លោកស្នងការ ម៉ែន លី ត្រូវបានប្រជាពលរដ្ឋលើកសរសើរថា ជាអ្នកបម្រើរាស្ត្រដ៏ល្អនិងសកម្មមួយរូបក្នុងការបង្រ្កាបបទល្មើសនានានិងបានបង្ក្រាបក្រុមរថយន្តដឹកសំពីងសំពោងលើផ្លូវក្នុងភូមិសាស្ត្រខេត្តតាកែវបានយ៉ាងល្អប្រសើរ
(តាកែវ)៖ លោកឧត្ដមសេនីយ៍ទោ ម៉ែន លី ស្នងការនគរបាលខេត្តតាកែវត្រូវបានប្រជាពលរដ្ឋនៅក្នុងមូលដ្ឋានខេត្តតាកែវលើកសរសើរថា ពិតជាអ្នកបម្រើរាស្ត្រដ៏ល្អនិងសកម្មមួយរូបគួរឱ្យគត់សម្គាល់ ព្រោះក្រោយពីលោកស្នងការរូបនេះបានឡើងមកធ្វើជាស្នងការខេត្តតាកែវលោកបានខិតខំបន្តអនុវត្តតាមការណែនាំរបស់លោក វុី សំណាង អភិបាលខេត្តតាកែវបង្ក្រាបនិងទប់ស្កាត់ចំពោះរថយន្តដឹកសំពីងសំពោងនៅលើផ្លូវសាធារណៈក្នុងភូមិសាស្ត្រខេត្តតាកែវបានយ៉ាងល្អប្រសើរជាពិសេសនៅលើដងផ្លូវជាតិសំខាន់ៗ គេមិនសូវឃើញមានរថយន្តដឹកទំនិញសំពីងសំពោងដូចមុនឆ្លងកាត់ទៀតនោះទេ។
ម្យ៉ាងវិញទៀត លោកឧត្ដមសេនីយ៍ស្នងការបានខិតខំដុតដៃដុតជើងបង្ក្រាបបទល្មើសផ្សេងៗបានយ៉ាងច្រើនករណីជាហេតុធ្វើឱ្យបញ្ហាសន្តិសុខសណ្ដាប់ធ្នាប់ល្អដែលជាលទ្ធផលធ្វើឱ្យប្រជាពលរដ្ឋមានការសប្បាយរីករាយថែមមួយកម្រិតទៀត។ យ៉ាងណាមិញ ការរិះគន់កងកម្លាំងនគរបាលចរាចរណ៍នៅលើដងផ្លូវតាមបណ្ដាញសង្គមក៏កាត់បន្ថយបានជាច្រើន ស្ទើរតែលុបបំបាត់ពាក្យថា «តាកែវទៀតហើយ»។ នេះមានន័យថា ទាំងប្រជាពលរដ្ឋអ្នកប្រើប្រាស់ផ្លូវ ក៏ដូចជាអ្នកដឹកទំនិញ
បានយល់អំពីអ្វីដែលជាសារៈសំខាន់ នៃការគោរពច្បាប់ចរាចរណ៍ដើម្បីកាត់បន្ថយគ្រោះថ្នាក់។ ប្រការនេះ ធ្វើឲ្យប្រជាពលរដ្ឋអបអរសាទរយ៉ាងខ្លាំង ចំពោះចំណាត់ការរបស់កម្លាំងនគរបាលខេត្តតាកែវ ក្នុងការបង្ក្រាបចំពោះរថយន្តដឹកទំនិញសំពីងសំពោងជារៀងរាល់ថ្ងៃ។
គួរជម្រាបជូនផងដែរថា បន្ទាប់ពីលោក វ៉ី សំណាង អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ដតាកែវបានដាក់បទបញ្ជារយ៉ាងម៉ឹងម៉ាត់ ក្នុងអង្គប្រជុំកាលពីព្រឹកថ្ងៃទី២៨ ខែឧសភា ឆ្នាំ២០២៥ ស្ដីពី ការទប់ស្កាត់ និងលុបបំបាត់រថយន្ដដឹកទំនិញសំពីងសំពោងឲ្យអស់នៅក្នុងភូមិសាស្ត្រខេត្ដតាកែវ លោកស្នងការ ម៉ែន លី បានចេញបញ្ជាឲ្យកម្លាំងនគរបាលក្រុង -ស្រុកទាំង១០ និងផែននគរបាលសណ្ដាប់ធ្នាប់ចុះអនុវត្តរឹតបន្ដឹងច្បាប់ស្ដីពីចរាចរណ៍ផ្លូវគោក ចំពោះរថយន្តដឹកសំពីងសំពោងដល់បានកាត់បន្ថយយ៉ាងច្រើនបញ្ហាសណ្តាប់ធ្នាប់និងកាត់បន្ថយយ៉ាងច្រើនផងដែរចំពោះបញ្ហាគ្រោះថ្នាក់ចរាចរណ៍។
ជុំវិញលទ្ធផលខាងលើ ប្រជាពលរដ្ឋបានអបអរសាទរចំពោះចំណាត់ការដូចភ្លៀងរលឹមរបស់លោកឧត្ដមសេនីយ៍ទោ ម៉ែន លី ស្នងការ និងកម្លាំងរបស់ស្នងការដ្ឋាននគរបាលខេត្តតាកែវ ដែលបានបង្ហាញឱ្យឃើញនិងជាមោទនភាពមួយ ក្នុងការធ្វើឲ្យប្រសើរឡើងចំពោះការកាត់បន្ថយគ្រោះថ្នាក់ចរាចរណ៍និងសណ្ដាប់ធ្នាប់នៅនៅលើផ្លូវជាតិក្នុងខេត្តតាកែវ៕ 
