ប្រធានក្រុមសម្ព័ន្ធមេត្រីភាព លោកស្នងការ ឈឿន សុចិត្ត បានដឹកនាំក្រុមសម្ព័ន្ធមេត្រីភាព និងនាំយកសម្ភារៈ បរិក្ខារ គ្រឿងឧបភោគបរិភោគ ឱសថ និងថវិកា ផ្តល់ជូនគណៈបញ្ជាការនគរបាលជាតិប្រចាំទិសភូមិភាគទី៤ ខេត្តព្រះវិហារ

(កណ្ដាល)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និងជាប្រធានក្រុមសម្ព័ន្ធមេត្រីភាព នៅថ្ងៃសុក្រទី១១ ខែកក្កដា ឆ្នាំ២០២៥នេះ បានដឹកនាំក្រុមសម្ព័ន្ធមេត្រីភាព និងនាំយកសម្ភារៈ បរិក្ខារ គ្រឿងឧបភោគបរិភោគ ឱសថ និងថវិកា ផ្តល់ជូនគណៈបញ្ជាការនគរបាលជាតិប្រចាំទិសភូមិភាគទី៤ ខេត្តព្រះវិហារ។

ក្រុមសម្ព័ន្ធមេត្រីភាពជាមួយគណៈបញ្ជាការនគរបាលជាតិប្រចាំទិសភូមិភាគទី៤ រួមមាន៖ *ស្នងការដ្ឋាននគរបាលខេត្តកណ្តាល *ស្នងការដ្ឋាននគរបាលខេត្តព្រៃវែង *ស្នងការដ្ឋាននគរបាលខេត្តត្បូងឃ្មុំ *ស្នងការដ្ឋាននគរបាលខេត្តស្វាយរៀង *ស្នងការដ្ឋាននគរបាលខេត្តក្រចេះ និង*ស្នងការដ្ឋាននគរបាលខេត្តកំពង់ឆ្នាំង។

នាឳកាសនោះ លោកប្រធានក្រុមសម្ព័ន្ធមេត្រីភាព ឈឿន សុចិត្ត បានថ្លែងគោរពកោតសរសើរជូនចំពោះកងកម្លាំងជួរមុខចំពោះទឹកចិត្ត និងវីរភាព ដ៏អង់អាចក្លាហាន ប្តូរផ្តាច់ការពារបូរណភាពទឹកដី អនុវត្តបានយ៉ាងម៉ឺងម៉ាត់ តាមបទបញ្ជារបស់ថ្នាក់ដឹកនាំប្រកបដោយភាពទទួលខុសត្រូវខ្ពស់ ចំពោះបុព្វហេតុជាតិ មាតុភូមិ និងប្រជាជន។

គួរជម្រាបជូនថា ក្រុមសម្ព័ន្ធមេត្រីភាពគឺប្រៀបបាននឹងសមរភូមិក្រោយ ហើយក៏បានបញ្ជាក់ឲ្យឃើញពីការសាមគ្គីភាពដែលមិនអាចខ្វះបាន រវាងសមរភូមិមុខ និងសមរភូមិក្រោយ៕