកលើការគោរពទំនាក់ទំនងល្អ និងការពិភាក្សាទ្វេភាគី៕