អភិបាលខេត្តព្រះវិហារ៖ ខឿនការពារជាតិ និងប្រជាជនគឺកើតចេញពីស្មារតីរឹងមាំរបស់ប្រជាពលរដ្ឋ ដែលឈរជើងយ៉ាងមុតមាំលើទីតាំងរបស់ខ្លួន ហើយខិតខំផលិតស្បៀងសម្រាប់ផ្គត់ផ្គង់ជូនកងទ័ពដែលកំពុងឈរជើងនៅជួរមុខ

(ព្រះវិហារ)៖ អភិបាលខេត្តព្រះវិហារ លោក គីម រិទ្ធី បានថ្លែងកោតសរសើរដោយស្មោះចំពោះប្រជាពលរដ្ឋ ពុកម៉ែ ពូមីង បងប្អូន ដែលរស់នៅតាមបណ្ដោយព្រំដែន ដែលមានស្មារតីប្រុងប្រយ័ត្នខ្ពស់ និងបានរួមគ្នាធ្វើត្រង់សេការពារដោយខ្លួនឯង។​ នេះបើតាមសំណេររបស់លោក គីម រិទ្ធី អភិបាលខេត្តព្រះវិហារដែលអង្គភាពព័ត៌មាន The Mirror News ទទួលបាននៅថ្ងៃទី៣០ ខែមិថុនា ឆ្នាំ២០២៥នេះ។

នៅក្នុងទំព័រហ្វេសប៊ុក លោក​អភិបាលខេត្តបានលើកឡើងទៀតថា ខឿនការពារជាតិ និងប្រជាជនគឺកើតចេញពីស្មារតីរឹងមាំរបស់ប្រជាពលរដ្ឋ ដែលឈរជើងយ៉ាងមុតមាំលើទីតាំងរបស់ខ្លួន ហើយខិតខំផលិតស្បៀងដូចជា ស្រូវ សាច់ និងបន្លែជាដើម សម្រាប់ផ្គត់ផ្គង់ជូនកងទ័ពដែលកំពុងឈរជើងនៅជួរមុខ៕