លោក វ៉ី សំណាង បញ្ជាឲ្យអាជ្ញាធរស្រាវជ្រាវ និងទប់ស្កាត់បទល្មើសឆបោកតាមអនឡាញ

(តាកែវ)៖ លោក វ៉ី សំណាង បានណែនាំអភិបាលក្រុង ស្រុក និងសមត្ថកិច្ច ពាក់ព័ន្ធត្រូវធ្វើយ៉ាងណាស្រាវជ្រាវ ទប់ស្កាត់ និងបង្រ្កាបឲ្យបានចំពោះក្រុមជនខិលខូច ដែលលួចបើកល្បែងស៊ីសងខុសច្បាប់ ជាពិសេសបទល្មើសឆបោកនៅតាមអនឡាញ។

ការណែនាំរបស់លោក វ៉ី សំណាង អភិបាលខេត្តតាកែវនៅថ្ងៃទី២១ ខែកក្កដា ឆ្នាំ២០២៥នេះ នៅក្នុងកិច្ចប្រជុំស្តីពីការរៀបចំសន្តិសុខ សណ្តាប់ធ្នាប់ និងសុវត្ថិភាពក្នុងមូលដ្ឋានខេត្តតាកែវ។

លោកអភិបាលខេត្តរូបនេះសង្កត់ធ្ងន់ថា «ប៉ុន្មានថ្ងៃនេះយើងឃើញអំពីការបង្ក្រាបបទល្មើសឆបោកតាមអនឡាញជាច្រើនខេត្ត ដូច្នេះសូមឲ្យអាជ្ញាធរក្រុង ស្រុក និងសមត្ថកិច្ចត្រូវខិតខំស្រាវជ្រាវ និងទប់ស្កាត់កុំឲ្យមានជនឱកាសនិយម មកពួនសំងំរកស៊ីខុសច្បាប់ក្នុងដែនសមត្ថកិច្ចរបស់ខ្លួនឲ្យសោះ»។

លោក វី សំណាង​ បានបន្តថា ការទប់ស្កាត់ ការលេងល្បែងស៊ីសងខុសច្បាប់តាមអនឡាញ និងបទល្មើសឆបោកតាមអនឡាញ នឹងធ្វើឲ្យក្រុងស្រុកនីមួយៗ មានសន្តិសុខ សុវត្ថិភាព សណ្តាប់ធ្នាប់ ល្អប្រសើរ ជាពិសេសនឹងបង្កើនភាពជឿជាក់របស់ក្រុមអ្នកវិនិយោទុន ឲ្យចូលមកបណ្ដាក់ទុននៅក្នុងខេត្តតាកែវ ឲ្យកាន់តែច្រើន ដែលនឹងនាំឲ្យខេត្តកាន់តែមានការអភិវឌ្ឍចម្រើនថែមទៀត៕