អាកាសយានដ្ឋានអន្តរជាតិតេជោត្រូវបានបិទបញ្ចប់ដំណាក់កាលសាងសង់ ដោយបានត្រៀមដាក់ដំណើរការនៅថ្ងៃទី០៩ ខែកញ្ញាខាងមុខនេះ

(ភ្នំពេញ)៖  រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោកបណ្ឌិត ម៉ៅ ហាវណ្ណាល់ នៅថ្ងៃទី០៧ ខែកក្កដា ឆ្នាំ២០២៥នេះ បាដឹកនាំក្រុមការងារ បច្ចេកទេសចុះត្រួតពិនិត្យ និងប្រជុំវាយតម្លៃលើវឌ្ឍនភាពគម្រោងសាងសង់ និងផែនការត្រៀមបើកដំណើរការ អាកាសយានដ្ឋានអន្តរជាតិតេជោ។

អង្គប្រជុំបានពិភាក្សា និងវាយតម្លៃលើវឌ្ឍនភាពគម្រោងសាងសង់, វឌ្ឍនភាពការងារវិញ្ញាបនបត្រអាកាសយានដ្ឋាន, វឌ្ឍនភាពការរៀបចំ ដំណើរការអាកាសយានដ្ឋាន, វឌ្ឍនភាពការងារប្រព័ន្ធនាំផ្លូវអាកាស, វឌ្ឍនភាពការរៀបចំត្រៀមផ្ទេរប្រតិបត្តិការពីអាកាសយានដ្ឋានភ្នំពេញ (PNH) ទៅ អាកាសយានដ្ឋានអន្តរជាតិតេជោ (KTI) និងវឌ្ឍនភាពការងារច្រកទ្វារអន្តរជាតិជាដើម។ ដោយនៅក្នុងកិច្ចប្រជុំនេះ មានការចូលរួមពីថ្នាក់ដឹកនាំ និងក្រុមការងារបច្ចេកទេស នៃរដ្ឋលេខាធិការដ្ឋានអាកាសចរណ៍ស៊ីវិល ក៏ដូចជាថ្នាក់ដឹកនាំ និងសមាជិកគណៈកម្មការ ដឹកនាំគ្រប់គ្រង និងសម្របសម្រួលដោះស្រាយ ការងាររៀបចំប្រតិបត្តិការ អាកាសយានដ្ឋានអន្តរជាតិតេជោ អភិបាលក្រុមហ៊ុន ខេមបូឌា អ៊ែរផត អ៊ិនវេសមិន ខូអិលធីឌី (CAIC)និងក្រុមការងារ និងមន្ត្រីបច្ចេកទេសបុគ្គលិកពាក់ព័ន្ធផ្សេងទៀត។

សូមបញ្ជាក់ថា ការចុះត្រួតពិនិត្យលើវឌ្ឍនភាពគម្រោងសាងសង់នាថ្ងៃនេះ ជាពេលវេលានៃការបិទបញ្ចប់ដំណាក់កាលសាងសង់ និងប្រជុំវាយតម្លៃទៅលើការបើកប្រតិបត្តិការជាផ្លូវការ នៃអាកាសយានដ្ឋានអន្តរជាតិតេជោ នៅថ្ងៃទី៩ ខែកញ្ញា ឆ្នាំ២០២៥ខាងមុខ៕