ស្នងការខេត្តកំពតប្រាប់ឱ្យក្រុមក្មេងៗទំនើងល្មមភ្ញាក់ខ្លួននិងកែប្រែខ្លួនឡើងវិញ កុំធ្វើឱ្យឪពុកម្ដាយស្រក់ទឹកភ្នែក!

(កំពត)៖ លោកឧត្ដមសេនីយ៍ទោ ម៉ៅ ចន្ទមធុរិទ្ធ ស្នងការនគរបាលខេត្តកំពតបានចេញសារដាស់តឿនប្រាប់ឱ្យ ក្រុមក្មេងទំនើងល្មមភ្ញាក់ខ្លួននិងកែប្រែខ្លួនឡើងវិញ កុំធ្វើឱ្យឪពុកម្តាយស្រក់ទឹកភ្នែកដោយសារអស់លោក។

នៅក្នុងបណ្ដាញសង្គមលោកស្នងការបានបញ្ជាក់ថា ទឹកដែលអស់លោកបានធ្វើឱ្យអ្នកមានគុណស្រក់ចុះ អស់លោកនិងទទួលមកវិញនៅពេលក្រោយ គួរកែខ្លួនមុនពេលអ្វីៗហួសពេលសំរាប់អស់លោកតបស្នងសងគុណដល់ឪពុកម្តាយរបស់ខ្លួន។

លោកឧត្ដមសេនីយ៍ ម៉ៅ ចន្ទមធុរិទ្ធ ក៏បានលើកឡើងបន្តថា ពាក់ពន្ធ័នឹងក្មេងទំនើងដែលសមត្ថកិច្ចធ្វើការបង្ក្រាប សូមបងប្អូនមេត្តាកុំដាក់បន្ទុកមកលើឪពុកម្តាយរបស់ពួកគេ។ ពួកគាត់ខិតខំធ្វើការងាររកសុីដើម្បីចិញ្ចឹមពួកគាត់អោយបានធំធាត់រៀនសូត្រចេះដឹងដើម្បីអនាគតទៅថ្ងៃក្រោយ ពួកគាត់មិនមានពេលវេលាច្រើនសំរាប់អប់រំពួកគាត់នោះទេ។

ទន្ទឹមនោះ លោកស្នងការខេត្តកំពតរូបនេះក៏បានបន្តថា គ្មានឪពុកម្តាយណាចង់ឃើញកូនអាក្រក់នោះទេ សុខចិត្តអត់ខ្លួនឯង តែដើម្បីកូនគឺលៈបង់គ្រប់បែបយ៉ាង៕