តើសេចក្ដីជូនដំណឹងដែលលោក គួច ចំរើន ចុះហត្ថលេខាដោយផ្ទាល់ពិតជាគ្មានឥទ្ធិពលអ្វីចំពោះថៅកែហាងលក់មាស ពេជ្រ និងបញ្ចាំ គីម សួគ៌ ទេឬយ៉ាងណា ទើបថៅកែហាងរូបនេះ នៅតែបន្តសង់ថ្មីរំលោភយកដីចិញ្ចើមផ្លូវបែបនេះ?

(កណ្ដាល)៖ ថៅកែហាងលក់មាស ពេជ្រ និងបញ្ចាំ គីម សួគ៌ នៅផ្លូវលេខ២០៥ ស្ថិតនៅក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាលត្រូវបានគេរាយការណ៍ថា មិនបានអនុវត្តតាមការណែនាំ និងបទបញ្ជារបស់រដ្ឋបាលខេត្តកណ្ដាលនោះទេ ពោលគឺសេចក្ដីជូនដំណឹងដែលលោក គួច ចំរើន អភិបាលខេត្តកណ្ដាលខំចុះហត្ថលេខាដោយផ្ទាល់ហាក់បីដូចជាពុំមានឥទ្ធិពលអ្វីសោះឡើយចំពោះម្ចាស់ហាងលក់មាស ពេជ្រ និងបញ្ចាំ គីម សួគ៌ ខាងលើនេះ ព្រោះគេបានមើលឃើញថា ថៅកែហាងខាងលើបានកំពុងសម្រុកឲ្យជាងធ្វើស្លាកយីហោថ្មី មានទំហំធំជាងមុនយ៉ាងប្រញាប់ប្រញាល់ ដោយបានសាងសង់សំយ៉ាបផ្ទះ ស្លាកយីហោ គ្របលើលូ លើដីចំណីផ្លូវសាធារណៈ ស្របពេលដែលក្រុមមន្ត្រីនៃមន្ទីរសាធារណការនិងដឹកជញ្ជូនខេត្តកណ្ដាលនិងដៃគូរអភិវឌ្ឍន៍បានកំពុងដាក់លូនៅតាមបណ្ដោយផ្លូវ២០៥នេះ។

បើតាមសេចក្តីជូនដំណឹងដែលចុះហត្ថលេខាដោយផ្ទាល់ពីលោក គួច ចំរើន អភិបាលខេត្តកណ្ដាល កាលពីថ្ងៃទី៩ ខែមិថុនា ឆ្នាំ២០២៥បានបញ្ជាក់ច្បាស់ៗថា ដើម្បីរៀបចំសណ្តាប់ធ្នាប់ របៀបរៀបរយតាមបណ្តោយផ្លូវសាធារណៈ (ផ្លូវលេខ២០៥) ចាប់ពីកែងផ្លូវជាតិលេខ២១អា ដល់កែងផ្លូវលេខ១០៧ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។ ប្រភពបន្តថា ចំពោះប្រជាពលរដ្ឋដែលបានសាងសង់ផ្ទះ សំយ៉ាបផ្ទះ របង និងសំណង់ផ្សេងៗ មិនរៀបរយលើដីចំណីផ្លូវសាធារណៈ(ផ្លូវលេខ២០៥) ចាប់ពីកែងផ្លូវជាតិលេខ២១អា ដល់កែងផ្លូវលេខ១០៧ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាលថា ការសង់សំណង់មិនរៀបរយ ការលក់ដូរលើចិញ្ចើមផ្លូវ ការដាក់សម្ភារៈផ្សេងៗលើចិញ្ចើមផ្លូវ សាធារណៈរបស់បងប្អូន បានធ្វើឱ្យប៉ះពាល់ដល់សណ្តាប់ធ្នាប់ របៀបរៀបរយ សោភ័ណភាព ការធ្វើដំណើររបស់បងប្អូនប្រជាពលរដ្ឋ ការកកស្ទះចរាចរណ៍ ព្រមទាំងបង្កការលំបាកដល់រថយន្តពន្លត់អគ្គីភ័យ និងរថយន្ត សង្គ្រោះបន្ទាន់ ចូលទៅអន្តរាគមន៍នៅពេលមានគ្រោះអគ្គីភ័យ ឬគ្រោះថ្នាក់ផ្សេងៗ ដែលអាចកើតមានឡើង។

