សមត្ថកិច្ចកោះហៅម្ចាស់គណនី Facebook JCAP Cambodia ដែលបានធ្វើការផ្សព្វផ្សាយលក់ស្បែកហ្វាំងរថយន្ត MAZDA ផ្ទុយពីការពិត និងធ្វើឲ្យប៉ះពាល់ដល់សិទ្ធិនាំចូល និងចែកចាយផ្តាច់មុខ របស់ក្រុមហ៊ុន HGB Auto 

(ភ្នំពេញ)៖ មន្ត្រីជំនាញ នៃនាយកដ្ឋាននគរបាលប្រឆាំងបទល្មើសសេដ្ឋកិច្ច កាលពីព្រឹកថ្ងៃទី០៤ ខែកក្កដា ឆ្នាំ២០២៥នេះ បានកោះហៅម្ចាស់គណនី Facebook JCAP Cambodia ដែលបានធ្វើការផ្សព្វផ្សាយលក់ស្បែកហ្វាំងរថយន្ត MAZDA ផ្ទុយពីការពិត និងធ្វើឲ្យប៉ះពាល់ដល់សិទ្ធិនាំចូល និងចែកចាយផ្តាច់មុខ របស់ក្រុមហ៊ុន HGB Auto ដើម្បីធ្វើការអប់រំ និងណែនាំ។

ម្ចាស់គណនី Facebook JCAP Cambodia ត្រូវបានមន្ត្រីជំនាញពន្យលពីផ្លូវច្បាប់លើសិទ្ធិដែលក្រុមហ៊ុន HGB Auto ដែលបានចុះបញ្ជីទទួលស្គាល់ត្រឹមត្រូវនៅក្រសួងពាណិជ្ជកម្ម ក្នុងការនាំចូល ចែកចាយ ផ្តាច់មុខនូវរថយន្ត និងគ្រឿងបន្លាស់ម៉ាក MAZDA រួមនឹងម៉ាកដទៃទៀត យកមកលក់ក្នុងទីផ្សារ ព្រះរាជាណាចក្រកម្ពុជា។ ជាមួយនោះ សមត្ថកិច្ចជំនាញបានស្នើឱ្យម្ចាស់គណនីខាងលើនេះ ត្រូវបញ្ឈប់សកម្មភាពផ្សព្វផ្សាយ ប្រកាសលក់ នាំចូលផលិតផលគ្រឿងបន្លាស់រថយន្តម៉ាក MAZDA នេះ ចាប់ពីពេលនេះតទៅ ដើម្បីជៀសវាងការទទួលខុសត្រូវតាមផ្លូវច្បាប់។

ក្រោយមកម្ចាស់គណនី Facebook JCAP Cambodia បានទទួលស្គាល់នូវកំហុសដែលខ្លួនបានប្រព្រឹត្តកន្លងមកព្រោះតែខ្វះការយល់ដឹងពីផ្លូវច្បាប់ និងធានាសន្យាថាបញ្ឈប់នូវរាល់សកម្មភាពទាំងឡាយណាដែលផ្ទុយនឹងច្បាប់ ជាពិសេសរំលោភដល់សិទ្ធិនាំចូល និងចែកចាយផ្តាច់មុខរបស់ក្រុមហ៊ុន HGB Auto តទៅទៀត។

សូមបញ្ជាក់ថា សម្រាប់រថយន្តម៉ាក MAZDA និងគ្រឿងបន្លាស់ពាក់ម៉ាក MAZDA គឺមានតែក្រុមហ៊ុន HGB Auto មួយគត់ ដែលបានចុះបញ្ជីទទួលស្គាល់ត្រឹមត្រូវនៅក្រសួងពាណិជ្ជកម្ម ក្នុងការនាំចូល ចែកចាយផ្តាច់មុខ ក្នុងព្រះរាជាណាចក្រកម្ពុជា ដូច្នេះចំពោះបុគ្គលទាំងឡាយណា ដែលកំពុងធ្វើការនាំចូល ចែកចាយ ដាក់តាំងលក់ និងផ្សព្វផ្សាយលក់ រថយន្តម៉ាក MAZDA និងគ្រឿងបន្លាស់ពាក់ម៉ាក MAZDA ដែលរំលោភដល់សិទ្ធិនាំចូល និងចែកចាយផ្តាច់មុខរបស់ក្រុមហ៊ុន HGB Auto សូមបញ្ឈប់សកម្មភាពជាបន្ទាន់ បើពុំនោះទេ ច្បាស់ជាត្រូវប្រឈមនឹងផ្លូវច្បាប់ជាធរមាន៕