អភិបាលស្រុកខ្សាច់កណ្ដាលជួយសម្របសម្រួលផ្ដល់ឳកាសការងារជូនបងប្អូនពលករត្រឡប់ពីប្រទេសថៃចំនួន១២នាក់ឱ្យបានចូលបម្រើការងារតាមរោងចក្រនិងក្រុមហ៊ុនប្រកបដោយបរិយាកាសរីករាយ

(កណ្ដាល)៖ ដោយទទួលបានការណែនាំពីឯកឧត្ដម គួច ចំរើន អភិបាលខេត្តកណ្ដាល កាលពីយប់ថ្ងៃព្រហស្បតិ៍ ទី១៧ ខែកក្កដា ឆ្នាំ២០២៥ លោក ចេង ឌីណា អភិបាលនៃគណៈអភិបាលស្រុកខ្សាច់កណ្ដាល បានដឹកនាំកិច្ចប្រជុំរវាងប្រធានរដ្ឋបាលរោងចក្រ និងពលករចំនួន១២នាក់ ដែលត្រឡប់មកពីប្រទេសថៃ ដើម្បីធ្វើការសម្របសម្រួលនិងបានផ្តល់ឱកាសការងារធ្វើជូនពួកគាត់ ប្រកបដោយបរិយាកាសរីករាយនិងស្នាមញញឹម។

លោក ចេង ឌីណា បានប្រាប់ឱ្យអង្គភាព The Mirror News ដឹងនៅរសៀលថ្ងៃនេះថា ជាលទ្ធផល លោកបានជួយសម្របសម្រួលជាមួយខាងប្រធានរដ្ឋបាលរោងចក្រឱ្យបានដាក់ពាក្យចូលធ្វើចូលបម្រើការងាររោងចក្រ ស៊ីណូខេអេច, រោងចក្រ ខេមបូ យូនីសូល អិលធីឌី,រោងចក្រ ធីដាប់បលយូរអេចឃ្យូ,និងនៅក្រុមហ៊ុន សន្តិសុខ តំបន់អភិវឌ្ឍន៍សេដ្ឋកិច្ច 7NG សរុបបានចំនួន១០នាក់។

លោកអភិបាលស្រុកបានឱ្យដឹងទៀតថា ដោយឡែកមានបងប្អូនពលករចំនួន២នាក់ជាប្ដីប្រពន្ធ ពួកគាត់នឹងត្រឡប់ទៅខេត្តព្រះវិហារវិញដើម្បីទៅប្រកបរបរដាំដំឡូងជាមួយបងប្អូនរបស់ពួកគាត់។

លោក ចេង ឌីណា បានបញ្ជាក់ឱ្យដឹងដែរថា​ ពលករចំណាកស្រុកធ្វើការនៅប្រទេសថៃសរុបចំនួន២៣៨នាក់ (ស្រី ១០០នាក់) និងបានវិលត្រឡប់មកវិញ មានចំនួន ៣២នាក់ ក្នុងនោះ៖ មានការងារធ្វើរួចចំនួន០៤នាក់ និងបានសម្របសម្រួលរកការងារជូន១០នាក់៕