នៅក្នុងសេចក្ដីជូនដំណឹងបានបន្តទៀតថា រដ្ឋបាលខេត្តកណ្តាល រួមជាមួយមន្ទីរ-អង្គភាពជំនាញពាក់ព័ន្ធ បានចុះធ្វើការវាស់វែង និងបាញ់ ថ្នាំក្រហម កំណត់ចំណីផ្លូវខាងលើរួចហើយ កាលពីថ្ងៃទី១៨ លពីថ្ងៃទី១៨ ខែមេសា ឆ្នាំ២០២៥ ដោយផ្អែកតាមប្លង់ប្រព័ន្ធ សុរិយោដី។ រដ្ឋបាលខេត្តកណ្តាលសូមធ្វើការណែនាំដល់បងប្អូនប្រជាពលរដ្ឋ ដែលមានការពាក់ព័ន្ធ ដូចខាងក្រោមទៀតផង៖
១. ត្រូវបញ្ឈប់សកម្មភាពការលក់ដូរលើចិញ្ចើមផ្លូវការដាក់តាំងសម្ភារៈផ្សេងៗ លើចិញ្ចើមផ្លូវសាធារណៈ។
២. ត្រូវបញ្ឈប់រាល់សកម្មភាពសាងសង់សំណង់ផ្សេងៗនៅលើដ៏ចំណីផ្លូវសាធារណៈខាងលើ ចាប់ពី ថ្ងៃជូនដំណឹងនេះតទៅ។
៣. ត្រូវធ្វើការរុះរើសំណង់មិនរៀបរយដោយស្ម័គ្រចិត្ត និងជញ្ជូនយកចេញឱ្យអស់ពីទីតាំងដីចំណីផ្លូវ ខាងលើ ឱ្យបានមុនថ្ងៃទី ០៩ ខែកក្កដា ឆ្នាំ២០២៥ ជាកំហិត។
៤. ផុតកាលបរិច្ឆេទខាងលើ ក្នុងករណីមិនអនុវត្តតាមការណែនាំ រដ្ឋបាលក្រុងតាខ្មៅ នឹងចាត់វិធានការ រុះរើដោយមិនទទួលខុសត្រូវលើការខូចខាត ឬបាត់បង់សម្ភារៈរបស់បងប្អូនឡើយ។

បើតាមអាជីវករលក់មាសនៅតាមបណ្ដោយផ្លូវ២០៥បានឲ្យ The Mirror News ដឹងថា ពួកគាត់នឹងចូលរួមដោះស្លាកចេញ ហើយសំយ៉ាបដែលគ្របលើចិញ្ចើមផ្លូវនេ៖ទុកឲ្យខាងផ្សារអ្នករុះចេញ ព្រោះខាងផ្សារអ្នកធ្វើ។ ប្រភពបន្តថា ពួកគាត់ចាំតែជិតដល់ថ្ងៃ ពួកគាត់រុះរើដោះចេញហើយដើម្បីចូលរួមជាមួយរដ្ឋបាលក្នុងការរៀបចំសណ្ដាប់ធ្នាប់សាធារណៈឲ្យមានរបៀបរៀបរយ។

ពាក់ព័ន្ធករណីហាងលក់មាស ពេជ្រ និងបញ្ចាំ គីម សួគ៌ សង់យីហោរំលោភលើដីចិញ្ចើមផ្លូវ និងលូរដ្ឋ លោក ឃឹម សំភារ អភិបាលក្រុងតាខ្មៅបានឲ្យ The Mirror News ដឹងនៅថ្ងៃទី១៦ មិថុនា ថា លោកទទួលបានហើយ លោកនឹងឲ្យខាងសង្កាត់តាខ្មៅចុះទៅមើល។

បើតាមលោក ណុប តារា អភិបាលរងខេត្តកណ្ដាលបានឲ្យ The Mirror News ដឹងដែរថា លោកនឹងអនុវត្តន៍ច្បាប់ដោយគ្មានការលើកលែងឬយោគយល់ទេ បើមានករណីដូខខាងលើនេះពិតមែន៕