មន្ត្រីមន្ទីរបរិស្ថានខេត្តកណ្ដាលទទួលស្គាល់ថា ពិតជាមានក្លិនស្អុយចេញពីឃ្លាំងលាយជីកសិកម្មឈ្មោះ «ស្តារប៊ិកបាង អាហ្គ្រោជេម &ហ្វើថឺឡាយហ្សឺ ឯ.ក»ពិតប្រាកដមែន និងបានឱ្យធ្វើការផ្អាកការផលិតរយៈពេល៦ខែដើម្បីឱ្យរកទីតាំងថ្មី

(កណ្តាល)៖ ក្រោយមានប្រតិកម្មពីប្រជាពលរដ្ឋនៅក្នុងមូលដ្ឋានពាក់ព័ន្ធឃ្លាំងស្តុកលាយជីកសិកម្មមួយកន្លែង ឈ្មោះ «ស្តារប៊ិកបាង អាហ្គ្រោជេម &ហ្វើថឺឡាយហ្សឺ ឯ.ក» ដែលបង្កក្លិនស្អុយប៉ះពាល់ដល់ប្រជាពលរដ្ឋ នៅភូមិសិត្បូ សង្កាត់សិត្បូ ក្រុងតាខ្មៅ ខេត្តកណ្តាល នៅរសៀលថ្ងៃទី០៨ ខែកក្កដា ឆ្នាំ២០២៥នេះ មន្ទីរបរិស្ថានខេត្តកណ្ដាលនិងអាជ្ញាធរក្រុងតាខ្មៅ បានចុះពិនិត្យ និងអប់រំណែនាំដល់ម្ចាស់អាជីវកម្មជាលើកទី២ហើយ។ ដោយក្រុមការងារមន្ទីរបរិស្ថានបានចុះណែនាំដល់ម្ចាស់សហគ្រាសម្ដងរួចមកហើយ ដោយឱ្យរៀបចំប្រព័ន្ធបច្ចេកទេស ប៉ុន្តែសហគ្រាសពុំមានលក្ខណៈគ្រប់គ្រាន់ក្នុងការគ្រប់គ្រងក្លិនចេញពីទីតាំងនោះទេ។

សហគ្រាសខាងលើនេះមានកម្មករសរុប១៧នាក់ បរទេសសរុប០២នាក់ មានម៉ាស៊ីនលាយជី០៦គ្រឿង ម៉ាស៊ីនវេចខ្ចប់ជីម្សៅ០១គ្រឿង ម៉ាស៊ីនអ៊ុតស្លាក០១គ្រឿង និងឃ្លាំងមានទំហំ២៣៦៨ ម៉ែត្រការ៉េ ក្នុងនោះផងដែរក្រុមហ៊ុនបាននាំចូលវត្ថុធាតុដើម និងសារធាតុផ្សំសម្រាប់ផលិតជីកសិកម្មមានដូចជា៖POTASSIUM HYDROXIDE ជីអ៊ុយរ៉េគ្រាប់ k₂0 61PCT ko 50.0%MIN។

ក្រុមការងារ និងអាជ្ញាធរពិនិត្យជាក់ស្តែងទីតាំងឃ្លាំងនេះស្ថិតនៅជាប់តំបន់លំនៅដ្ឋាន និងមានក្លិនចូលទៅខាងក្រៅពិតមែន ហើយក្រុមការងារបានធ្វើការសាកសួរពីប្រជាពលរដ្ឋបន្ថែមឃើញថាមានក្លិនឆួលចេញពីឃ្លាំងធ្វើឱ្យប៉ះពាល់ដល់ប្រជាពលរដ្ឋរស់នៅជុំវិញជាប្រចាំថ្ងៃ។ ក្រោយពីការចុះពិនិត្យជាក់ស្តែងមន្ទីរបរិស្ថានខេត្តកណ្តាល បានធ្វើការណែនាំ នឹងបានធ្វើការផ្អាកការផលិត និងរយៈពេល៦ខែ ដើម្បីរកទីតាំងថ្មី និងត្រូវតែរៀបចំសម្អាត និងវេចខ្ចប់សម្ភារៈ និងថ្នាំកសិកម្មដែលមាននៅក្នុងឃ្លាំងបច្ចុប្បន្ន ឲ្យបានរៀបរយ និងស្អាតល្អ។ ម្ចាស់ឃ្លាំងត្រូវធ្វើការគ្រប់គ្រងឃ្លាំងឲ្យបានហ្មត់ចត់ ចំពោះមុខនៃវិធានការរបស់មន្ទីរបរិស្ថានខេត្ត ម្ចាស់ឃ្លាំងលាយថ្នាំកសិកម្ម ឈ្មោះ ស្តារប៊ិកបាង អាហ្គ្រោជេម &ហ្វើថឺឡាយហ្សឺ ឯ.ក បានសន្យាថា និងរៀបចំសម្អាត និងវេចខ្ចប់សម្ភារៈ និងថ្នាំកសិកម្មចាស់ៗ ដែលមាននៅក្នុងឃ្លាំងឲ្យបានស្អាត ចាប់ពីថ្ងៃនេះ ប្រសិនបើម្ចាស់ឃ្លាំងមិនអនុវត្តតាមទេ នោះម្ចាស់អាជីវកម្ម នឹងត្រូវប្រឈមមុខតាមច្បាប់ដែលបានកំណត់៕