លោកស្នងការ ម៉ៅ ច័ន្ទមធុរិទ្ធ៖ បទល្មើសផ្សេងៗនៅក្នុងខេត្តកំពតមានការថយចុះ

(កំពត)៖ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបញ្ជាក់ឱ្យដឹងថា ទល្មើសផ្សេងៗ ក្នុងខេត្តកំពតឃើញថា កម្លាំងសមត្ថកិច្ចយើងបានយកចិត្តទុកដាក់បង្រ្កាបបានច្រើន បទល្មើសមានការថយចុះ។

ការបញ្ជាក់របស់លោកលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត នៅថ្ងៃពុធ ទី០៩ ខែកក្កដា ឆ្នាំ២០២៥ ក្នុងឳកាសអញ្ជើញជាអធិបតីបើកកិច្ចប្រជុំត្រួតពិនិត្យលទ្ធផលការងារ ប្រចាំខែ មិថុនាឆ្នាំ២០២៥ និងលើកទិសដៅអនុវត្តការងារបន្តរបស់ស្នងការដ្ឋាននគរបាលខេត្តកំពត។

បើតាមលោកឧត្តមសេនីយ៍ត្រី សុខ សាកាន ស្នងការរងជួយផែនព្រហ្មទណ្ឌ បានលើកឡើងពាក់ព័ន្ធការងារវិភាគកន្លែងកើតហេតុ សំខាន់ត្រូវការពារកន្លែងកើតហេតុឱ្យនៅភាពដើម ព្រោះនៅទីនោះតែងតែបន្សល់ទុកស្លាកស្នាម ជាទន់សម្រាប់ឱ្យយើងស្រាវជ្រាវបន្ត។ លោកស្នងការរងបន្តថា លោកតម្រូវឱ្យយកចិត្តទុកដាក់ពិនិត្យឱ្យបានច្បាស់លាស់ តស៊ូព្យាយាមអត់ធ្មត់ លាក់ការសម្ងាត់ខ្ពស់ រាល់ចម្លើយសារភាពរបស់ជនសង្ស័យត្រូវមានភស្តុតាងឱ្យស៊ីចង្វាក់។

ក្នុងកិច្ចប្រជុំ លោកឧត្តមសេនីយ៍ទោស្នងការ ម៉ៅ ច័ន្ទមធុរិទ្ធ ក៏បានលើកឡើងពីសភាពការណ៍សន្តិសុខនៅខ្សែបន្ទាត់ព្រំដែនកម្ពុជា ថៃ ដោយបានរំលឹកដល់អធិការក្រុង ស្រុក ត្រូវយកចិត្តទុកដាក់ត្រួតពិនិត្យពីសភាពការណ៍សន្តិសុខ សង្គមឱ្យបានជាប់ជាប្រចាំ។

លោកស្នងការក៏បានណែនំាដល់អធិការក្រុង ស្រុក ត្រូវយកចិត្តទុកដាក់ម្ចាស់ការខ្លួនឯង តម្លើងកាំមេរ៉ាសុវត្ថិភាព នៅតាមគោលដៅសំខាន់ក្នុងភូមិសាស្ត្ររបស់ខ្លួននិងត្រូវយកចិត្តទុកដាក់ទប់ស្កាត់ឱ្យបាននូវបញ្ហាក្មេងទំនើង និងគ្រឿងញៀន សហការគ្នាធ្វើឱ្យបានល្អ។

លោកក៏បានបន្តណែនាំអធិការក្រុង ស្រុកឱ្យយកចិត្តទុកដាក់លើការអនុវត្តដីកា ដែលមាននៅក្នុងភូមិសាស្ត្រខ្លួនទទួលខុសត្រូវ។

ទន្ទឹមនោះ លោកស្នងការ ម៉ៅ ច័ន្ទមធុរិទ្ធ បានណែនាំបន្ថែមឱ្យក្រុមការងារធ្វើអត្តសញ្ញាណប័ណ្ណចល័ត ត្រូវតែបន្តធ្វើនៅតាមបណ្តាក្រុង ស្រុក តទៅទៀត៕