អភិបាលរងខេត្តកណ្ដាល លោក ណុប តារា បានដឹកនាំកម្លាំងPMខេត្តកណ្ដាលនិងចៅហ្វាយក្រុងតាខ្មៅចុះបង្រ្កាបទីតាំងលេងល្បែងស៊ីសងខុសច្បាប់មួយកន្លែងនៅសង្កាត់ស្វាយរលំដោយឃាត់ខ្លួនជនសង្ស័យបាន២នាក់យកដាក់ពន្ធនាគារ

(កណ្ដាល)៖ អភិបាលរងខេត្តកណ្ដាល លោក ណុប តារា បន្ទាប់ពីទទួលបានបទបញ្ជាពីអភិបាលខេត្តកណ្ដាល កាលពីថ្ងៃទី២៤ ខែមិថុនា ឆ្នាំ២០២៥​បានដឹកនាំកម្លាំងកងរាជអាវុធហត្ថខេត្តកណ្ដាលនិងប្រធានគណៈបញ្ជាការឯកភាពក្រុងតាខ្មៅចុះបង្រ្កាបជាក់ស្តែងទីតាំងលេងល្បែងស៊ីសងខុសច្បាប់ (បៀ ឡូតូ មាន់ជល់អនឡាញ) មួយកន្លែង ស្ថិតក្នុងសង្កាត់ស្វាយរលំ ក្រុងតាខ្មៅ ខេត្តកណ្តាលដោយមានការសម្របសម្រួលនីតិវិធីលោកព្រះរាជអាជ្ញាអមសាលាដំបូងខេត្ត។ នេះបើតាមប្រភពដែលអង្គភាព The Mirror News ទើបទទួលបាននៅថ្ងៃចុងខែមិថុនា​ឆ្នាំ២០២៥នេះ។

បើតាមប្រភពបានប្រាប់ឱ្យ The Mirror News ដឹងយ៉ាងដូច្នេះ ជនសង្ស័យទាំង២នាក់ខាងលើនេះ គឺជាអ្នកសារព័ត៌មានដែលមានការជាប់ពាក់ព័ន្ធជាមួយទីតាំងល្បែងស៊ីសងខាងលើ។ ប្រភពបន្តថា ជនសង្ស័យទាំង២នាក់ត្រូវបានកម្លាំងសមត្ថកិច្ចយកមកអង្គភាពកងរាជអាវុធហត្ថខេត្តដើម្បីសាកសួរ។ ដោយប្រតិបត្តការបង្រ្កាបខាងលើនេះ កម្លាំងជំនាញបានដកហូតវត្ថុតាងម៉ូតូចំនួន ០៤គ្រឿង, ទូរស័ព្ទ ០៤គ្រឿង, កុំព្យូទ័រ ០២គ្រឿង, សន្លឹកបៀមួយចំនួន, តុ ០៣, កៅអី០៦, ប៉ុងជល់មាន់ ០២ប៉ុង, អាយឌី០១គ្រឿង, កាតព័ត៌មាន ០២សន្លឹក, ដុំWIFIចំនួន០១, កង្ហាល ០១គ្រឿង, គ្រឿងអលង្កាមួយចំនួន។

ជនសង្ស័យ និងវត្ថុតាងខាងលើ ត្រូវបានកម្លាំងសមត្ថកិច្ចកងរាជអាវុធហត្ថខេត្តកណ្តាលបានកសាងសំណុំរឿងបញ្ជូនទៅសាលាដំបូងខេត្តតាមនីតិវិធី។

បច្ចុប្បន្នជនសង្ស័យទាំង២នាក់ខាងលើ ត្រូវបានចៅក្រមស៊ើបសួរសាលាដំបូងខេត្តកណ្ដាលបានចេញដីកាឃុំខ្លួនបណ្ដោះអាសន្ននៅពន្ធនាគារខេត្តកណ្ដាលហើយ៕