«ព្រែកជីកហ្វូណនតេជោ» នឹងត្រូវសាងសង់រួចរាល់ជាស្ថាពរនៅឆ្នាំ២០២៨
(ខេត្តកំពត-កែប)៖ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា «នៅឆ្នាំ២០២៨ ព្រែកជីកហ្វូណនតេជោនឹងត្រូវសាងសង់រួចរាល់ជាស្ថាពរក្រោមការប្ដេជ្ញាចិត្តខ្ពស់របស់រាជរដ្ឋាភិបាល»។
ការគូសបញ្ជាក់របស់លោកឧបនាយករដ្ឋមន្ត្រី ស៊ុន ចាន់ថុល នោព្រឹកថ្ងៃទី៣ ខែកក្កដា ឆ្នាំ២០២៥ ក្នុងឱកាសអញ្ជើញដឹកនាំសមាជិកនៃគណៈកម្មាធិការពិសេសចុះផ្ទៀងផ្ទាត់និយាមការនិងបោះបង្គោលព្រំដីតាមបណ្ដោយព្រែកជីកហ្វូណនតេជោ ព្រមទាំងពិនិត្យទីតាំង សាងសង់ហេដ្ឋា រចនាសម្ព័ន្ធគាំទ្រសម្រាប់គំរោងព្រែកជីកហ្វូណនតេជោក្នុងភូមិសាស្ត្រខេត្តកំពតនិងខេត្តកែប ខណ:មកដល់ ពេលនេះគណៈកម្មាធិការពិសេសជំរុញការរៀបចំនិងការអនុវត្គម្រោង ព្រែកជីកហ្វូណនតេជោសម្រេចលទ្ធផលការងាររបស់ខ្លួនបោះបង្គោលនិយាមកាសរុបតាមបណ្ដោយព្រែក ជីកហ្វូណនតេជោបាន១០៨០បង្គោល ក្នុងចំនួនបង្គោលសរុបដែលត្រូវបោះមានចំនួន១៩២០បង្គោល ។
ការអញ្ជើញចូលរួមចុះពិនិត្យនេះ ក៏មានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន, លោក ម៉ៅ ធនិន អភិបាលខេត្តកំពត,លោក សោម ពិសិដ្ឋ អភិបាលខេត្តកែប ព្រមទាំងអាជ្ញាធរមូលដ្ឋានជាច្រើនរូប។
ក្នុងដំណើរចុះផ្ទៀងផ្ទាត់និយាមការនិងបោះបង់គោលព្រំដីតាមបណ្ដោយព្រែកជីហ្វូណនតេជោនិងពិនិត្យទីតាំងសាងសង់ហេដ្ឋារចនាសម្ព័ន្ធគាំទ្រសម្រាប់គំរោងព្រែកជីកហ្វូណនតេជោក្នុងភូមិសាស្ត្រខេត្តកំពតនិងខេត្តកែបនេះ លោក ស៊ុន ចាន់ថុល និងក្រុមការងារអន្តរក្រសួងបានអញ្ជើញទៅទីតាំងបោះបង្គោលនិយាមការជានិមិត្តរូបក្នុងស្រុកកំពង់ត្រាច ខេត្តកំពតតាមផ្លូវជាតិលេខ ៣១ និងបានចេញដំណើរទៅទីតាំងស្ពានឆ្លងកាត់ព្រែកជីកផ្លូវលេខ ១៣៣២ និងសន្ទះទ្វារទឹកនៅឃុំអង្គោល ស្រុកដំណាក់ចង្អើល ខេត្តកែប តាមផ្លូវជាតិលេខ៣១ និងលេខ៣៣។
ថ្លែងប្រាប់អ្នកសារព័ត៌មានក្នុងឱកាសចុះពិនិត្យនេះ លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ទៀតថា យើងបោះនិយាមការឲ្យរួចរាល់, ដោះស្រាយផលប៉ះពាល់ជូនប្រជាពលរដ្ឋ,នៅរដូវប្រាំងយើងនឹងបញ្ជូនគ្រឿងចក្រមកចាប់ផ្ដើម។ លោកបានបញ្ជាក់បន្ថែមថា ចំពោះបញ្ហាប្រជាពលរដ្ឋដែលរងផលប៉ះពាល់យើងបានដោះស្រាយមួយចំនួន ហើយជាពិសេសប្រជាពលរដ្ឋបានចូលរួមស្វាគមន៍យ៉ាងច្រើនកុះករ។ លោកបានបញ្ជាក់ច្បាស់ថា «នៅឆ្នាំ២០២៨ យើងធ្វើឲ្យចប់»។
លោកឧបនាយករដ្ឋមន្ត្រីបានថ្លែងឱ្យដឹងដែរថា យើងមានឧបសគ្គខ្លះៗដែរ នៅក្នុងការបោះបង្គោលនិយាមការនេះ ប៉ុន្តែយើងបានខិតខំធ្វើយ៉ាងណាសម្រេចគោលដៅឲ្យបានទៅតាមអ្វីដែលប្រមុខរាជរដ្ឋាភិបាលក៏ដូចជាសម្ដេចតេជោ ហ៊ុន សែន អតីតនាយករដ្ឋមន្ត្រីបានកំណត់។ នេះគឺជាយុទ្ធសាស្ត្រមួយធ្វើយ៉ាងណាឲ្យយើងមានឯករាជ្យភាពខាងការដឹកជញ្ជូនផ្លូវទឹក ដោយមិនឆ្លងកាត់ប្រទេសដទៃ៕
